ئارامییەكی بێ سنور لە مندا هەیە .. لە بەرهەمی پێشووم ویستوومە پەیامێكی پڕ گلەیی عاشقێك بگەیەنمە عەشقەكەی
ئەگەر لەگەڵ دروستبونی كەسێك بەهرەی هونەری دروست نەبوبێت ناتوانێ بەسودفە ببێتە هونەرمەند
كاتێك هونەر نەهی لە بێوەفایی نێوان ئینسانەكان دەكات و باسی ئازاری دابڕانی كەسێك دەكات بەهۆی كاری بەدی یەكێك لە مرۆڤەكان هونەر دەچێتە خانەی دژایەتی ئازاردانی ڕۆحی
دیمانە: دیلان ڕەشاد
لەم دیمانەیەی رووبەردا سیریل باس لە دەسپێكی كاری هونەری خۆی دەكات و ئاماژە بەوە دەدات كاركردن بۆ هونەرمەندی كورد لەئەوروپا بەبەراورد بە كوردستان سەختترە. دەشڵێت ژنێكی كوردم و بە رۆحێكی ژنانە نارەزایی دەردەبڕم، لەو دیاردانەی كەبەرانبەر بەژن دەكرێت،
ڕووبەر: پێم خۆشە زیاتر بت ناسین؟
سیریل: لەدایك بووی سلێمانیم و ١٩ ساڵە لەسویدم بۆ مامۆستایی و وەرگێری زمانی سویدی و كوردی خوێندومە.
ڕووبەر: دەكرێت باسێكی كارەكانت بكەی؟
سیریل: من بەرهەمێكی بڵاوكراوەم هەیە، كە تایبەت بەخۆم بێت و بەخۆشحاڵییەوە پێشوازییەكی باشی لێكرا، بەڵام بێ كەموكوڕی نەبووەو بەهیوام بۆ كارەكانی داهاتوو هەر كەموكوڕییەك هەبوبێت نەیهێڵم، بەرهەمی دیكەشم هەیە، كە بڵاو نەكراوەتەوەو كار بۆ چەند بەرهەمێكی تریش دەكەم.
ڕووبەر: دەستپێكردنی كاری هونەریت چۆن بوو؟
سیریل: هونەرو هونەر كردن حەزێك بووە، كە هەر لەمنداڵییەوە لەگەڵمدا بونی هەبووە، زۆربەی هونەرمەندەكان ئەم وەڵامە دەدەنەوە، بەڵام ئەمە تەقیلید نییە بەڵكو بەشێكە لە راستی، چونكە ئەگەر لەگەڵ دروستبونی كەسێك بەهرەی هونەری دروست نەبوبێت، ناتوانێ بەسودفە ببێتە هونەرمەند، خۆ ئەگەر كاری هونەریش بكات هەست دەكەی كە نەیتوانیوە كارێك بكات كە لەئاستی جوانییەكانی هونەردا بێت، منیش پێم وایە ئەو بەهرەو حەزو خولیایە لەمنداڵیمەوە بونی هەبووە، بۆیە دوای ئەوەی تێگەشتم كەدەبێت لەو بوارەدا خزمەت بكەم، بەپراكتیك كارم بۆ توانا دەنگی و ڕۆحیەكەم كرد، ئەوەتا ئێستا هەوڵی بۆ ئەدەم و ئەمەوێ وەك ئەوەی كە دەبێت هەبێت و خزمەت بكرێت خزمەتی هونەر بكەم، یەكەم بەرهەمم بەرهەمهێناو بڵاوكرایەوە ئێستا كار لەسەر چەند بەرهەمێكی تر دەكەم.
ڕووبەر: پێت وانییە كە لە ئەوروپا كاری هونەری سەختترە؟
سیریل: كاری هونەری لە ئەوروپا بۆ هونەرمەندانی خۆیان سەخت نییە، چونكە هونەر لای ئەوان ئەتوانێ لەسەر پێی خۆی بوەستێت و بەداهاتی خۆی، بروات بەڕێوە. بەڵام بێگومان بۆ هونەرمەندێكی كورد سەختە، بەهۆی خەرجی زۆرو بێ داهاتی، بەهۆی لەیەك دووری هونەرمەندان، زەحمەتی كۆكردنەوەی چەند هونەرمەندێك بۆ بەشدارییان لە بەرهەمهێنانێكی هونەری، بۆیە كاركردن بۆ هونەرمەندی كورد لەئەوروپا بەبەراورد بە كوردستان سەختترە.
