ده‌ڵێن له بیری كه
ده‌ڵێم پێم بڵێن چۆن ؟
له‌بیری كه‌م
كه‌من هه‌ر رۆژێ
سه‌رژمێری شاری دڵم ده‌كه‌م
هه‌ر یه‌ك كه‌سی تێدایه و هه‌ر یه‌ك كه‌س
هه‌ر یه‌ك كه‌س و به‌س
*******************
ده‌ڵێن وازی لێبێنه
ده‌ڵێم پێم بڵێن چۆن ؟
كه ئه‌و نه جگاره‌یه و
نه خواردنه‌وه كحولییه‌كانه و نه كۆمپانیا
كه ئه‌و نه به‌رێوه‌به‌رایه‌تیێكه و
نه هه‌ر ئیش و كارێكی دونیا
كه ئه‌و نه ڕه‌فتار و كردارێكی گێلانه‌یه
كه ئه‌و نه به دین و نه به خاك و نه به زوبان بێگانه‌یه
ئه‌و بۆ دڵ و گیان و جه‌سته‌ی من
بوو به هه‌ستی حه‌وته‌م
ئه‌و بۆ من بوو به هه‌وێنێك بۆ مانه‌وه
بوو به به‌رگری له له‌شم دژی بوونی ئازار و خه‌م
***************
ده‌ڵێن دوای وازهێنان ماوه‌یه‌كه و له‌بیرت ده‌چێ
ده‌ڵێم پێم بڵێن چۆن ؟
كه ئه‌و نه مردنه
نه له خۆدانه و نه شینه
كه ئه‌و نه ئاهه‌نگێكی هاوسه‌رگیرییه و
نه ئاهه‌نگێكی له دایك بوونه
كه ئه‌و نه ژه‌مێكه
نه ده‌مێك و نه خه‌مێك
كه ئه‌و نه خوله‌كێكه و نه كاتژمێرێك
نه مانگێك و نه ساڵێك و نه سه‌رده‌میك
ئه‌و له ڕؤژێكدا
هه‌موو وه‌رزه‌كانم نیشان ده‌دات
ئه‌و خێرای له خێرایی به‌ده‌ركه‌وتنی خۆردا زۆر زۆرتره
بۆیه هه‌ر زوو پێم ده‌گات
*********************
ده‌ڵێن به جێی بێله
ده‌ڵێم پێم بڵێن چۆن ؟
كه ئه‌و نه مندالیمه و نه رابردوو
كه ئه‌و نه ماله‌كه‌مه و نه شاره‌كه
ئه‌و نۆبه‌ره‌ی خه‌ونه‌كانمه و داهاتوو
ئه‌و ته‌مه‌نی ته‌مه‌نمه تاقه یاره‌كه‌م
**********************
ده‌ڵێن ته‌ركی كه
ده‌ڵێم پێم بڵێن چۆن ؟
كه ئه‌و نه پێنج پرسیاری تاقیكردنه‌وه‌یه
كه ئه‌و نه یاریێكی بیلیاردی دۆراندن و بردنه‌وه‌یه
كه ئه‌و نه جنێوه و نه شه‌ر
نه دوو ڕووییه و نه تێكبه‌ردان
كه ئه‌و نه درۆیه و نه كاری به‌دفه‌ر
نه خۆپه‌رستیه و نه ئازاردان
ئه‌و هێنده لام خۆشه‌یسته
پیرۆزه كردوومه‌ته نوێژی شه‌شه‌م
پێشم گووتووه تۆ كوژه‌ری منی
منیش عاشقی بوونت و ئه‌و چاوه ڕه‌شه‌م
ئارام 2010
