-1-
كه‌رووبارێك پێڵاوه‌كانی،
چووه ناو ده‌ریا
ئیتر قاچه‌كانی ونده‌كا..!
-2-
كه‌دارسنه‌وبه‌رێك جه‌سته‌ی
موتوربه‌كرد له‌په‌ڕی باڵنده،
ئیتر كڵاوه‌كه‌ی (با) ده‌یبا..!
-3-
كه‌تاریكی پشتی ده‌چه‌مێ،
خه‌تای گڕی مۆمێك نییه
خه‌تای ئه‌وه‌یه دڵی،
له‌لێدانی خۆر ده‌كه‌وێ..!
-4-
شۆڕه‌بی بۆیه ده‌له‌رزێ
له‌تاو هه‌ڕه‌شه‌كانی ره‌شه‌با نییه
له‌وه ئه‌ترسێ پێیه‌كانی،
له‌ناو ئاودا.. گه‌مه نه‌كا..!
-5-
مه‌رگ واته تك.. تك رژانی
ئێواره له‌ده‌ستی شه‌وا
تك، تك رژانی تیشك،
له‌باخی سێوێكا..
تك، تك رژانی هه‌ناسه،
له‌ره‌وڕه‌وه‌ی رۆحا..!
-6-
كه‌گیا كۆنگره ده‌به‌ستێ..
گفتوگۆ ته‌نها باسی كچێنی كێڵگه نییه،
كه‌بكوژرێ
گفتوگۆ حه‌شاردانی
گۆره‌ویه‌كانی پایزه،
له‌ماڵی چه‌مێ.
-7 –
دره‌خت كه‌خۆی ته‌فسیر ده‌كا،
ده‌مه داسی پرسیار،
به‌لقێكیا خۆی هه‌ڵناواسێ..
چونكه گیرفانه‌كانی پڕن،
له‌رازیانه‌ی باران و
ده‌سته‌كانیشی له،
جریوه‌ی تیشكدان..!
-8-
كه‌نیوه‌رۆیه‌ك مان له‌خورادن ده‌گرێ،
بیر له‌زاكیره‌ی نازناز ده‌كاته‌وه،
كه به‌چرپه‌ی زه‌رده‌په‌ڕ ده‌ڕووشێ..!
-9-
من ناتوانم عاده‌تێك،
تێكبشكێنم
كه‌گزنگ زه‌نگێ له‌ده‌رگاكه‌م ئه‌دا
ژووره‌كه‌م له‌خه‌و هه‌ڵده‌سێ و
ته‌پوتۆز گسك ئه‌داو
ده‌موچاوی ده‌شوا..!
-10-
شتێك نییه تا سه‌ر ئه‌به‌دی
شتێك گه‌وره‌تر نییه، له‌خۆشه‌ویستی
نه‌جادوو ئه‌وه ده‌كاو
نه‌په‌ڕ جۆ..
ئه‌و هه‌موو رق و كینه‌كان،
له‌سه‌رشانی به‌رئه‌داته‌وه‌و
داوای لێبوردن ده‌كا..!
-11-
عه‌جه‌ب له‌خه‌وتن،
كه‌خۆی ئیعراب ده‌كا..
كه‌سكون به‌هه‌نگاوه‌كانمه‌وه ده‌به‌ستێ،
ناهێڵێ هزرم باڵه‌فڕ بێ و
زیكرو ته‌هلیله‌شم شكۆفه..!
-12-
بۆ هه‌میشه شتێك رووده‌دات
له‌فرمێسكا ورده پێكه‌نین،
ده‌فڕێ به‌ئه‌سپایی
له‌ده‌مه‌قاڵه‌ی من و تۆشدا
ورده خه‌یاڵێك،
ده‌مه‌زه‌رده به‌ئاشتی..!
-13-
هه‌رده‌م ئاسمان پڕه له،
پێكه‌نینی شین، شین
چونكه باڵنده‌كان
له‌چاویلكه‌كه‌یا نیگه‌رانی ده‌سڕن!
– 14 –
هه‌موو شتێك دژیه‌كه
له‌ناو شه‌پۆلی ده‌ریا،
كۆڵانێك له‌بێده‌نگی..
له‌ناو كپی به‌ردیشا،
قیژه‌ی رووبارێك له‌بێحه‌یایی..!
-15-
كه‌هاوین تێرده‌خوات له‌خوڕه‌ی خۆر
میوه‌كان له‌شه‌قامی،
له‌زه‌تا راده‌كێشن..!
رۆژ هه‌ڵه‌بجه‌یی
