ساقی
ساقی به فیدات بم وه‌ره‌وه
شه‌وانی ته‌نیایم پڕکه له نوری خۆت
بمبه‌ره‌وه بۆ ئه‌و به‌یانیانه‌ی به‌ر له‌وه‌ی یاخی بم
شه‌رمم ده‌کرد پێت بڵێم خۆشمه‌ده‌وێیت ئه‌ی یار
ساقی
له نێوان خۆشه‌ویتی و ڕقدا
مه‌رگ و له دایک بووندا
حوزن و شاگه‌شکه‌بوندا
فڕین و شکست بوندا
خوێن و ئاشتبونه‌وه‌دا
وه‌یل و زه‌مهه‌ریره‌دا
پاکی و خیانه‌تدا
راوچی و بالنده‌دا
فیراق و ژوانه‌دا
خه‌ون و بێداریه‌دا
کڕنوش و نه‌فره‌ت بونه‌دا
فێرمکه چۆن عه‌شق بکه‌م…
ساقی له پێکێکدا فێرمکه چۆن له کوده‌تاکانی ڕاوچی بگه‌م
چۆن له فیتنه‌کانی عه‌قڵ تێبگه‌م
فێرمکه چۆن به‌بێ شه‌رم له بازاڕی سۆزانیه‌کاندا خۆم ڕوت که‌مه‌وه
چۆن به پێی خاوس به‌سه‌ر پشکۆی ئاگره‌کاندا ڕابکه‌م و هه‌ست به سوتان نه‌که‌م
چۆن له سه‌حراکاندا هه‌ست به نامۆی نه‌که‌م
چۆن له چه‌خماخه‌ی شمشێره‌کاندا بریندار نه‌بم
چۆن دلم رابهێنم بیری نه‌کات
چۆن له شه‌وه‌کانی ده‌یجور یه‌ڵدادا به ئارامی بنووم
ئاشنامکه چۆن بیابانه‌کان وا لێبکه‌م تینو نه‌بن
ئاسمان رابهێنم بێ ترێفه‌ی مانگ بدوێت
چۆن به چۆله‌که‌کانی سوبحده‌م بڵێم ئاوه‌زه‌کانیان بگۆڕن به سرودی مه‌رگ
ساقی……
وه‌رزی بارینی رقه
ساتی شکاندنی هه‌موو په‌یکه‌ره‌کانی په‌روانه‌یه
ڕۆژگاری هه‌ڵکێشانی باڵه‌کانی په‌پوله‌یه
ساڵی دڕاندنی کراسه‌کانی شه‌معه
زه‌مه‌نی روخاندنی ته‌لاره‌کانی دڵه
ساقی………..
ڕقم له شه‌قامه‌کانی ڕوناکیه و تامه‌زرۆی کۆڵانه تاریکه‌کانم
هه‌ست به کسپه کسپی فیراق ده‌که‌م
بۆنی سوتانی جه‌نگه‌ڵه‌کان له‌هه‌ناسه‌م دێت
ئه‌وةتا ده‌روێشه‌کانی زیکر له بری کڕنوش گاڵته‌یان به خواکان دێت
له‌جیاتی خۆشه‌ویستی بانگه‌شه‌ی ڕق ده‌ده‌ن
هاوه‌ڵانی مه‌سیح به‌دوای خاچێکی گه‌وره‌تردا ده‌گه‌ڕێن
هه‌ر شمشێره‌و تینوی خوێنه
هه‌موو ئاسمانه‌کان بێزارن له مانگ و ئه‌ستێره‌و خۆر
هه‌رضاوه‌و به‌رائه‌تی خۆی ده‌کات له نیگایه‌ک
هه‌ر لێوه‌و تف له ماچ ده‌کات
هه‌ر جه‌لاده‌و خۆی پڕچه‌کده‌کاته‌وه
ڕۆژگاری یاخی بونه و مه‌یخانه‌کان پڕ ده‌بنه‌وه له ده‌روێشه‌کانی ته‌نیای
هۆڵه‌کانی سه‌ما ده‌بنه وێرانه
ئاسمانه‌کان هه‌ڵده‌وه‌رێن
وه‌رزه‌کانی ساڵ ده‌بنه خه‌زان
ساقی. …………
چیدی مارشاله‌کانی شه‌و ناگه‌ڕێنه‌وه
مانگ شاهیده ..ئاسمان شاهیده خوا شاهیده
پێم ده‌ڵێت ڕقم لێته ڕقم لێته
ساقی دوا جار پێت ده‌ڵێم ……….
ساقیه هاتومه‌وه له‌زیکرو تۆبه چومه‌وه
ساقی له مه‌ستیدا بمکوژه تا به ئارامی بمرم
هه‌سته‌کانم بێ ئاگا که تا چیتر بۆنی گووڵ نه‌که‌م
لاڵم که تا پێی نه‌ڵێم خۆشم ده‌وێیت ئةی یار
دڵم ڕۆحم جه‌سته‌م لێواو لێو که له شه‌راب
تا ئه‌وساتانه‌ی پێی وتم ڕقم لێته
من پێی بڵێم ئێستاش خۆشم ده‌وێیت ئه‌ی تاقانه ترین یار
خۆشم ده‌وێیت ئه‌ی یار
سەریاسى