ڕووبەر: ئەوە نەبووە بەهۆی ئەوەی بەرهەمت كەمبێت؟
سیریل: نا سەختی كاری هونەری لەئەورپا، نابێتە هۆی كەمی بەرهەم، ئەگەر لە رووەكانی ترەوە توانات هەبێت، گەر ئاسانكاری بەرهەمهێنانت هەبێت ئەتوانی كار بكەی، لێرە نا لە كوردستان، یان لەهەر جێیەكی تر، بەدەر لەوە من نامەوێ پەلە بكەم لە بەرهەمهێنان، نامەوێ لەپێناو زیاتركردنی بەرهەم بەژمارە، وردبونەوەو بیركردنەوە لە بەرهەمی باش لەیاد بكەم، دەمەوێ بەر لە بەرهەمهێنانی هەر بەرهەمێك، بەوردی بیری لێ بكەمەوە، دڵنیابم لەسەركەوتووی و جوانی بەرهەمەكە.
ڕووبەر: هەوڵت نەداوە بگەڕێیتەوە كوردستان و لێرە چەند كارێكی هونەری بكەی؟
سیریل: ماوەیەك بەر لەئێستا گەڕامەوە كوردستان و كارم بۆ بەرهەمێكی هونەری كرد، ئەتوانم بڵێم بەرهەمێكی سەركەوتووە، بێگومان ئەگەر بگونجێت لە داهاتووش سەردانی كوردستان دەكەم و هەوڵی چەند بەرهەمێكی جوانیش دەدەم.
ڕووبەر: كێ زیاتر هاوكاریت دەكات بۆ كاری هونەری؟
سیریل: تا ئێستا كارەكانم لەسەر ئەركی خۆم بووە، كەس هاوكارم نەبووە لەباری خەرجی و ئەركی بەرهەمهێنان، بەڵام لەباری هونەرییەوە بێگومان هەندێك لە هونەرمەندان هاوكارم بوون و سوپاسگوزاری ماندووبونیانم، بەتایبەت لەكلیپی یەكەمم هاوڕێی بەڕێزم كاك بەختیار فەتاح زۆر هاوكاری كردم.
ڕووبەر: زیاتر حەز بە چ ستالێكی هونەری دەكەی؟
سیریل: كاری هونەری دەكەم و توانای هونەری لە خۆمدا دەبینم، بە رابینینم لە تواناكانی خۆم، دەڵێم توانام هەیە و هەوڵیش دەدەم لەسەر زۆرێك لەستایلەكان كار بكەم و لەداهاتووش ئەنجامی هەوڵەكان دیار دەبن.
ڕووبەر: پێت وایە هونەرمەند پێویستە موزیك ژەن بێت ئالەتێك بزانێت؟
سیریل: ئەگەر هونەرمەند بتوانێ ئامێرێك بژەنێت زۆر باشەو ئاسانكاری بۆ كارەكانی دەكات و لەوكاتانەی كە كار لەسەر دەنگی خۆی دەكات، رەنگە یاریدەدەرێكی باش بێت بۆی، بەڵام مەرجێك نییە كە دەبێت هونەرمەندی گۆرانی بێژ بزانیت و بتوانێت ئالەتێك بژەنێت، چونكە لەهەموو دنیا وایە موزیك ژەن ئالەتەكەی دەژەنێت، ئەركی گۆرانی بێژ ژەنینی دەنگی خۆیەتی، بۆیە لای من مەرجە هونەرمەندی گۆرانی بێژ، شارەزایی هەبێت لە ستایل و مەقامات، تا بتوانێ دەنگی جوان بەكار بخات، وەك وتم مەرج نییە گۆرانی بێژ موزیك ژەنیش بێت، خۆ ئەگەر توانای ژەنینی ئالەتێكیشی هەبێت بێگومان كارێكی باشە و بەسودە
ڕووبەر: خۆت هیچ ئالەتێك دەژەنیت؟
سیریل: بەداخەوە تا ئێستا ناتوانم هیچ ئالەتێك بژەنم، بەڵام بۆ داهاتوو هەوڵ ئەدەم كە خۆم فێری ژەنینی ئامێرێك بكەم، بۆ ئەوەی ئەوكاتانەی تەنیا لەگەڵ دەنگی خۆم كار دەكەم و پرۆڤە دەكەم هاوڕێ و یاریدەدەرم بێت.
