شاری تارماییه‌کان

به‌ندی عه‌لی .. 2011

له‌گشت په‌ناو په‌سارێکا

له‌به‌ر ده‌رگای هه‌موو ماڵێ

له‌پاڵ هه‌موو دیوارێکا

له‌سه‌ر هه‌موو توله‌ڕێیه‌ک

له‌بن هه‌موو ده‌وارێکا

له‌ئاپۆڕه‌ی سه‌رشه‌قام و

له‌کۆڵانه‌ چۆڵه‌کانا

له‌چایخانه‌و له‌مزگه‌وت و

له‌مه‌یخانه‌و مۆڵه‌کانا

له‌نێو بینه‌رانی شانۆ

له‌باخچه‌و له‌هۆڵه‌کانا

له‌خوێندنگاو له‌نێو زانکۆ

له‌ئاهه‌نگ و پرسه‌کانا

له‌سه‌یران و له‌سه‌ر گڵکۆ

له‌سێبه‌ری هه‌موومانان

نزیکتر له‌هه‌ناسه‌ی من و

له‌چاو تروکاندنی تۆ

ئه‌وان له‌وێن

بۆنی ته‌ته‌ره‌کانی دۆزه‌خیان

لێدێ .. که‌دێن

ئه‌وان له‌وێن

کڵاوی سیحروای غه‌یبیان

له‌سه‌ردایه‌ وه‌ نابینرێن

ئه‌وان له‌وێن

گوێمان له‌زرمه‌ی پێی مه‌رگه‌

کاتێ که‌دێن

ئه‌وان له‌وێن و نابینرێن

هه‌ناسه‌کان ژمار ئه‌که‌ن

گوێ له‌چرپه‌ی دڵمان ئه‌گرن

خه‌ونه‌کانیش ئه‌پشکنن

نیگا له‌چوارچێوه‌ ئه‌نێن

کاتێ که‌دێن

ئه‌وان له‌وێن و نابینرێن

کێ هه‌ناسه‌ی درێژتر بێ

له‌سه‌یزاده‌ .. ده‌یفڕێنن

کێ به‌چرپه‌ باسی ئه‌وکا

دڵی له‌سینه‌ ده‌ردێنن

کێ له‌خه‌ودا جوێنی پێدا

خۆی و خه‌وی ئه‌سوتێنن

کێ به‌برژانگێکی نیگاش

تیری توانجی تێ بگرێ

ترێ ڕه‌شکه‌ی چاوی ئه‌که‌ن

به‌مێووژو ئه‌یپروێنن

وه‌لێ .. یاران

سه‌یرو سه‌مه‌ر نه‌بێ لاتان

له‌شاری تارماییه‌کانا

که‌سانێ هه‌ن

گه‌مژه‌و زه‌لیل و ملکه‌چن

هه‌ر له‌دێوه‌ ده‌بنگه‌که‌ی

نێو چیرۆکی عه‌لادین و

قۆریه‌ سیحراویه‌که‌ی ئه‌چن