دارا خونچە :رەوکردنی کوردانی رۆژئاوا وە پێی یاسایە نێودەوڵەتییەکانی پەنابەریی مافەکی زۆر ئاسایی و سەرەتایی خۆیانە چونکە شەڕەکی کاوڵکەرانە و زۆر دڕندانە لەسەر زێدەکەیان دەگوزەرێ و مافی هیچ کەس و وڵاتەکی دراوسێ نییە سنوورەکانیان لەسەر دابخەن و گەمە بە ژیان و چارەنووسیان بکەن. هەروەها هاریکارییکردنی مادیی ئەو خەڵکەش – کە شەڕی نەخوازرایان تووش بووە و بە هۆیەوە سادەترین پێداویستییەکانی ژیان و گوزەرانیان لە دەست دایە – جا چ ئەوانەی لە نێو زێدی خۆیانن چ ئەوانەی سنوورەکانیان بڕییە و ئاوارەی وڵاتە دراوسێیەکان بوونە ئەرکەکی مرۆیی و رەوشتییە لەسەر شانی هاوڵاتییان و دەسەڵاتدارانی ئەو وڵاتانە، هیچ پێویست ناکا هیچ کەس و لایەنەک لافی کوردایەتیی پێوە لێبدا.
ئەوەی هەنووکە لە هەرێمی کورستان دەرهەق وە پرسی کوردانی خۆرئاوا و دەرهەق وە ئاوارەکانی سنوورە دەستکردەکەی نێوان باشوور و رۆژائاوای نیشتیمان دەگوزرەێ بازرگانییەکی سیاسەتبازانەی فرە فرە بێزەوەر و نامرۆییانەیە:
• (مەسعود بارزانی و پارتی) لە (گرتن و کردنەوەی سنوور وە رووی ئاوارەکان و شێوازی ناردنی کۆمەک و دانی کۆمەک وە ئاوارە دەربازبووەکان) وە هەمانگیی لەگەڵ دەسەڵاتی تورکیای داگیرکەری کوردستان وە پێی نەخشە و پیلانەک کار دەکەن کە بتوانن لە رێی هێندەک حیزبی گچکە و وە ناو حیزبی کوردانی رۆژئاوا – کە بەکرێگیرای خۆیانن – ئاژاوە بنێنەوە و دژ وە (پەیەدە) و دەسەڵاتی هەنووکەی هەرێمی کوردستانی رۆژئاوا کە ناڕاستەوخۆ لە لایەن (پەکەکە)وە بەڕێوەدەبردرێ بوەستنەوە و دەست وەسەر بزاڤ و رابوونی کوردانی رۆژئاوا دابگرن و سیاسەتی فراوانخوازانەی خۆیان جێبەجێ بکەن و بازرگانیی وە ئاوارەکان و پرسی کوردانی رۆژئاوا بکەن!
• (گۆڕان) لە پێناو سەرنجڕاکێشانی جەماوەر و خزمەتکردن وە سیاسەتە تاکتیکبازە ساویلەکەییەکانی خۆی و پەیداکردنی زۆرترین دەنگدەر و گەیشتن وە دەسەڵات.. تەنێ وە قسەی بێ کردار تەواو پێچەوانەی مەسعود بارزانی و پارتی دەجوولێتەوە.. جا گرنگ نییە قسە و هەڵسوکەوتەکانی خزمەت وە ئاوارەکان و پرسی کوردان دەکا یان نا بەڵکە گرنگ ئەوەیە پێچەوانەی بەرانبەرەکەی بوەستی و خەڵکی ناڕازیی لە خۆی خڕبکاتەوە!
• (یەکێتی) لە رێی خۆنواندنە شانۆگەرییەکانی (کۆسرەت و بەرهەم و عیماد) لە نێو ئاوارەکان و کردنی قسەی گەورە سەبارەت وە پرسی کوردانی رۆژئاوا کە هێندێک جار وە لای پارتی و هێندێک جاریش وە لای (گۆڕان)دا وەردەسووڕێ.. ئەویش دەیەوێ وە پێی سیاسەتە پووچەکانی خۆی وە جۆرەک لە جۆرەکان بازرگانیی وە پرسەکەوە بکا!
• (نێچیروان) وەک ئەوەی پارەی حکومەتی وە کرێکاریی خۆی پەیدا کردبی یان وە میراتیی لە بابیەوە بەجێمابێ.. وە ناوی خۆی پارە وەسەر ئاوارەکان و حیزبە بەکرێگیرایەکانی خۆرئاوا – کە لایەنگری پارتی و یەکێتین – دابەش دەکا!
• (تەلەفزیۆنە ئاست نزمەکەی زاگرۆس) کە خودی خۆی بە گەندەڵیی و بودجەی دزرای میللەت بەڕێوەدەچی.. کەمپین لۆ خڕکردنەوەی کۆمەک دەکا لۆ ئاوارەکان، بێجگە لەوەی کۆمەکەکە لە لایەن خەڵکەوەیە و تەنانەت چادرەکانیش لە لایەن رێکخراوە نێودەولەتییەکانەوە دابین دەکرێن.. کارگوزاریی و خەرجیی خڕکردنەوەی کۆمەکەکەش لە رێی دەزگە و ئامێر و کارمەندانی حکومەتەوە ئەنجام دەدرێ کە تێکڕای مولکی میللەتە، کەچی خۆی کردیتە خاوەنی کەمپینەکە و وە نەتەوەپەروەریی و نیشتیمانپەروەریی وە خەڵکی دەفرۆشی و هاوکات پاگەندە لۆ سیاسەتە بازرگانییەکەی پارتی و بارزانیش دەکا!
