خه‌وێکی ئه‌رخه‌وانیی خۆشخه‌یالێک

به‌ندی عه‌لی .. فێبریوه‌ری 2010

ئێواره‌یه‌کی هێمنی سیحراوی

لێوان لێو له‌یارو یاوه‌ری شه‌یدا

ئه‌وانه‌ی ڕه‌شه‌بای ڕق

هه‌رگیز له‌سوچی دڵیانا په‌پکه‌ ناخواو

هه‌ر به‌غه‌مزه‌ی چاوی خومار له‌یه‌ک ده‌گه‌ن

منیش به‌نێو

گوڵستانه‌کانی عیشقا ده‌گوزه‌رێم

ئه‌وی هه‌ڵی ده‌مژم ته‌نیا

سروه‌بایه‌کی فێنکی سرک نیه‌

له‌ئه‌وه‌ڵی گه‌لاوێژی گه‌رمه‌سێرا

ئه‌وی من وا هه‌ڵی ده‌مژم

عه‌تری نه‌فخێکه له‌روحی

فریشته‌ بۆن خۆشه‌کانی شاری به‌هه‌شت

ئه‌و به‌هه‌شته‌ی .. گورگ و به‌رخی

له‌سه‌ر یه‌ک ڕووباری هه‌نگوین

گه‌رووی مه‌رام ته‌ڕ ده‌که‌ن و

گڕی تینوێتی ده‌شکێنن

ئه‌و به‌هه‌شته‌ی

هه‌موو بستێکی بێستانی سه‌رمه‌دیه‌و

گوڵ و خاری ده‌ست له‌ملن

له‌هه‌ر کوێیه‌ک دڵت گرتی

ڕه‌شماڵی زینده‌گیت هه‌ڵده‌و

بێ دڵه‌ڕاوکێ و بێ گومان

ناوی لێ بنێ .. نیشتیمان