ڕووبەر: كەمێك لەبارەی خانەوادەكەت بدوێ بەس تۆ هونەرمەندی لە ناویاندا؟
سیریل: خێزانەكەی من، خێزانێكی هونەر دۆستن، تێگەشتن و خوێندنەوەی جوانیان بۆ هونەر هەیە، باوكی خوا لێخۆشبووم دەنگێكی زۆر خۆشی هەبوو، بەردەوام بە دەنگە خۆشەكەی رۆحی هەموومانی شادكردووە، ئەو تێدەگەشت هونەر چییە، بۆیە كاریگەری لەسەر تێگەشتنی ئێمەش هەبووە، بەگشتی ئەتوانم بڵێم لەناو خانەوادەكەم بەهرەی دەنگخۆشی هەبووە لەباوك و دایكمەوە تا براو خوشكەكانیشم، من لەو خێزانەدا وەك هونەرمەندی گۆرانی بێژ كار دەكەم و بەهیوام بتوانم لەئاستی پێویستدابم، شەمێران فەتاح برامە ئەو هونەرمەندێكی بەتوانایە، لەبواری تەشكیلی، هەروەها كار لە یەكێك لە تیڤیەكان دەكات، بۆیە دەكرێت بڵێم بەتێگەشتنی جوان بۆ هونەرو بەكاركردن بۆ هونەر، دەكرێت بڵێم خانەوادەیەكی هونەری دروست بوین.
ڕووبەر: ئەتوانی بەچەند زاراوە گۆرانی بڵێی؟
سیریل: تا ئێستا بەزاراوەی سۆرانی گۆرانیم وتووە، هیوام وایە بە زاراوەی كرمانجی و هەموو زاراوە كوردییەكان گۆرانی بڵێم لەداهاتووە، بەدەر لەوانە ئەتوانم بەشێوەیەكی باش بە زمانی عەرەبی و فارسیش گۆرانی بڵێم.
ڕووبەر: سیریل كەسێكی ئارامە یان تووڕە؟
سیریل: سیریل كەسێكی ئارامە ئارامییەكی بێ سنور لە مندا هەیە
ڕووبەر: بەس بۆئەوەی دەنگت خۆشە گۆرانی دەڵێی؟ ئایا دەبێت گۆرانی بێژ هۆكارێك هەبێت بیكاتە گۆرانی بێژ؟ یان سیناریۆی كلیپەكەت رەنگدانەوەی ژیانی خۆتە؟
سیریل: بێگومان دەبێت هۆكار هەبێت كەسێك بكاتە گۆرانی بێژ، روونتر بڵێین دەبێت ئامانجێك هەبێت لەپێناویا گۆرانی بڵێی، ئامانج لەكەسێكەوە بۆ كەسێكی تر جیاوازە، هەیە مەبەستیەتی بگاتە ناوبانگ، هەیە دەنگی خۆشە و دەیەوێ خزمەتی دەنگی بكات، هەیە خولیایە و دەیەوێ كاری بۆ بكات، من حەزم هەبووە ببمە گۆرانی بێژ، لەتوانای دەنگم رامبینیووە و لەمنداڵییەوە هەستم بەوە كردووە، بەڵام وەك دەبینن درەنگ هاتمە بوارەكە، ئەویش هۆكاری ئەوەبووە ئەو ئامانجەی من لەپێناویدا دەمەوێ گۆرانی بڵێم، رەنگە زۆری ویستبێت تا بوبێتە پاڵنەرم، ترسم هەبووە، كە دواتر كاركردنم بۆ ئامانجەكە، بمخزێنێتە ناو هەوڵی ناوبانگ دروستكردن، بەڵام لەئەنجامی بیركرنەوەی زۆرو دڵنیابونم لەوەی كە هێزو ئیرادەیەك هەیە، لەسەر ئەو ئامانجە رامدەگریت كە گۆرانی لەپێناودا دەڵێم، بڕیارمدا گۆرانی بڵێم، بەكورتی ئەتوانم بڵێم لەبەر ئەوەی بەهرەو خولیایەك لەمنداڵییەوە لەمندا هەبووە بۆ هونەر، دواتر بەتێگەشتنم لەهونەر كە دەكرێت لە ڕێی ئەو بەهرەو دەنگ و توانای كە لەخۆمدا دەیبینم خزمەت بە ئامانجێكی گەورەتر لە ناوبانگ و دەستكەوتی مادی، كە ئەویش خزمەتكردنی ئینسان و ئینسانییەتە، من بەهونەرەكەم دەتوانم گۆرانی بۆ گرفتەكانی تاك بڵێم، وەك گرفتە رۆحییەكانیان، دەتوانم هەوڵبدەم بۆ جوانكردنی نێوانی ئنیسانەكان، بۆ پیشاندانی زیانی ناراستگۆیی لەگەڵ یەك، بۆ دروستكردنی وەفا و زۆر لایەنی جوانی تر لە خزمەتی ئینسان، كەوایە دەتوانم بڵێم بۆ خزمەتی مرۆڤایەتی هونەر دەكەم و گۆرانی دەڵێم نەك بەس بۆ ئەوەی دەنگم خۆشە.
