بەرێوبەراییەتى گشتى رۆشنبیرى و هونەرى سلێمانى و بەرێوبەراییەتى رۆشنبیرى دەربەندیخان رێکەوتى (10-11-12/10/2010) ڤیستیڤاڵى شانۆى سەر شەقامى بە بەشداریکردنى بەرێوەبەراییەتیەکانى (گەرمیان، هەڵەبجە، رانیە، چەمچەماڵ، کۆیە) و بە بەشدارى گروپ و تیپە هونەرییەکانى (ووڵاتى ئێران، هەولێر، سلێمانى، کەرکوک، بابل) بەرێوەچوو.
گروپى گەنج بۆ شانۆ تاکە گروپى هەولێر بوو، کە بەشدارى ڤیستیڤاڵى ناوبراوى کرد بە شانۆگەرى (هێشتا قسەمان ماوە) بیرۆکەکەى لە دەقى شانۆیى (مەرگ و پاکیزەیى) نوسەر (ئیریەل دورفمەن)ى چیلیى وەرگیراوە و (کارۆخ ئیبراهیم) دایڕشتووە و (ئاشتیڤان سەلام) کارى دەرهێنانى جێبەجێ کردوە، مەبەست لە بەشداریکردنمان بۆ زیاتر بە گەڕخستن و گەرم و گوڕیەکیتر بوو بۆ ڤیستیڤاڵى ناوبرا و ئامادەیکیتریش بوو وەک گروپێکى ئەکتیڤ و چالاک، سەرەڕاى ئەوەى ئێمە دەستخۆشى لە هەموو هەوڵێک دەکەین و پێشوازى لە گشت هەنگاوێکى جددى و کاریگەر دەکەین، لەگەڵ ئەوەش دەبینە پاڵپشتیەکى پتەو بۆ شار و شارۆچکەکانى کوردستان بۆ سەرخستنى هەوڵەکانیان، بەو مانایەى ئێمە جگە لە دەستخۆشى بۆ بەردەوامى و دیاریکردنى خاڵە نێگەتیڤەکان بۆ دووبارە نەبوونەوەیان دەکەینە ئامانج و قسەى لە بارەوە دەکەین، بۆیە وەکو راگەیاندنى گروپى گەنج بۆ شانۆ، بە پێویستمان زانى ئەم روونکردنەوەیە بدەین و لە چەند خاڵێک کۆیان بکەیەنەوە:
1- شانۆگەرى (هێشتا قسەمان ماوە) بیرۆکەکەى لە شانۆگەرى (مەرگ و پاکیزەیى) وەرگیراوە، (کارۆخ ئیبراهیم) دایڕشتوەو بۆ کارى شانۆیى سەرشەقام، کەچى لە دەلیلى ڤیستیڤاڵ، وەکو نوسەر ناوى کارۆخ هاتووە، کەچى تەنها دایڕشتووە و نوسەرى چیلى (ئیریەل دەرفمەن) خاوەنى بیرۆکەکەیە، بە داخەوە ناوى کارۆخ لە هەڵەیەکى چاپ وەکو نوسەر هاتووە.
2- دیاریکردنى لێژنەى دادوەرى ڤیستیڤاڵ تەنها لە ناوچەیەکى دیاریکراو، دواتر هەڵبژاردنیان بۆ پێوەری کردنى کارە بەشداربوەکان لە جێگاى خۆى نەبوو، ئەوەش وا دەکات گروپى گەنج بۆ شانۆ دەرئەنجامەکانیان ئەوەندەى بە رایەکى زاتى سەیر بکات ئەوەندە وەکو رایەکى زانستى و رەچاوکردنى پێوەرە زانستیەکان سەیر ناکات، بۆیە ئەنجامى کۆتایى رەت دەکەینەوە، بە هۆى ئەوەى نەتوانرا ئەو خاڵانەى لە مەراسیمى کۆتایى کردبویانە پێوەرێک بۆ باشترین کارەکان جێبەجێى نەکەن و تەنها قسەى سەر زارەکیان بێت، جگە لەوەش بەرێز (بەشار عەلیوى) یەکێک بوو لە ستافى تیپى شانۆیى حلە و لە هەمان کات ناوى وەکو ئەندامى لێژنە دادوەرى هاتووە.
3- هەڵەى مەنهەجى زۆر لە پەیام و ووتەى ڤیستیڤاڵ بە دى دەکرا، هەر لە جۆرى پێناسەى شانۆى سەرشەقام و نەبونى دیاریکردنى ئامانج و مەبەستى ڤیستیڤاڵ و دواتر بەکارهێنانى چەندین دەستەواژەو هەڵەى زەق لە نێو ووتەى ڤیستیڤاڵ، ئەمەش دەگەرێتەوە بۆ لێژنەى هونەرى ڤیستیڤاڵ.
راگەیاندنى گروپى گەنج بۆ شانۆ
14/10/2010
