دۆزه‌خ

به‌ندی عه‌لی .. به‌هاری 2011

له‌ته‌نووره‌کانی دۆزه‌خا

شنه‌بای میهر هه‌ڵناکا

چ گێلیه‌که‌ ئه‌ی دڵ ، له‌وێ

له‌گه‌ڵ قامچی به‌ده‌سته‌کانی شه‌یتانا

به‌نیازی پیاسه‌یه‌کی ئێواران بی

گوڵه‌کانی دۆزه‌خیش

هه‌موویان هه‌ر یه‌ک ڕه‌نگیان هه‌یه‌

له‌ڕه‌نگی گڕ

چ گێلیه‌که‌ ئه‌ی دڵ ، له‌وێ

گوڵ بده‌ی له‌یه‌خه‌ی

پاسه‌وانه‌ دڵسۆزه‌کانی شه‌یتان

کانیاوه‌کانی دۆزه‌خیش

هه‌ر چۆڕاوی ده‌باخانه‌کانی جورمیان

لێ هه‌ڵئه‌قوڵێ

چ گێلیه‌که ئه‌ی دڵ ، له‌وێ

داوه‌تی شه‌یتان بکه‌ی

بۆ نۆشینی دوو پێک له‌ئاوی

روحی خۆت

ده‌روازه‌کانی دۆزه‌خیش

ته‌نیا به‌ڕووی

چوونه‌ ژووره‌وه‌یا ئه‌کرێنه‌وه‌

چ گێلیه‌که‌ ئه‌ی دڵ ، له‌وێ

پرسیاری ڕوخسه‌تی ده‌رچوون

له‌ده‌رگاوانه‌کانی شه‌یتان بکه‌ی

ئاسمانی بێ پایانی دۆزخ

هه‌میشه سوورباوی تۆخه‌

وه‌ک چاوه‌ سووره‌کانی هه‌ڕه‌شه‌

چ گێلیه‌ ئه‌ی دڵ ، له‌وێ

چاوه‌ڕێی غه‌مزه‌یه‌کی عیشق

له‌چاوه‌ تیله‌کانی شه‌یتان بکه‌ی

یاساو ڕێساکانی دۆزه‌خ

له‌حیبری گڕاویی تۆڵه‌و

به‌په‌ڕه‌مووچی ژه‌هراویی

سزاو ئه‌شکه‌نجه‌ نووسراون

چ گێلیه‌که‌ ئه‌ی دڵ ، له‌وێ

تکای مۆڵه‌تی یاخی بوون

بۆ روحه‌ تواوه‌کان بکه‌ی

چ گێلیه‌که‌ ئه‌ی دڵ ، له‌وێ

به‌خه‌یاڵی په‌ریه‌کانی به‌هه‌شته‌وه‌

چاوه‌کانت  .. بچنه‌ خه‌وێ