بێده‌نگ نابم

به‌ندی عه‌لی .. 2010

ئه‌گه‌ر زمانیشم ببڕن

په‌نجه‌کانم دێنه‌ دووان

بێده‌نگ نابم

په‌نجه‌کانم هه‌ڵوه‌رێنن

سوپایه‌ک برژانگی دیده‌

له‌سه‌نگه‌ردان

بێده‌نگ نابم

من مناڵی هه‌وری توڕه‌و

گه‌رده‌لوولێکی سه‌رکه‌شم

له‌گه‌ڵ په‌پووله‌کانی عیشقا

نه‌رمه‌ وه‌شتم

بۆ زه‌رده‌واڵه‌کانی غه‌دریش

ڕه‌هێڵه‌یه‌ک له‌ئاته‌شم

بێده‌نگ نابم

ئه‌گه‌ر کوڕه‌ به‌نازه‌که‌ی

مریه‌میش بی .. بێده‌نگ نابم

ئه‌گه‌ر دوا نه‌سڵی بێگه‌ردی

ئاده‌میش بی .. بێده‌نگ نابم

نه‌ک هه‌ر میرو شاهه‌نشا بی

ئه‌گه‌ر دوا ته‌ته‌ری خوا بی

بێده‌نگ نابم

سوێند بێ به‌هه‌رچی فرمێسکی

سه‌ر کوڵمی قاشی عاشقانه‌

سوێند بێ به‌هه‌رچی پیرۆزو

‌هه‌رچی سۆزو هه‌رچی جوانه‌

له‌سه‌ر هه‌ڵوه‌رینی گوڵێ

له‌سه‌ر شکاندنی شوشه‌ی

کریستاڵی ناسکه‌ دڵێ

له‌هه‌ر شوێن و هه‌ر سه‌رده‌مێ

بتکه‌م به‌په‌نگی عاله‌مێ