دوای ئەوەی لەهەفتەی رابردوو هونەرمەندی بەئەزموونی بواری شانۆ و درامای کوردیی مامۆستا (تەها خەلیل) ماڵئاوایی لێکردین و بەیەکجاری جێی هێشتین، کە بۆ ئێمەی هونەرمەندان بە کارەساتێکی گەورەو لەهەمان کاتدا بە زیانێکی گەورە بۆ درامای کوردیی دەژمێردرێت.
لەکاتێکدا من ئەو روونکردنەوەیە رادەگەینم، هەروەک لای هەمووان ئاشکرایە مامۆستا (تەها خەلیل)ـی کۆچکردوو، یەکێک بوو لەو ئەکتەرانەی کە رۆڵی سەرەکی هەبوو لە زنجیرە درامای (رەیحانە) کە ئێستا لە قۆناغی وێنەگرتن دایەو، بەرهەمی کوردستان tvیە.
بەهەر حاڵ لەدوای کۆچی دوای هونەرمەند (تەها خەلیل) لای هەندێک کەسەوە، بەتایبەتی لەلایەن زۆربەی راگەیاندنەکانەوە پرسیاری ئەوەمان ئاڕاستە دەکرێت، گوایە ئەو رۆڵەی بۆ هونەرمەندی کۆچکردوو دانرابوو، هەڵدەوشێتەوەو کەسێکی دیکە لە جێگای ئەو کاری نواندن ئەنجام دەدات، بەڵام لەراستی دا وانیە چونکە هونەرمەندی کۆچکردوو مامۆستا (تەها خەلیل) ئەو رۆڵەی هەیبوو، کە بریتی بوو لە کەسایەتی (کوێخ فەرەج) لە زنجیرە درامای (رەیحانە)ـدا، بەشێکی زۆری کە دەکاتە لە 95% رۆڵەکەی خۆی بەرجەستە کردووە، تاوەکو چەند رۆژێک بەر لەمردنی هەر لەگەڵمان بوو کاری نواندنی خۆی بەشێوەیەکی چاک ئەنجام داوەو هیچ گرفتێک لە رۆڵەکەی ئەودا نیە.
بۆیە من وەک دەرهێنەری ئەو زنجیرە درامایە بە جەماوەری هونەردۆستی کوردستان و ئەو کەس و شوێنانەی پرسیاریانەی کردووە رایدەگەینم، رۆڵەکەی هونەرمەند (تەها خەلیل) لەدراماکە ماوەو نیشانی بینەرانیش دەدرێت و هیچ گرفتێک نیە لەمبارەیەوە، بۆیە من بەدڵنیایەوە رایدەگەینم هیچ گرفتێکمان نیە، بەڵام جارێکی تر رایدەگەینمەوە بەداخەوەیەن بۆ کۆچی دوای ئەو هونەرمەندە گەورەیە، رێز لە هەموو کارێکی ئەو مامۆستا جوانە دەگرین و لە درامای (رەیحانە)ـشدا هونەرمەند (تەها خەلیل) جوانترین رۆڵی بەرجەستە کردووە، لەداهاتووشدا پەنا بەخوا بەچای خۆتان دەیبینن.
لوقمان غەریب
دەرهێنەری زنجیرە درامای رەیحانە – سلێمانی
