مەنووچێهر جیهانی ـ به‌ڕێوه‌به‌ری ده‌بیرخانه و نووسینگه‌ی سی و دووهەمین خولی فیستیڤاڵی نێونه‌ته‌وه‌یی فیلمه‌کانی منداڵان و مێرمنداڵانی ئیسفه‌هان سه‌باره‌ت به ره‌وت و بارودۆخی ناردنی به‌رهه‌مه‌کانی کورته‌فیلم بۆ نووسینگه‌ی فیستیڤاڵ روونکردنه‌وه‌ی ئاراسته کرد.
به پێی راپۆڕتی لێژنه‌ی په‌یوه‌ندییه‌کان و راگه‌یاندنی سی و دووهه‌مین خولی فێستیڤاڵی نێونه‌ته‌وه‌یی فیلمه‌کانی منداڵان و مێرمنداڵانی ئێران، “سیمۆن سیمۆنیان” به‌ڕێوه‌به‌ری ده‌بیرخانه و نووسینگه‌ی سی و دووهەمین خولی فیستیڤاڵی نێونه‌ته‌وه‌یی فیلمه‌کانی منداڵان و مێرمنداڵانی ئیسفه‌هان له دیمانه له‌گه‌ڵ لێژنه‌ی راگه‌یاندنی فیستیڤاڵ سه‌باره‌ت به پێشوازیی سینه‌ماکاران له فیستیڤاڵ و رێژه‌ی ئه‌و به‌رهه‌مانه‌ی که بۆ به‌شداری له‌م رووداوه سینه‌ماییه له به‌شی به‌رهه‌مه‌کانی کورته‌فیلم و ئه‌نیمه‌یشێن گه‌یشتۆته ده‌بیرخانه گوتی: تا ئێستا زیاتر له سه‌د و په‌نجا فیلم له به‌شی کورته فیلمه‌کان و ئه‌نیمه‌یشێن به ناردنی به‌رهه‌م، خوازیاری به‌شداری له سی و دووهەمین خولی ئه‌م فیستیڤاڵه بوونه. رێژه‌یه‌کی زۆر له سینه‌ماکاران، که‌سایه‌تییه‌کان و روخساری لاو و به‌هره‌کانی تازه ده‌رکه‌وتوون که خوازیاری به‌شداری له‌م خوله‌ی فیستیڤاڵه‌که بوون.
به‌ڕێوه‌به‌ری ده‌بیرخانه و نووسینگه‌ی سی و دووهەمین خولی فیستیڤاڵی نێونه‌ته‌وه‌یی فیلمه‌کانی منداڵان و مێرمنداڵانی ئیسفه‌هان به جه‌خت کردنه‌وه له‌سه‌ر ئه‌و یاسا و رێسایانه‌ی که له بانگه‌وازی فیستیڤاڵی ئه‌مساڵدا ئاماژه‌یان پێدراوه، رایگه‌یاند: به‌پێی یاسا و رێساکانی فیستیڤاڵ، ئه‌و فیلمانه‌ی که ماوه و کاته‌که‌یان له نێوان 3 تا 15 خوله‌که، به کورته فیلم دێنه ئه‌ژماردن و فیستیڤاڵیش میوانداری ئه‌م به‌رهه‌مانه‌یه. به‌م پێیه سینه‌ماکاران ئه‌م خاڵه له‌به‌ر چاو بگرن که فیلم گه‌لی به ماوه‌ی که‌متر یا زیاتر به‌پێی ده‌قی رێکاره‌کانی بانگه‌واز، بارودۆخی به‌شداری له فیستیڤاڵیان نیه و ته‌نیا ئه‌و به‌رهه‌مانه‌ی که ئه‌م هه‌لومه‌رج و بارودۆخه‌یان هه‌یه، وه‌رده‌گیرێن و له لایه‌ن ده‌سته‌ی هه‌ڵبژاردن پێداچوونه‌وه و دووباره بینینه‌وه‌یان بۆ ده‌کرێت.
