که‌ژاڵ ئیسماعیل
2008
بۆ بێده‌نگی ؟
بمدوێنه
ئه‌م به‌یانییه
ئه‌بمه چۆله‌كه‌یه‌كی عه‌جول و
دێمه سه‌ه‌ر ئه‌وداره‌ی ئه‌بێته سێبه‌رت
بێده‌نگ مه‌به
به‌ئه‌سپایی سه‌رێ واڵاكه‌و بمدوێنه
بۆ نیوه‌ڕۆ ئه‌بمه په‌ڵه هه‌ورێكی گه‌ڕۆك و
ناهێڵم خۆر بگاته ژێر پێت
ده‌مه‌و ئێواره ئه‌بمه بایه‌كی شه‌رمن
تێكه‌ڵ هه‌ناسه‌تم ئه‌كه‌ی
ئه‌مدوێنی
تۆ ئه‌بیته باران .. نا
ئه‌بیته کتێبێتکی تازه‌ی ئاسمانی و په‌ڕه .. په‌ڕه
دێڕ به دێڕ ئه‌یخوێنمه‌وه
له دوالاپه‌ڕه‌دا بۆت نوسیوم
من ناوێرم به‌ئاشکرا ئامبازی یه‌ک هه‌ناسه‌ت بم و
له‌ترسی له‌خاچدان له‌ژێر لێوه‌وه ماچت ئه‌که‌م به‌دزی خاچپه‌رسته‌کانه‌وه
به‌سه‌ر چاوه‌ڕوانیتا گوزه‌ر ئه‌که‌م
منیش پێت ئهڵێم ..
من و با ئاشقی تۆ بوین و
ئاشقی ئێواره
من و شه‌و ئاشقی تۆ بووین و
ئاشقی ئه‌ستێره
بمدوێنه
ئه‌وه منم ئه‌بمه شه‌ماڵ و
یاری له‌گه‌ڵ هه‌ناسه‌ت ئه‌كه‌م
ئه‌وه منم ئه‌بمه باوه‌ش
ئه‌تنێمه ژێر چه‌تره‌كه‌م
ئه‌وه منم ئه‌بمه ووشه و
به‌نێو نیگاكانتا سه‌فه‌ر ئه‌كه‌م
منم ئه‌بمه دوو لێوی ماچ و
خۆم له‌لێوار فنجانه‌كه‌ت گیر ئه‌كه‌م
بمدوێنه
تۆ پێم ئه‌ڵێێ :
چه‌ن جوانی به‌م ئێواره‌یه
هاتووی له‌گه‌ڵ خۆت بمبه‌یته ژووان
هاتووی به‌قاوه‌یه‌کی تاڵ هۆشم بێنیته‌وه و
به‌ماچێک ڕۆح بکه‌یته‌وه به‌به‌رما !!
هاتووی پێم بڵێێ :
خۆشت ئه‌وێم و خۆشم ئه‌وێێ
هاتوی یارییه‌کانی مناڵیم بیر بێنیته‌وه و وه‌ک دوو مناڵ
بێژین به‌خوا .. چیدی گه‌وره نه‌بین
تۆ پێم ئه‌ڵێێ :
هه‌موو ئێواره‌یه‌ک که ژاوه‌ژاوی شار کپ ئه‌بێت و
ته‌زووی ساردی کزه با خۆی له تاریکی کۆڵانه‌کاندا وون ئه‌کات
بۆت ئه‌گه‌ڕێم
من به‌ته‌نها ئه‌بمه میوانی شه‌قام و به‌دوای بۆنی هه‌ناسه‌تا وێڵ ئه‌بم
که‌تاریکی ڕه‌نگی چڕ ئه‌بێت
خولیای دۆزینه‌وه‌ی جێهه‌نگاوێکت سه‌رشێتی گه‌ڕانم ئه‌کا و
کۆڵان به‌کۆڵانی مناڵیت به‌دوای ده‌نکه موروی شینا ئه‌گه‌ڕێم
هه‌موو ئێواره‌یه‌کم دوعائه‌که‌م باران ببارێت
ئه‌وسا هه‌موو کۆڵان وشه‌قامه‌کانی شار
بۆنی پیاسه‌‌یه‌کی ژێر بارانی تۆی لێ بێت !
من پێت ئهڵێم :
که‌شه‌و داهات ئه‌بمه ئه‌ستێره‌یه‌ک
له‌گه‌ڵ بارانا دێمه خوار
بمبه كه‌نار ئه‌و ده‌ریایه‌ی
چاوه‌ڕیی جێهه‌نگاومانه
بمبه ئه‌و قاوه‌خانه‌یه‌ی
چاوه‌ڕوانی ژوانێكمانه
له‌یادم ده‌ر مه‌كه
تۆش وه‌ك من به
زستان به‌به‌فر دامپۆشه
پاییز كراسێكم له‌گه‌ڵا بۆ بچنه
هاوین به‌هه‌ناسه‌ت فێنكم بكه‌ره‌وه‌و
به‌هار ماچی په‌مه‌ییم به‌سه‌ردا ببارێنه
بۆ بێده‌نگی
تۆ هێن گیانی خۆم گیانمی
بۆ ئازایش ده‌رمانمی
به‌بێده‌نگی بمدوێنه
ده‌پێم بڵێ فریشته‌كه‌م
تۆ ئه‌وین و تۆش گیانمی
…………………………………….
كه‌ژاڵ
