سوێی عیشق

2010به‌ندی عه‌لی

ئالووده‌م ئه‌کا چاوی .. به‌تلیاکی ئه‌شکی ڕوون

ئاسووده‌م ئه‌کا ناوی .. کاتێ ئه‌گاته‌ به‌رگوێم

ئه‌میان شه‌رابی روحه .. ساته‌وه‌ختی فه‌نابوون

ئه‌ویان زایه‌ڵه‌ی زه‌نگی .. زه‌نگوڵه‌ی دڵی به‌سوێم

ئازارم ئه‌دا زاری .. به‌ندی له‌داوی شه‌رما

بێزارم ئه‌کا ئاخی .. ناخی تێری له‌ئازار

پڕ نازم ئه‌کا ڕازی .. هه‌ڵوه‌ریوی به‌سه‌رما

به‌نیازم ئه‌کا لێوی .. به‌وه‌سڵی فه‌سڵی به‌هار

بیمارم ئه‌کا خاری .. بێ قه‌راری موژانی

کاتێ له‌ساتی خه‌وا .. ئه‌بن به‌حارسی ڕێ

خۆشبه‌ختم وه‌لێ وه‌ختێ .. سپێده‌ی ده‌م به‌یانی

که‌دووباره‌ شکۆفه‌ی .. چاوی مه‌ستی ئه‌پشکوێ