مەسعودى مەلا هەمزە : دواى تەواوکردنى قۆناغى خوێندنى ئەکادیمیاى هونەرەجوانەکان، دەرهێنەرى بوارى شانۆ “رۆژگار کەریم رۆژ” سەرقاڵی نوێترین کارى خۆیەتى. شانۆگەرى “دۆڕاوەکان” لە نووسینى بەرزان فەرەج و ئامادەکردن و دەرهێنانى رۆژگار کەریم رۆژ، بەرهەمى بەڕێوەبەرى گشتى رۆشنبیری و هونەر- بەڕێوەبەرایەتى هونەرى شانۆی هەولێرەو بە هاوکارى تیپی شانۆی تیشک نمایش دەکرێ.
رۆژگار کەریم دەرهێنەرى کارەکە لە لێدوانێکیدا گوتى: ئێمە وەکو تیپی شانۆی تیشک بەردەوام هەوڵمانداوە کار لەدەقی جیهانى بکەین، بەڵام ئەو دەقە کە کوردییە هەست دەکەم نووسەر توانیویەتى بەشێوەیەکى جوان و لە ئاستى دەقە جیهانییەکان مامەڵەى لەگەڵدا بکاو بینووسێتەوە، بۆیە بڕیارماندا کار لەو دەقە کوردییە بکەین”.
رۆژگار گوتیشی: “لە ئێستادا دەستمان کردووە بە قۆناغە سەرەتاییەکانى کارکردن لەو شانۆییە، کە هەریەک لە”هێرۆ مەولودى، سەرکەوت عەبدولرەحمان، رەزا عوسمان” وەکو ئەکتەر لە کارەکە بەشدارن، هەمیشەش حەزمکردووە وەک دەرهێنەرێک کار لەسەر تواناو جووڵەو جەستەى ئەکتەر بکەم”.
شایانى باسە رۆژگار کەریم رۆژ شانۆگەرى ماڵئاوایی شاعیرانى وەکو تێزى دەرچوونى نمایشکردو پلەى ئافەرینیشی بەدەست هێنا، لە رابردووشدا شانۆگەرى کورسییەکانى لە شارى هەولێر نمایشکردو پێشکەشی رۆحى هونەرمەندى جوانەمەرگ ئەردەلان بەکری کرد.
