خۆم

به‌ندی عه‌لی .. 2012

خۆم

هه‌ر ئه‌مه‌وێ

ڕۆژێ فرسه‌ت له‌خۆم بێنم

تا دوو قسه‌ی له‌گه‌ڵ بکه‌م

ئه‌ویش تادێ

له‌نێو ئاپۆڕه‌ی ژیانا

وونتر ئه‌بێ

ئاخر ئه‌و له‌زه‌نگیانه‌ ئه‌چێ

له‌ئۆقیانێکی بێ بندا

ئاخۆ ئه‌ویش چه‌ند گه‌ڕابێ

به‌دوی مندا

خه‌یاڵ

زۆر تامه‌زرۆم ، خوا ببینم
یان هیچ نه‌بێ
گوێم له‌سۆلفێجی ده‌نگی بێ
ئاخر جۆرێک له‌قسه‌ هه‌ن
به‌میلۆدی و ڕیتمی دووان
ماناکه‌یان ڕوون تر ئه‌بێ
لێم ببوورن
ئه‌مشه‌و خه‌یاڵم مه‌ستێکه

هارو ‌به‌رباد
چونکه‌ له‌کۆنه‌ ده‌فته‌ری نۆته‌کانا
قریشکه‌کانی .. ئه‌نفالم
هاته‌وه‌ یاد