مه‌نووچێهر جیهانی ـ “حوسێن قه‌ناعه‌ت” ده‌رهێنه‌ری ناسراوی سینه‌مای منداڵ و مێرمنداڵی ئێران له‌و بڕوایه دایه، قسه کردن سه‌باره‌ت به سه‌رقاڵبوون له‌م سینه‌مایه‌دا هاوڕێ له‌گه‌ڵ گواستنه‌وه‌ی په‌یامه بۆ هه‌ر به‌رده‌نگێکی سینه‌مای منداڵ و مێرمنداڵ.
به پێی راپۆڕتی لێژنه‌ی راگه‌یاندنی سی و یه‌که‌مین خولی فێستیڤاڵی نێونه‌ته‌وه‌یی فیلمه‌کانی منداڵان و مێرمنداڵانی ئیسفه‌هان، “حوسێن قه‌ناعه‌ت” ده‌رهێنه‌ری ناسراوی سینه‌مای منداڵ و مێرمنداڵی ئێران به ئاماژه‌دان به گرینگیی که‌ڵک وه‌رگرتن له ئه‌ده‌بیاتی منداڵ و مێرمنداڵ له فیلمسازیی ئه‌م بواره‌دا گوتی: ئێمه چه‌ندین چیرۆکی سه‌رنجڕاکێشمان هه‌یه و ده‌توانین له نێو به‌رهه‌م گه‌لی ئێرانیدا، کارگه‌لێکی زۆر باش په‌یدا بکه‌ین. بۆ وێنه یه‌کێک له بیرۆکه‌کانی من بۆ نووسین، سیناریۆیه‌ک سه‌باره‌ت به که‌سایه‌تییه‌کانی شاهنامه‌یه. به داخه‌وه ئه‌گه‌ر کتێبه‌کانی پوخته‌ی شاهنامه له بازاڕدا نه‌بووایه، جێگایه‌ک له کتێبه‌کانی وانه‌ی قوتابخانه‌دا له شێوه‌ی ئه‌و چیرۆکانه‌مان نه‌ده‌دیته‌وه.
ئه‌وه‌شی راگه‌یاند: کاتێک بمهه‌وێت وه‌ها پلانێک بکه‌مه وێنه‌یی، بوودجه‌یه‌ک که بۆی ته‌رخان ده‌کرێت، گرینگی هه‌یه. مه‌به‌ستم له بوودجه ئه‌وه نیه که ته‌نیا به پشت به‌ستن به بابه‌ت گه‌لی ماڵی و ئابووری ده‌توانین فیلم دروست بکه‌ین، به‌ڵکوو مه‌به‌ستم چیرۆکه که ئه‌گه‌ر بڕیار بێت، چیرۆکێکی ساده‌تر بنووسم که له ساده‌بوونی خۆیدا، منداڵانیش پێوه‌ی سه‌رقاڵ بن.
ده‌رهێنه‌ری فیلمی سینه‌مایی “دز و په‌ری” به ئاماژه‌دان به پێناسه‌یه‌ک له سه‌رقاڵبوون له سینه‌مای منداڵ و مێرمنداڵدا گوتی: ئه‌م سه‌رقاڵبوونه هه‌ر ته‌نیا به مانای خافڵاندن و سه‌رقاڵبوون نیه، به‌ڵکوو هه‌ر فیلمێک له سینه‌مای منداڵ و مێرمنداڵدا به به‌شی خۆی په‌یامی هه‌یه. به‌م پێیه، گرینگترین هۆکار له باس نه‌کردنی چیرۆکه‌کانی ئه‌ده‌بیاتی کۆنی فارسی ده‌گه‌ڕێته‌وه بۆ نه‌بوونی بوودجه، توانایی چێکردن و به‌کارهێنانی جیلوه‌کانی تایبه‌تی وێنه‌یی سینه‌مایی.
