29و30/6/2010 : بە ئامانجى پتەوکردنى پەیوەندى رووناکبیری لەنێوان کورد و ئەمریکییەکان، دەزگاى چاپ و بڵاوکردنەوەى بەدرخان بەهاوکارى بەشی هونەر و کلتوورى نوێنەرایەتى حکومەتى هەرێمى کوردستان لە ئەمریکا لەژێر دروشمى “لە کوردستانەوە بۆ ئەمریکا… دروستکردنى پردى رووناکبیری لەنێوان کورد و ئەمریکییەکان” حەوتەمین فێستیڤاڵی بەدرخانى لە رۆژانى 29و30/6/2010 لە کاتژمێر 12 تا 8ى ئێوارە لە هۆڵی ماڵی سویدى سازکرد. ئەم فێستیڤاڵە بە ئامادەبوونى ئەندامانى شاندى بەدرخان و ژمارەیەک لە میوانانى ئەمریکى کە هەندێکیان سەر بە دەزگا حکومییەکانى ئەمریکا بوون و ژمارەیەکیشیان نوێنەرى رێکخراوە ناحکومییەکان بوون و کۆمەڵێک رۆژنامەنووس و رووناکبیری کورد و بیانى دەستى بە کارەکانى خۆی کرد.
سەرەتا فێستیڤاڵەکە بە سروودى “بەدرخانى خاک پەروەرم” کرایەوە، پاشان نوێنەرى حکومەتى هەرێمى کوردستان لە ئەمریکا “قوباد تاڵەبانى” وتارى کردنەوەى فێستیڤاڵی پێشکەشی ئامادەبووان کرد، کە تیایدا باسی لە پێویستى دروستکردنى پردێکى پتەوى رووناکبیری لەنێوان کورد و ئەمریکییەکان کرد. لە هەمانکاتدا هاوخەمى بەشدارانى ئەم فێستیڤاڵەى بە بنەماڵەى رۆژنامەنووسى جوانەمەرگ ئازاد سدیق محەمەد راگەیاند، هەر لە وتەکەیدا ئاماژەى بەوە کرد کە ناکرێت تەنیا لەرێگاى سیاسەتەوە کورد و کوردستان و دۆزەرەواکەى بە دۆست و لایەنگرانمان و میللەتانى سەرانسەرى جیهان بناسێنین، بەڵکو سازدانى فێستیڤاڵى لەم بابتە کە کلتوور و ئەدەب و هونەرى کوردى بە دنیا دەناسێنێت، کاریگەرى یەکجار بەهێز و سەرنجراکێشی دەبێت، ئەمەش پێویستى بە هەوڵ و کۆششی جوامێرانەى هەموو لایەنێکە بەتایبەتى نووسەران و رۆژنامەنووسان و هونەرمەندانى کورد لە هەر شوێنێکى ئەم دنیایەدا بن.
دواتر حەمید بەدرخان وتارى دەزگاى چاپ و بڵاوکردنەوەى بەدرخانى وەک رێکخەرى فێستیڤاڵەکە پێشکەش کرد، کە تیایدا ئاماژەى بە بەردەوامى کارى حەوت ساڵەى دەزگاى بەدرخان کرد بۆ سازدانى فێستیڤاڵی هونەرى و کلتوورى و رۆژنامەنووسی.
تا ئێستا دەزگاى بەدرخان لە وڵاتانى “ئەڵمانیا، میسر، یۆنان و ئەمریکا: و لە ناوەوەى وڵاتیش لە شارەکانى “سلێمانى، دهۆک و هەولێر” لەنێوان ساڵانى “2004- 2010” بە بەردەوامى و ساڵ لەدواى ساڵ فێستیڤاڵی خۆی سازداوە.
