رێکخراوی چاوی ئەمڕۆ کە ئۆفیسی سەرەکی لەشاری ھەولێرە، ئەمڕۆ لە راگەیاندراوێکدا بۆ دەزگاکانی راگەیاندن، ھۆشداری دەداتە ئەو کەناڵە راگەیاندنانەی کە بەرنامەی کاری خێرخوازی پێشکەش دەکەن و لەم رووەوە شکۆی تاکی کوردو خێزانەکانی پێوەدەشکێندرێت”.
لە لێدوانە رۆژنامەوانیەکەدا ھاتووە” چەند بەرنامەیەکی تەلەفزیۆنی خێرخوازی، بوونەتە مینبەر بۆ شکاندنی شکۆ و کەسایەتی تاکی کورد! رێکخراوەکەمان (چاوی ئەمڕۆ…بۆ چاودێری کاری رۆژنامەوانی) بە وردی چاودێری پڕۆسەی کاری رۆژنامەوانی دەکات و ھەموو جۆرە پێشێلکارییەک لای خۆی تۆمار دەکات و دەیگەیێنێتە لایەنی پەیوەندیدار، لەم رووەوە دوای چاودێری کردنمان، بۆمان دەرکەوت چەند کەناڵێکی تەلەفزیۆنی ئاسمانی لە رێگەی بەرنامەی (خێرخوازی)یەوە شکۆ و کەسێتی تاکی کورد تێکدەشکێنن، پێشێلکاریەکان بە بەڵگەوە لەلامانە و لە ناو راپۆرتی وەرزی و راپۆرتی ساڵانەمان جێگیر دەکرێت بە ھێنانی ناوی تەلەفزیۆنەکە و بەرنامەکە و خاوەنی کەناڵەکەش..ئێمە پێمان وایە کاری خێرخوازی ئەم جۆرە بەرنامانە (فی سبیل اللە ) نییە! بەڵکو مەرامی سیاسی و حزبی و ئایدیۆلۆژی لە پشتەوەیە، پێشێلکارییەکی زەقە لە کاری رۆژنامەوانی پیشەییانە، ئەگینا خێر کردن و ھاوکاری کردنی خەڵک بەبێ راگەیاندن و پیشاندانی کەسە ھەژارەکە خێری راستەقینە و ھاوکاریکردنێکی مرۆڤدۆستانەیە”.
ھەرلەم لێدوانە رۆژنامەوانیەدا نمونەی ئەوە ھێنراوەتەوە کە “لەم بەرنامانەدا باوکێک نەخۆشە و پێویستی بە ھاوکاری ھەیە منداڵە بچوکەکانی دەھێننە سەر شاشەی تەلەفزیۆن و بە ھەنسک و گریان و پاڕانەوە نیشانی دەدەن؟! ھاوسەرەکەی بە گریان و پاڕانەوە و بێ ئەوەی دەموچاوی بشارنەوە لەسەر شاشەکانیان نیشانی دەدەن! وتەیەکی کوردەواری دەڵێ: (چاکە بکە و بیدە بە ئاوا) بەڵام ئەم جۆرە بەرنامانە پێچەوانەی ھەندێ نەریتی جوان و ئەرێنی کوردەواریشە”.
چاوی ئەمڕۆ…. بۆ چاودێری کاری رۆژنامەوانی، راشیدەگەینێت کە “ئێمە لە رێکخراوی (چاوی ئەمڕۆ) ئەم جۆرە بەرنامانە بە پێشێلکاری کاری رۆژنامەوانی پیشەییانە و مافی مرۆڤ لەقەڵەم دەدەین، داواکاریشین لە حکومەتی ھەرێم و وەزارەتی رۆشنبیری و وەزارەتی کاروباری کۆمەڵایەتی و سەندیکای رۆژنامەنووسان بە ئەرکی خۆیان ھەڵستن و لێپێچینەوە دەرھەق ئەم جۆرە بەرنامە و تەلەفزیۆنانە بکەن و ئەم شێوازە لادانە لە کاری رۆژنامەوانی و پێشێلکردنی مافی مرۆڤ بوەستێنن”.
دەستەی راپەڕاندن- چاوی ئەمڕۆ…. بۆ چاودێری کاری رۆژنامەوانی
رێکخراوەی چاوی ئەمڕۆ: ھۆشداری دەداتە ھەندێک کەناڵی راگەیاندن لەسەر شکاندنی شکۆی تاکی کورد
