ئەو بارودۆخەی ئێستای رۆژئاوا ماوەی چەند مانگێکە درێژەی هەیە، لێ بەپێی پلانێکی داڕێژراو لەلایەن نەیارانی کورد، هێرشەکانی سەر ناوچە کردیەکان چڕتر کراونەتەوە. من پێموایە هەتا رێگایەکی گەیاندن هەبێت لە نێوان هێزەکانی پ.ک.ک. و ناوچەکانی رۆژئاوا لەلایەك، خۆ دوورگرتن لە کێشە لەگەڵ رژێمی ئەسەد لەلایەکی دیکە، پاراستنی ئەو ناوچانە تا رادەیەك مسۆگەرە. ئینجا ئەوەی جێگای سەرنجە، ئەو بانگێشتەی دوایی پ.ی.د. و بانگێشتی موراد قەرەیلان بۆ بەهاناوەچوون و پشتگیریە لە هیزەکانی رۆژئاوا.
لێرەدا چەند پرسیارێك دێنە پێش، ئایا پ.ی.د. بە هاوکاری پ.ک.ک، هیچ خۆئامادەکردنێکیان نەبووە بۆ پێشهاتەیەکی لەو جۆرە! من دڵنیام لەوەی، بەڵێ، پێشتر پلانڕێژیی و ئامادەکاریی بۆ هەر پێشهاتەیەكی لەو جۆرەدا کراوە. پێموایە ئەوەی ئێستا دەگوزەرێت، هیچ نیە لەچاو ئەوەی چاوەڕوان دەکرێت لە داهاتوو رووبدات.
کەواتە، ئەو بانگەوازی پشتگیریە لەلایەن پ.ک.ک و هێزەکانی رۆژئاوا زیاتر بۆ ئەوە بوو کە تۆپەکە بخەنە نێو یاریگای الپارتی و پ.د.ک. ، تا بزانن چۆن یاری پێدەکەن و بەرەو کام ئاراستەی دەبەن. واتا ئیحراج کردنی الپارتی (کە بە حیساب لە رووی هێزەوە لە پلەی دووەم دێت لە رۆئاوا) لە لایەك و سەرۆکایەتی هەرێمی کوردستان، کە پ.د.ک. بریاردەری یەکەمە، لەلایەکی تر. الپارتی خاوەندارێتی لە هێزێك دەکات کە لە چەند سەربازگەیەك لە ناوچەی بادینان جێگیرن، ئێستا لە دەرەوەی ئەو بەربەرەکانیەی نێوان کورد و گروپە ئیسلامیەکاندان لە رۆژئاوا. الپارتی وەڵامی بانگێشتەکەی پ ی د یان داوەتەوە بەڵام بە مەرج، مەرجی بەشداری لە دەسەڵات، کە پ.ی.د. رازی نەبووە و ناشبێت تا رۆژی ئەمڕۆ. جارێ الپارتی بەو هێزانەی کە هەیەتی لە چاوەڕێی هاتنەدەی خەونەکانیان دان، بەوەی کە رژێمی ئەسەد کۆتایی دێت و سەراپای سوریا دەکەوێتە ژێر دەستی گروپە چەکدارە ئیسلامیەکان و ئۆپۆزیسیۆن بە گشتی. ئەوکات پ.ی.د. بە ناچاری ئەو هێزانەی الپارتی، بە پاڵپشتی ئەو هێز و چەکە قورسانەی بۆیان دابینکراوە لەلایەن پ.د.ک، دێنێتە ناو خاکی رۆژئاوا و بەشداریان پێدەکات لە دەسەڵات و بەرێوەبردن. بۆ خۆیان لێیان پاڵداوەتەوە، بە فیتی هەندێك لایەنی سیاسی ناوەکی و دەرەکی دەجولێنەوە و ئەو خەونانەش دەبینن.
هەرچی هەڵوێستی هێز و لایەنە سیاسیەکانی هەرێمی کوردستانە، جۆراوجۆرن. بەگشتی زۆربەی لایەنە سیاسیەکانی هەرێم، هەڵوێستیان ئەرێنیی بووە، پارتە ئیسلامیەکان نەبێت. هەڵوێستی گۆڕان و یەکێتی وەکو هێزی دووەم و سێیەمی هەرێم، پشتگیریە، لێ نازانین ئەگەر بێتە سەر پراکتیك چۆن دەبێت! ئەوکات زیاتر رەچاوی یاسا نێودەوڵەتیەکان دەکەن، یان گیانی کوردایەتی دەیانجولێنێت. گۆران خۆی یەکلایی کردەوە، گوتی من بزوتنەوەیەکی سیاسی بێ چەکدارم، بەڵام لە لایەنی مەعنەوەیەوە پاڵپشتیتان لێدەکەم. یەکێتیش لەسەر زاری چەند بەرپرسێک پاڵشتیی خۆیان نیشان دا. هەرچی هەڵوێستی پ.د.ک، وەك پێشتر، مەرج دانانە بۆ پ.ی.د. ئەو مەرجانەش چ جار لەلایەن پ.ی.د. ەوە پێشوازیان لە نەکراوەو ناشکرێت. لە هەمان کاتدا تورکیاش دەوری خۆی دەگێرێت لەو سەینوبەینەدا. کەواتە پ.د.ک. پاڵپشت و هاوکار نابێت بۆ هێزی یەکینەکانی پاراستنی گەڵ لە رۆژئاوا، بەوەی لە روانگەی پارتیەوە، پ.ی.د. تاکرەوانە دەسەڵاتی رۆژئاوای کونترۆڵ کردووە بۆ خۆی.
لە هەموو حالەتێکدا، پشتگیریکردنی خەڵك و پاراستنی ناوچەکوردیەکانی رۆژئاوا، ئەرکە و لەسەر هەموو لایەن و هێزە سیاسیەکانی گۆڕەپانی کوردستانە هاوکار بن. فەرامۆشکردنیان، خزمەتکردنە بە بێگانە، چون لە کۆتاییدا زەرەر بە دۆزی رەوای گەل دەگەیەنێت.
ئەوەی لێرەدا مەوەتەوە بڵێم، خۆزگەیەك دەخوازم کە خۆزگەی هەموو کوردێکی خەمخۆرە. خۆزگە ئەو هێزە کوردیانەی سەرجەم پارچەکان، هێندەی خەریکی رکابەری یەکترن، ئەوەندە سەرقاڵی هاوکاریی و پشتگیری یەکتری بان. خۆزگە ئامانجێك هەموومانی کۆ دەکردەوە، ئەویش رزگاری بست بە بستی خاکی کوردستان و ئازادی تاك بە تاکی کۆمەلگەی کوردی لە ژێر زوڵم و زۆرداری.
هۆگر رەواندزی
کۆپنهاگن
2014-03-29