وتارى بنەماڵەى بەدرخانییەکان کە لەلایەن شازادە سینەم خان جەلادەت بەدرخان بە تایبەتى بۆ ئەم فێستیڤاڵە ئامادەکرابوو باسی لە رۆڵی گرنگ و پڕ بایەخى بەدرخانییەاکن کرد و هەر لەو وتارەدا سینەم خان پڕ بەدڵ هیواى ئەوەى خواست کە ئەم فێستیڤاڵە سەرکەوتووبێ و رۆڵی خۆی ببینێت لە ناساندنى کلتوورى گەلەکەمان بە میللەتانى دنیا. خاتوو فریال حاجۆ بە نوێنەرایەتى سینەم خان ئەم وتارەى پێشکەشی ئامادەبووانى فێستیڤاڵەکە کرد.
لە پانێلی یەکەمى رۆژی 29/6/2010 “د. ئازاد حەمەشەریف باسێکى بەناونیشانى “کاریگەرى مێژووى کورد لەسەر ئەدەب… بەراوردکارییەک لە رۆمانى “خۆشەویستى لە وڵاتێکى لەتلەتکراودا” کە لە نووسینى خانمە رۆماننووسی ئەمریکى “جین ساسۆن” بوو، کە رۆماننووسەکە خۆشی ئامادەى فێستیڤاڵەکە بوو.
گرنگى ئەم رۆمانە لەوەدایە کە باس لە مێژووى پڕ کارەساتى میللەتى کورد دەکات و بەشێوەیەکى یەکجار کاریگەر و دڵتەزێن ئەو نەهامەتیانەى بەسەر نەتەوەى کورد لە کوردستانى عێراق لە ساڵانى 1980- 1988 هاتووە لەرێگاى خۆشەویستى نێوان پێشمەرگەیەکى کورد و دولبەرە ئازاکەى وێنا کردووە.
هەر دواى تەواوبوونى باسەکەى د. ئازاد حەمە شەریف، خاتوو “جین ساسۆن” هاتە سەر مایکرۆفۆن و لە چەند وتەیەکى بایەخدار و پڕ نرخدا پشتگیری و هاوخەمى خۆی بۆ دۆزی رەواى نەتەوەى کورد دەربڕی و بە خۆشحاڵیەوە باسی لە چۆنیەتى ناسینى کیژە کوردى پاڵەوانى رۆمانەکە کرد و ئەوەشی درکاند کە رۆمانەکەى بۆ سەر “17” زمانى زیندووى جیهان وەرگێڕدراوە.
دواتر “د. ئیسماعیل قەرەداغى” باسێکى گرنگى بەناونیشانى “کاریگەرى ئەدەبی ئەمریکى لەسەر ئەدەبی کوردی” پێشکەشکرد کە تیایدا رۆڵی وەرگێڕانى دەقی ئەدەبی و هونەرى بۆ سەر زمانى کوردى بەرزنرخاند.
لە پانێلی دووەمى هەمان رۆژدا “د. ئاکۆ شوانى” بابەتێکى بەناونیشانى “پەیوەندى کورد و ئەمریکا” خستەبەرباس و لێدوان، پاشتر خاتوو “شەهلا حەیدەرى” لەبارەى رۆڵی ژن لە مێژوودا باسێکى پێشکەش کرد، خاتوو “فریال حاجۆ”ش لەبری “د. زەردەشت حاجۆ” بابەتێکى بەپێزى لەبارەى “ژیان و بیروباوەڕی میر جەلادەت بەدرخان” پێشکەش کرد.
پانێلی سێیەمى هەمان رۆژ تەرخان کرابوو بۆ کێشەى کەرکووک کە تیایدا فیلمێکى دیکۆمێنتى لەبارەى ئەو شارە نمایشکرا، پاشان “پرۆفیسۆر د. کەمال مەزهەر” باسێکى لەبارەى شارى کەرکووک و دەوروبەرى کە بابەتێکى گرنگى مێژوویی بوو پێشکەش کرد، دواتر “د. عیسام فەیلی” بابەتێکى لەبارەى “رۆڵی سیاسی و ئابوورى و کلتوورى فەیلییەکان لەمێژووى عێراقدا” پێشکەش کرد.
