خۆت

به‌ندی عه‌لی ..2012

له‌خۆت زیاتر

که‌سێکی که‌ لێی تێناگا

شێوه‌زاری خه‌مه‌کانت

ده‌پێم بڵێ

به‌چ زمانێکی خه‌م ئه‌دوێی

ته‌نیا خۆت له‌به‌ری ئه‌که‌ی

بۆ به‌ری که‌سی که‌ نابێ

کراسی ئازاره‌کانت

ده‌پێم بڵێ

مارکه‌ی کراسه‌که‌ت چیه‌

هه‌ر به‌کۆڵی خۆته‌وه‌یه‌و

که‌سی که‌ بۆت هه‌ڵناگرێ

به‌ردی سزیفی ته‌نیایی

ده‌پێم بڵێ

ئه‌م گابه‌رده‌ بۆ کوێ ئه‌به‌ی

به‌هه‌ردوو ده‌ستی خۆت نه‌بێ

که‌سی که‌ نایکاته‌ ملت

بۆینباخی ڕه‌شی غوربه‌ت

ده‌پێم بڵێ

گرێی ئه‌م غوربه‌ته‌ که‌نگێ

ئه‌که‌یته‌وه‌

ئاشتبوونه‌وه‌

وه‌ره‌ ئه‌ی ژین ئاشت بینه‌وه‌

هه‌رچه‌نده‌ من

له‌وه‌ته‌ی هه‌م نێچیری تۆم

تۆ ڕاوچیه‌کی لاسار

هه‌رچه‌نده‌ من دێوانه‌م و

تۆ شه‌مێکی ته‌واو عه‌یار

هه‌رچه‌نده‌ من

که‌شتیه‌کی تێکشکاوی بێ چارۆکه‌م

تۆ ئۆقیانووسێکی بێ بار

هه‌رچه‌نده‌ من

گه‌ڵایه‌کی زه‌ردی وه‌ریوم له‌چڵی

دره‌ختی نیشتمانێک و

تۆ ڕه‌شه‌بایه‌کی سرک و هار

تۆ به‌سیحری بزه‌ی لێوت

که‌وه‌ک هی مۆنالیزایه‌و

من به‌جووتێ

چاوی پڕ له‌ئه‌سرینه‌وه‌

وه‌ره‌ ئه‌ی ژین ئاشت بینه‌وه‌