شپرزه‌یم

وا ئه‌رۆم و شپرزه‌ی ده‌ستی خۆمم

هه‌موو شته‌کانم ئه‌پێچمه‌وه‌

کتێب و

عه‌تر و گواره‌کانم و ئه‌وه‌ی بمه‌وێت

کۆی ئه‌که‌مه‌وه‌

ته‌نانه‌ت وورده‌ تیشکی ناو ژووره‌که‌شم

ورده‌ شه‌ونمی سه‌ر گه‌ڵای ناو باخچه‌که‌ش

کۆئه‌که‌مه‌وه‌

گسکی ئه و وورده‌ شوشانه‌ش ئه‌ده‌م

له‌ شپرزه‌یدا شکاندومه                     ‌

ورده‌ نیگای تۆ و وورده‌ ته‌لیسمت

ورده‌ دوو دڵیه‌کانم

وره‌ خه‌وی زڕاوم

ئه‌م هه‌موو وورده‌ کۆئه‌که‌مه‌وه‌

به‌س خۆمم بۆ کۆ نابێته‌وه‌

خودایه‌

هه‌رچی وورده‌ گمه‌گی کۆتری دراوسێکه‌مان و

ورده‌ چلوره‌ی گوێسه‌وانه‌ی ماڵه‌که‌م

کۆ ئه‌که‌مه‌وه‌

هه‌موو شت کۆ ئه‌بێته‌وه‌

به‌س  خۆم بۆ کۆنابیته‌وه‌

له‌وانه‌یه‌ شپرزه‌ترین ژنی دنیا من بم

له‌ شپرزه‌ید ئه‌چمه‌وه‌ سه‌ر هه‌تاو

چۆن له‌ شپرزه‌یدا هه‌موو دنیا داگیر ئه‌کان

ئه‌چمه‌وه‌ سه‌ر تاڤگه‌

ئه‌چمه‌وه‌ سه‌ر (با)

ئه‌ی خودا

هه‌موو شت کۆئه‌که‌مه‌وه‌

ژوورێک…ماڵیک …شاریک..ووڵاتێک

کۆ ئه‌که‌مه‌وه‌

که‌چی چوار هه‌نگاوی خۆمم پێ کۆنابیته‌وه‌

هه‌رچی بارانی ئه‌م وه‌رزه‌ هه‌یه‌ کۆی ئه‌که‌مه‌وه‌

له‌ گۆزه‌یه‌کی قوریندا

چوار فرمێسکی خۆمم پێ کۆنابێته‌وه

له‌سه‌ر ده‌سڕه‌که‌م

هه‌رچی گه‌ڵای دره‌ختی ئه‌م شاره‌یه‌

کۆی ئه‌که‌مه‌وه‌

له‌ سه‌به‌ته‌یه‌کی ئاویدا

که‌چی ئه‌و مشته‌ گه‌ڵا وه‌ریوه‌ی عومرم

بۆ کۆ نابێته‌وه‌

ئه‌ی خودایه‌ له‌ زۆر شوێندا خۆم ئه‌بینم و

ناتوانم خۆم کۆ بکه‌مه‌وه‌

کاتی ڕۆشتنم هاتوه‌

ده‌مه‌و به‌یان ڕۆشتم به‌سه‌رشه‌قامه‌ پڕ زوقمه‌که‌دا

دوو ڕێبوار پرسی ئه‌دره‌سی ئۆتێلیان ئه‌کرد

به‌ ئیشاره‌ت تێمگه‌یاندن

زمانم نه‌برد بوو

ببه‌خشه‌ خودایه‌ له‌ شپرزیدا ئه‌وه‌ی

تۆ به‌خشیوته‌ پێم بیرم ئه‌چێت

ئه‌رۆشتم تا گه‌یشتمه‌ دارستان

گوێم له‌ خشه‌ خشی پێیه‌

ڕوانیم له‌وێ ڕۆبن هووده‌ و

ئه‌چه‌مێته‌وه‌ داوا ئه‌کات ده‌ستمی بده‌مێ

سه‌مایه‌کی کلاسیکی له‌گه‌ڵدا که‌م

به‌ جارێک بێئومێد بوو لێم ده‌سته‌کانم

نه‌برد بوو

له‌ شپرزه‌ی خۆمدا ئه‌خولێمه‌وه‌

تا ئه‌گه‌مه‌ ئاوادانیی

له‌سه‌ر کورسییه‌کی دار پاڵم داوه‌

زۆری نه‌برد هونه‌رمه‌ندیکی کامڵ

هاته‌ پێش لێم ووێنه‌یه‌کی دامێ

وتی ئێسته‌ کێشاومه‌ بۆت

هیچم نه‌دی ته‌نیا سه‌راب و جانتایه‌ک‌

له‌سه‌ر کورسێکه‌ ڕاکشاوه‌

هه‌موو گیانمم بیر چوه‌

له‌ شپرزه‌یدا نه‌مهێناوه‌

حیات مجید په‌رخی