رۆژی یەکەمى فێستیڤاڵەکە بە نمایشکردنى فیلمێکى کوردى بەناونیشانى “هەرمان” لە دەرهێنانى حوسێن حەسەن بەکۆتایی هات.
رۆژی دووەمى فێستیڤاڵ کاتژمێر 2،30 پاش نیوەڕۆ دەستى پێکرد.
بابەتى لە پانێلی چوارەم “د. نەرمین عەلى” لەبارەى رۆڵی ئەمریکییەکان لە پاراستنى شوێنەوارى کوردستان” پێشکەش کرا، هەر لە هۆڵی فێستیڤاڵدا پێشانگایەکى پارچە سواڵەتى شوێنەوارەکانى کوردستان پیشاندرا.
دواى ئەمە عەتا قەرەداغى بابەتێکى بەناونیشانى “کاریگەرى کلتوورى ئەوان لەسەر کلتوورى کورد” پێشکەش کرد، کە باسی کاریگەرى خراپی کلتوورى ئەو میللەتانە دەکات کە کوردستانان داگیرکردووە، پاشان “د. سەروەر عەبدوڵڵا” باسێکى بەناونیشانى “کێشەکانى ناسنامەى کلتوورى کورد” خستەڕوو.
پانێلی پێنجەمى رۆژی دووەمى فێستیڤاڵ بۆ قسەودوان و نیشاندانى فیلمى کوردى بوو، هەوراز محەمەد وتەیەکى کورتى وەکو پێشەکى بۆ نمایشکردنى چوار کورتە فیلمى کوردى پێشکەش کرا، فیلمەکان بریتى بوون لە “ماسی سوور- دەرهێنانى هەوراز محەمەد، باران- دەرهێنانى هاوڕێ بەهجەت، نەوڕەس- دەرهێنانى کامەران جەمال، ماڵی مێروولەکان- دەرهێنانى شاخەوان عەبدوڵڵا”. دوابەدواى ئەوەش هونەرمەند سەرکەوت تارۆ نمایشێکى مۆنۆۆدرامى بەناونیشانى “دایک” کە باسی لە کێشەى کورد بەگشتى و مەسەلەى کەرکووک بە تایبەتى دەکرد، سەرکەوتووانە پێشکەشی کرد.
پاش ئەم نمایشە فیلمى “وڵاتى بەفر” لە دەرهێنانى “هیشام زەمانى” پێشکەش کرا، دواى ئەوەش لە کەشێکى خۆش و مۆسیقاوى شاعیانەدا شیعری قوبادى جەلیزادەو دڵشاد عەبدوڵڵا و سامى هادى و جەلیلی ئازادیخواز خوێندرانەوە.
دواتر خەڵاتى بەدرخان بەسەر بەشداربووە دیارەکانى ئەم فێستیڤاڵە دابەشکراو بڕوانامەى بەشداریکردنى فێستیڤاڵیش بە سەرجەم بەشداربووان بەخشرا.
هەر لە هۆڵەکەدا “گروپی میوزیکى کوردى لە ڤێرجینیا” لەگەڵ دەنگە بە خرۆشەکەى “دیلان”ى هونەرمەند بەشدارانى فێستیڤاڵیان هێنایە سەماو هەڵپەڕکێ.
لە کۆتاییشدا دەزگاى چاپ و بڵاوکردنەوەى بەدرخان سوپاسی بێ پایانى خۆی ئاراستەى بەشی هونەر و کلتوورى نوێنەرایەتى حکومەتى هەرێم لە ئەمریکا کرد، کە رۆڵی زۆر جوامێرانەیان گێڕاوە لە سەرخستنى ئەم فێستیڤاڵە، دوا موژدەش کە بە ئامادەبووان درا سازدانى هەشتەمین فێستیڤاڵی بەدرخان بوو لە ساڵی 2011 لە وڵاتى فەڕەنسا.
واشنتۆن
30/6/2010
