دیسان ئاشووب

به‌ندی عه‌لی .. پاییزی 2011

دیسان گوێم له‌زه‌نگی مه‌رگه‌ ئه‌مشه‌و به‌ره‌و ئاوایی دێ

دیسان بۆنی خاکی ته‌ڕه‌و ژیان زینده‌ به‌چاڵ ئه‌کرێ

دیسان ته‌رزه‌ بارانی ڕق زریانی خوێن هه‌ڵده‌سێنێ

دیسان پشکۆیه‌کی نه‌فره‌ت دۆزه‌خێ داده‌گیرسێنێ

دیسان ده‌ستی سڕی پیلان به‌گۆهات و نه‌رمه‌ ئه‌مشه‌و

به‌چنینی جاجمی ئاشووبه‌وه سه‌رگه‌رمه‌ ئه‌مشه‌و

دیسان تۆوی فیتنه‌ ئه‌ڕژن تاڕێی ژوان پڕ جه‌خار بێ

نیگا مینڕێژ ئه‌که‌ن به‌ته‌م نه‌با گورزێکی خۆر دیار بێ

دیسان هه‌وار بوو به‌زه‌ریا ئێمه‌ش هه‌موو بووین به‌ماسی

به‌قولاپی کام قه‌هره‌وه‌ قه‌ده‌ر دڵمان هه‌ڵده‌واسی

قه‌هری بێ ئینسافیی ئاسمان له‌ژیان و له‌مردندا

یاخو قه‌هری غه‌دری ئینسان له‌به‌خشین و له‌بردندا