سه‌رابه‌کان له‌یه‌ ئه‌چن

به‌ندی عه‌لی .. 2011

ڕه‌شه‌باکان له‌یه‌ک ئه‌چن

هه‌نێکیان هارو بێ عارو ئاژاوه‌چی

هه‌نێکیان سه‌رکزو شه‌رمن

به‌ڵام ، هه‌ردوو

خۆڵ ئه‌که‌نه‌ چاوی شینی

سایه‌قه‌ی ساماڵی ئاسمان

وه‌ هه‌ردووکیان

ڕه‌وشتی قه‌له‌ڕه‌شکه‌یان هه‌یه‌و

ئالووده‌ن به‌دزی و درۆ

به‌ته‌فره‌دان

دووپشکه‌کان له‌یه‌ک ئه‌چن

له‌کلتووری پێوه‌دانا

ئه‌گه‌رچی هه‌نێکیان سوورن

یان قاوه‌ییه‌کی زه‌ردباو

یاخود .. ڕه‌شن

به‌ڵام ته‌بعی خۆیان وایه‌

بێ نمه‌ک و فرسه‌ت په‌رست

له‌داب و نه‌ریتی غه‌دریشا

هه‌موو ڕه‌نگه‌کان ، هاوبه‌شن

ئێمه‌ش هه‌موو ، له‌یه‌ک ئه‌چین

ئێمه‌ی ماندوو له‌هه‌ڵزنان

به‌که‌مه‌ری کێوه‌ لووسه‌کانی هزرا

ئێمه‌ی عه‌واڵ

به‌ده‌ست مناڵه‌ لاساره‌کانی سۆزه‌وه‌

ئێمه‌ی سه‌رقاڵ

به‌خوێندنه‌وه‌ی نامه‌ باڵداره‌کانی خه‌یاڵ

ئێمه‌ی نغرۆ تاکو بینه‌قاقای مێژوو

له‌گۆمه‌ مه‌نگه‌کانی وه‌هما

ئێمه‌ی مرۆڤه‌ ساده‌کان

ئێوه‌ش هه‌موو له‌یه‌ک ئه‌چن

له‌پێچانه‌وه‌ی سیگاره بۆنداره‌کانی درۆیا

له‌پێدانی گوڵه‌ نایلۆنه‌کانی وه‌فا

به‌حه‌بیبه‌ ڕه‌ش پۆشه‌کانی نیشتمان

له‌به‌خشینه‌وه‌ی نانه‌ سووره‌کان به‌خوێنی

فه‌رهاده‌ گیان بازه‌کانی ڕێبازی عیشق

له‌هه‌ڵدانی نوقڵه‌ تاڵه‌کانی به‌رات

بۆ زه‌ڕنه‌قوته‌کانی گه‌ڕه‌ک

که‌باوانیان به‌سه‌ر داری ئازادیه‌وه

به‌به‌ر چاوانی ئێوه‌وه‌‌

به‌ساچمه‌ی ڕاوچی‌ پێکران

به‌ڵێ ئێوه‌ش له‌یه‌ک ئه‌چن

ئێوه‌ی مرۆڤه‌ شازه‌کان