قه‌ناعه‌ت له وڵامی ئه‌و پرسیاره‌دا که چ دامه‌زراوه‌یه‌ک به‌رپرسی سینه‌مای منداڵ و مێرمنداڵه و چ پێشنیارێکی بۆی هه‌یه، رایگه‌یاند: هیچ دامه‌زراوه‌یه‌ک بێجگه له بونیادی سینه‌مایی فاڕابی به به‌رپرسی سینه‌مای منداڵ و مێرمنداڵ نازانم؛ هه‌ڵبه‌ت ته‌له‌ڤیزیۆن پێشتر کاری به‌رهه‌مهێنانی فیلمی له‌م بواره‌دا هه‌بووه و دیسان هاتۆته نێو ئه‌م بواره‌وه و له‌م کاته‌ی ئێستادا بۆ به‌رده‌نگه‌کانی منداڵ و مێرمنداڵ زنجیره درامای چیرۆکی به‌رهه‌م دێنێت.
ئه‌و سینه‌ماکاره سه‌باره‌ت به داهاتووی سینه‌مای منداڵ و مێرمنداڵ هیوای خواست و گوتیشی: به دڵنیاییه‌وه ده‌توانین هیوامان به سینه‌مای منداڵ و مێرمنداڵ هه‌بێت به هه‌وڵ و چالاکی به‌رپرسانێکی وه‌کوو “عه‌لیڕه‌زا ره‌زاداد” ده‌بیری ئه‌م فێستیڤاڵه و “فریشته تائیرپوور” که له زومره‌ی پێشه‌نگه به‌ئه‌زموونه‌کانی سینه‌مای منداڵ و مێرمنداڵن و که‌ڵکه‌ڵه‌ی ئه‌وان سه‌رقاڵ کردن و خافڵاندنی منداڵان و نمایش کردنی فیلم بۆ ئه‌وانه. ئاماده‌بوونی ئه‌م به‌رپرسانه له لووتکه و پله‌ی یه‌که‌می سینه‌مای منداڵ و مێرمنداڵدا، ئه‌م هیوایه زیندوو ده‌کاته‌وه که خه‌ونی نمایش کردنی فیلم گه‌لی منداڵ هه‌موو دوو مانگ جارێک ببێته شتێکی راسته‌قینه. سه‌ختیی کار کردن زۆر جار له قۆناغه سه‌ره‌تاییه‌کان دایه و ئه‌گه‌ر ئه‌م سه‌ختیانه تێپه‌ر بکه‌ین، سینه‌مای منداڵان ده‌چێته نێو به‌ستێنی نمایش کردنی فیلمه‌کانه‌وه.
ده‌رهێنه‌ری فیلمی سینه‌مایی “پاڵه‌وانه چکۆله‌کان” له کۆتایی ئه‌م وتووێژه‌دا وه‌بیری هێنایه‌وه: ئه‌گه‌ر سینه‌ماکاران و به‌رپرسان سه‌رنج بده‌نه ئامرازی خافڵاندن و سه‌رقاڵ کردن له سینه‌مای منداڵ و مێرمنداڵدا، ساڵی داهاتوو چه‌ندین فیلممان بۆ نمایش کردن له‌م بواره‌دا هه‌یه. دڵنیا بن وه‌ها بڕیارێک له هه‌ڵبژاردنی سیناریۆکانیشدا کاریگه‌ری هه‌یه. کاتێک چێکردنی فیلمی باش و شیاو بۆ منداڵان بکه‌وێته ناوه‌ندی سه‌رنجدانه‌وه و داموده‌زگا و دامه‌زراوه جۆراوجۆره‌کان، هه‌لی چێکردن و ئیمکاناته‌کانی فیلم گه‌لی منداڵان بخه‌نه به‌ر ده‌ستی سینه‌ماکاران، له‌گه‌ڵ بڕه‌وپێدانی زیاتری ئه‌م سینه‌مایه به‌ره‌وڕوو ده‌بین.
سی و یه‌که‌مین خولی فیستیڤاڵی نێونه‌ته‌وه‌یی فیلمه‌کانی منداڵان و مێرمنداڵانی له رۆژانی 8 تا 14ی خه‌رمانانی ئه‌مساڵ رێکه‌وتی 30ی ئۆگۆست تا 5ی سێپته‌مبری 2018ی زایینی له دوو به‌شی نه‌ته‌وه‌یی و نێونه‌ته‌وه‌ییدا له شاری مێژوویی ئیسفه‌هان له وڵاتی ئێران به‌ڕێوه‌ده‌چێت.
Discussion about this post