• (رێکخراوەکانی وە ناو کۆمەڵگەی مەدەنی) کە زۆربەی هەرە زۆریان سەر وە حیزبەکان و دەسەڵاتدارانەوەن یان هەر راستەوخۆ بەکرێگیرا و کاسەلێسی کەسانی نێو دەسەڵاتن.. ئەوانیش هەر یەکەو وە جۆرەک بازرگانیی بە کێشەکەوە دەکەن کە بتوانن پارووی چەورتری پێ پەیدا بکەن و هاوکات بە کوردایەتییش بە خەڵکی دەفرۆشنەوە!
• کەسانەکیش هەن پێیاندەگوترێ (رۆشنبیران و میدیاکارانی ئازاد)، ئەوانە زۆر سەیرن! لە روانگەیەکی هێندە تەسک و کۆن و داڕزای کوردایەتییەکی رەگەزپەرستانە بانگەشە لۆ هەستی نەتەوایەتیی و نیشتیمانی دەکەن سەبارەت بە ئاوارەکان و پرسی کوردانی رۆژئاوا.. لە بیریان چووە هاریکارییکردنی ئاوارەکان – کە لە ترسی لەدەستدانی گیانیان رەویان کردییە – پێش هەر تشتەک ئەرکەکی مرۆیی و رەوشتییە.. تەنانەت هێندێکیان دەیانەوێ وەک چار لایەنە کەوا سۆرەکەی بەر لەشکری داگیرکەری حکومەتی دڕندە و داگیرکەری ئیسلامی ئێران – یەکێتی و پارتی و سۆشیالیست و ئیسلامییەکان – کە پێش کیمیابارانی هەڵەبجە رێیان لە خەڵک گرت شارەکە بەجێبهێڵن و بەو شێوە کارەساتبارە کیمابارانەکە لەنێویبردن.. وە هەمان شێوە سنوور لە کوردانی رۆژئاوا دابخەن.. بیانگە دژەمرۆییەکەشیان ئەوەیە کە گوایە ئەگەر ئەو هەموو کوردە رەو بکەن ئەوە رابوونی کوردانی ئەوێ شکست دەخوا و دوژمنان باڵادەست دەبن لەوێ!!!
• لە هەمووشی عەنتیکەتر (مەلایەکان)ن! ئەوانیش وە هۆی ئەو کێشەیەوە بازاڕیان گەرم بووە و بە ناوی دینەوە بەر سەکۆیەکانیان قەڵەباڵغ بووە و سەر تەلەفزیۆن و پانتایی دەزگە میدیاییەکانیان لێ داگیر کردینە و هەر یەکەیان لە بن باڵی حیزبەک و بەرپرسەکەوە ژەهری ئیسلام دەرخواردی خەڵک دەدەن و قسەی عەنتیکە عەنتیکە هەڵدەبزوڕکێنن، لێ هیچیان ئەو ئازایەتییە لەخۆڕانابینن بتوانن ئاماژە بەوە بکەن کە یەکەک لە هۆیە هەرە کاریگەرەکانی ئەوەی کە چەوسانەوەی کوردانی رۆژئاوا و ئەو ئاوارەبوونەی هەنووکەیان لێ وەبەرهەم هاتییە ئیسلام و هاومەزهەبەکانی خۆیانن کە کوردان وە کافر دادەنێن و بەوپەڕی دڕندەیی دژ وە مافە نەتەوەییەکان و سەربەخۆیی کوردستان دەجەنگن!
بە بێ گومان کەسانەک و حکومەتەک کە سەروەت و سامانی زۆروزەبەندی گەل دەدزن تا ئێستا نەیانتوانیبی یان راستترە بێژین نایانەوێ تەنانەت خزمەتی ئەو هاوڵاتییانە بکەن کە لە بن دەسەڵاتی خۆیاندان و لەوەتەی ئەوان دەسەڵاتدارن بە سەدان هەزار کەس بە هۆی برسیێتیی و بێکاریی و بێ دادیی و نەبوونی ئازادییەکانەوە ئاوارەی وڵاتان بوونە و بە سەتانیان لە رێی هاتونەهاتی سەرسنووران و نێو دەریایان گیانیان لەدەست دا.. ئەگەر هەنووکەش چوونەدەر و وەرگرتنی ئاواران لە وڵاتانی رۆژئاوا ئاسان بی ئەوە زۆربەی هەرە زۆری گەنجان وڵاتەکەیان لۆ چۆل دەکەن، هەر ئەو رەفارانەیان لێ چاوەڕوان دەکرێ کە بەو جۆر و شێوە و شێوازانەی سەرێ خزمەتی ئاوارەکانی خۆرئاوا بکەن!!!