“سیمۆن سیمۆنیان” له درێژه‌ی قسه‌کانیدا به ئاماژه‌دان به‌وه‌ی که له‌م خوله‌ی
فیستیڤاڵه‌که‌دا بۆ یه‌که‌مین جار چاوه‌ری به‌ڕێوه‌چوونی به‌شی وێب سێرییه‌کان، به شێوه‌ی رکابه‌ری ده‌بین، به‌ڕێوه‌چوونی ئه‌م به‌شه‌ی به نیشانه‌ی گۆڕینی روانینی ده‌سه‌ڵاتدار به‌سه‌ر فیستیڤاڵ و به فه‌رمی ناسینی بارودۆخی نوێی پیشه‌سازی وێنه له بواری منداڵ و مێرمنداڵدا زانی و له شیکردنه‌وه و روونکردنه‌وه‌ی بارودۆخی به‌شداری کردن له‌م به‌شه گوتی: به‌رهه‌مه‌کانی زنجیره‌یی که به شێوه‌ی تایبه‌ت بۆ په‌خش و بڵاوکردنه‌وه له‌سه‌ر رایه‌ڵه‌کانی ئینته‌رنێتی دیزاین و ئاماده کراون و به‌رده‌نگی خۆیان له چینی منداڵ و مێرمنداڵ هه‌ڵبژاردووه، به‌ده‌ر له‌وه‌ی که به شێوه‌ی بێ به‌رامبه‌ر یان بۆ کڕین و بۆ به‌ستێنه‌کانی جۆراوجۆری UGC یان به‌ستێنه‌کانی VOD به‌رهه‌مهێنرابن، ده‌توانن له‌م به‌شه‌دا به‌شداری بکه‌ن. درێژایی ماوه‌ی هه‌ر به‌شێک یان وێبزۆرد له‌م کۆمه‌ڵه زنجیره به‌رهه‌مانه‌ش له وه‌رگرتنی ئه‌م به‌رهه‌مانه له‌م به‌شه له فیستیڤاڵدا کاریگه‌ری نیه و فیستیڤاڵ میوانداری هه‌موو به‌رهه‌مه‌کانی ویب سێری له کورته‌فیلمه‌کانی یه‌ک خوله‌کی هه‌تا کۆمه‌ڵه‌ی زنجیره‌کانی درێژی نێوان 30 تا 45 خوله‌کی ده‌بێت.
به‌ڕێوه‌به‌ری ده‌بیرخانه و نووسینگه‌ی سی و دووهەمین خولی فیستیڤاڵی نێونه‌ته‌وه‌یی فیلمه‌کانی منداڵان و مێرمنداڵانی ئیسفه‌هان جه‌ختی له‌وه کرده‌وه: ده‌سته‌ی ناوبژیوان و هه‌ڵبژاردن له‌م به‌شه‌دا، هه‌م سه‌رنج ده‌داته پێوه‌ره‌کانی په‌یوه‌ندیدار به چۆنایه‌تی هونه‌ری به‌رهه‌مه‌کان و هه‌م پێناسه و ناوه‌رۆکی کار و پیشه‌یی ئه‌مانه له‌به‌ر چاو ده‌گرێت و پێشبینی ئێمه ئه‌وه‌یه که ئه‌مساڵ، به‌شداربوونی ئه‌م به‌رهه‌مانه، رۆحیه‌تی نوێخوازی و هاوپه‌یوه‌ند له‌گه‌ڵ بارودۆخی رۆژی پیشه‌سازیی وێنه له وڵاتی ئێران، ده‌ڕژێنێته‌وه نێو فیستیڤاڵه‌وه.
“سیمۆن سیمۆنیان” له کۆتاییدا وه‌بیری هێنایه‌وه: رۆژی 15ی پووشپه‌ڕی 1398ی هه‌تاوی رێکه‌وتی 6ی جولای 2019ی زایینی دوایین مۆڵه‌تی ناونووسی و راده‌ست کردنی به‌رهه‌مه‌کان بۆ سی و دووهەمین خولی فیستیڤاڵی نێونه‌ته‌وه‌یی فیلمه‌کانی منداڵان و مێرمنداڵانی ئێرانه و بێجگه له به‌شی وێب سێرییه‌کان که له‌به‌ر هۆکارگه‌لی جۆراوجۆر له‌وانه‌یه ماوه‌ی بانگه‌وازه‌که‌ی درێژ بکرێته‌وه، له به‌شه‌کانی دیکه‌دا چاوه‌ری درێژ کردنه‌وه‌ی ئه‌م ماوه‌یه نابین.
سی و دووهەمین خولی فیستیڤاڵی نێونه‌ته‌وه‌یی فیلمه‌کانی منداڵان و مێرمنداڵانی ئێران ICFF بە بەرپرسیاریی “عەلیڕەزا تابێش” لە رۆژانی 28ی گه‌لاوێژ تا 4ی خه‌رمانانی 1398ی هه‌تاوی رێکه‌وتی 19 تا 26ی ئۆگۆستی 2019ی زایینی له دوو به‌شی “نه‌ته‌وه‌یی” و “نێونه‌ته‌وه‌یی”دا لە شاری مێژوویی ئیسفەهان لە وڵاتی ئێران بەڕێوەدەچێت.