بۆ بەشی دووەمی پرسیارەكەت لەباری سیناریۆی كلیپەكە، ناوەرۆك یان چیرۆكی بەرهەمی پێشووم كە وەك كلیپ بڵاو كراوەتەوە، پێشتریش وتوومە، كە لەو بەرهەمەدا ویستوومە، پەیامێكی پڕ گلەیی عاشقێك بگەیەنمە عەشقەكەی، ئەوەش بەمانای كەسێكی دیاری كراو نا، بەڵكو بۆ هەموو ئەوانەی دەیانەوێ ئەو پەیامە بگەیەنن، ئەو بەرهەمە و دەنگی من هۆكاری گەیاندنی پەیامەكەیانە، منیش وەك هەر یەكێك لەوانە رەنگە بەشێكی كەمیش بێت، خۆمی تیا ببینمەوە، نەوەك تایبەت بە بەسەرهاتێكی خۆم، كارم بۆ ئەو بەرهەمە كردبێت.
ڕووبەر: بەمزوانە بەرهەمی نوێتان دەبێت؟
سیریل: بەڵێ ماوەیەك لەمەو بەر، سەردانی كوردستانم كرد، لەوێ كاری بەرهەمهێنانی بەرهەمێكی نوێم كردووە، لە تێكست و ئاوازی كاك سۆران ئیبراهیم خەیات و دابەشكردنی كاك هێمن حسێن، لە داهاتوویەكی نزیكدا ئەو بەرهەمەش كلیپ دەكرێت.
ڕووبەر: چیت هەیە بۆ توندوتیژی دژی ئافرەتان بەتایبەت لەكوردستان كە ئەو دیاردەیە هەیە؟
سیریل: ئەنجامی توندوتیژی ئازاردانی مرۆڤەكانە كاتێك هونەر نەهی لە بێوەفایی نێوان ئینسانەكان دەكات، كاتێك گۆرانی بۆ گرفتی پێكەوە ژیان دەڵێی و باسی ئازاری دابڕانی كەسێك دەكەی بەهۆی كارێكی بەدی یەكێك لە مرۆڤەكان، ئەوە خۆی لەخۆیدا دەچێتە خانەی دژایەتی ئازاردانی ڕۆحی ئەگەر جەستەیش نەبێت، منیش ژنێكی كوردم و بە رۆحێكی ژنانە نارەزایی دەردەبڕم، لەو دیاردانەی كەبەرانبەر بەژن دەكرێت، وەك بێ ئەمەكی و بێ وەفایی، بۆ نمونە لەبەرهەمی پێشوو كاتێك من پەیامی نارەزایی ژنێك دەگەیەنم بەرانبەر بەخیانەت، مانای ئەوەیە دەنگم هەڵبڕیوە بەرانبەر ئازاردان و غەدرێكی ڕۆحی كە لەژن كراوە كە بەمانەیەك لەماناكان دەچێتە خانەتی دژایەتی توندوتیژی، بەڵام من پێم وایە هونەر دەبێت پەیامی راستەوخۆشی هەبێت بۆ رێگری لە دیاردەی توندووتیژی، كە بەداخەوە تاكو ئێستا لە سەراپای دنیا بونی ماوە، بەڵام دیارە لە كوردستان بەرچاوترەو رەنگە زیاتریش بێت، بەهیوام لە داهاتوو كار بكەم بۆ ئەو لایەنەش چونكە ئەوەش یەكێك لە ئەركەكانی هونەرە.
ڕووبەر: لەكۆتاییدا پێت وایە خۆشگوزەرانی مرۆڤ لەچ شتێكدایە؟
سەرمایە، ئاسودەبوون، ئازادی تاك؟
سیریل: خۆش گوزەرانی مرۆڤ، لە مورتاح بوونی ویژدانیدایە، ئەگەر كەسێك ویژدانی ئاسودە بوو خۆشگوزەرانە، بەڵام ئەگەر ویژدانت مورتاح نەبوو، نە ئازادی و نە سەرمایە و نەهیچ شتێكی دنیا ناتوانێ خۆشگوزەرانت بكات.
تێ بینی. ئەم دیمانە بۆ رۆژنامەی روبەر ئامادەکراوە…
