مەسعودی مەلا ھەمزە : لەدرێژەی چالاکییەکانی بەڕێوەبەرایەتی ھونەری شانۆی ھەولێر و بە ئامانجی ناساندنی ھونەری دەرەوە بە کورد و دروستکردنی پردی پەیوەندی لەنێوان ھونەرمەندانی کورد و بیانیدا، بەڕێوەبەرایەتی شانۆی ھەولێر میوانداری گروپی شانۆی “تیاتەر ئەندەر رۆھەر”ی ئەڵمانی دەکات و بڕیارە لە شاری ھەولێر ٣ شانۆگەری نمایش بکەن.
بەگوێرەی راپۆرتی راگەیاندنی بەشی راگەیاندنی بەڕێوەبەرایەتی ھونەری شانۆی ھەولێر ھاتووە کە ئەو بەڕێوەبەرایەتییە میوانداری گروپی شانۆی “تیاتەر ئەندەر رۆھەر”ی ئەڵمانی دەکات و لەو گەشتەیاندا ئەو گروپە ٣ شانۆگەری بەرابەرایەتی رۆبەرتۆ جولی وەک دەرھێنەر دەکەن.
ھەر لەو راپۆرتەدا ھاتووە کە ئەم شانۆگەرییانە کاتژمێر ٦ی ئێوارەی رۆژانی ١٢و١٤و١٥/٤/٢٠١٢ لە ھۆڵی گەلی شاری ھەولێر نمایش دەکرێ.
لەکۆتابەشی ئەو راپۆرتەدا ھاتووە کە ئەو چالاکییەی بەڕێوەبەرایەتی ھونەری شانۆی ھەولێر بەشێکە لە چالاکییە بەردەوامەکانی کەرنەڤاڵی رۆژی جیھانی شانۆ کە تاکو ١٥/٥/٢٠١٢ بەردەوام دەبێ و تێیدا کۆمەڵێک چالاکی نمایش کراوەو نمایش دەکرێ.
