بۆ کۆستم

پێش ئه‌وه‌ی بنوسم
پێش ئه‌وه‌ی هیچ بڵێم
هێند ئه‌گریم
تاوه‌کو فرمێسکم ئه‌بێته‌ خوێناو
به‌وخوێنه‌ قه‌ڵه‌مم پڕئه‌که‌م
ئه‌وجاکه‌ ئه‌نوسم
بۆئه‌وه‌ی بیبینن
که‌به‌خوێن نوسیومه‌
بۆکۆستم

ئه‌ی کۆستم که‌ی واده‌ی که‌وتنت ئێستا بوو
ئه‌ی گڵۆپی سه‌رشه‌قامێکی سلێمانی
که‌ی وه‌ختی کوژانه‌وه‌ت ئێستا بوو
ئه‌ی کۆستم
له‌وه‌ته‌ی کۆستی تۆم که‌وتوه‌
هه‌موو ده‌مه‌و ئێوارانێک
ده‌ست ئه‌به‌م هه‌ورێکی دڵ پڕی
گه‌رمیان دائه‌گرم
ئه‌یخه‌مه‌ سه‌ر چاوم
بۆئه‌وه‌ی به‌لێزمه‌ دابارێ و خۆش نه‌کا
تائه‌و کاته‌ی که‌ ڕوخسارم په‌ڵه‌ ئه‌دا و
خه‌مه‌کانی تۆ ئه‌ڕوێنم
بۆئه‌وه‌ی هه‌موو ساڵ له‌م کاته‌دا
خه‌مه‌کانت سه‌وز بن
ئه‌ی کۆستم
له‌وه‌ته‌ی کۆستی تۆم که‌وتووه‌
هه‌موو ڕۆژ ئه‌چمه‌ لای ژنێکی بێوه‌ژن له‌مه‌خمور
که‌ مێرد و که ‌باوک و که‌ برا و که‌ کوڕی
ئه‌نفال بێ
بۆئه‌وه‌ی ئه‌و بگری و من بگریم
هێند بگرین تا ئه‌وکاته‌ی
خوداوه‌ند
ده‌ست دێنێ بەبرینی کۆستماندا
ئه‌ی کۆستم
له‌وه‌ته‌ی کۆستی تۆم که‌وتووه‌
هه‌موو جار ئه‌چمه‌لای ژنێکی قه‌ڵادزێ
که‌ دایک و که‌ خوشک و که‌ کچی
بۆردومان شه‌هیدی کردبن
بۆئه‌وه‌ی ئه‌و قژی بڕنێت و
من بگریم هێند بگریم
تاوه‌کو سوێم ئه‌بێته‌وانێ
ئه‌ی کۆستم
ئێواران به‌ده‌نگی سوێسکه‌یه‌ك یان که‌وێک
یان ده‌نگی قومرییه‌ک
ئه‌چمه‌لای بێکه‌سی بێکه‌سان
یان چۆڵی بێکه‌سان
هه‌رنه‌بێ ئه‌چمه‌لای مناره‌ی بێکه‌سان
له‌وێوه‌ لای ئه‌وان
یادی تۆ ئه‌که‌مه‌وانێ
ئه‌ی کۆستم
چۆن توانیت ماڵه‌که‌ی ناو کتێب چۆڵ بکه‌ی
دیلانێی سه‌ر ووشه‌ جێ بێڵی
یان یاری ناو زمان
یان خانه‌ی هۆنراوه‌و په‌خشان و
خوێندنه‌وه‌ی شیعرێکت ئێواران جێ بێڵی
ئه‌ی کۆستم
له‌دوای تۆ
کۆستی قه‌ڵه‌م و ده‌فته‌ری مناڵانی شاریش که‌وت
هێند ناسکانه‌ کۆستت خستین
له‌گه‌ڵماندا ماسی گریا
ئه‌ستێره‌ لاواندێوه‌
قه‌ڵه‌م هه‌نسکی بۆ دوا ووشه‌ت هه‌ڵ ئه‌کێشا
مه‌ی شیوه‌نی بۆ لێوت بوو
تار بۆ په‌نجه‌کانت خه‌مبار بوو
شه‌قام بۆ پیاسه‌ت ئه‌گریا
باخی گشتی هه‌موو ده‌مه‌و ئێوارانێ چاوه‌ڕوانی سه‌ردانت بوو
ده‌نگ خۆشه‌کان
بۆ بیستنت سه‌رتاپا ڕه‌شی پۆشی بوو ده‌نگیان
ئه‌ی کۆستم
تۆ به‌ته‌نیا کۆستی ئێمه‌ت هه‌ڵگرتبوو
که‌چی ئێمه‌ هه‌ر هه‌موومان کۆستی تۆمان که‌وتووه‌
ئای له‌ کۆستت
وای بۆ کۆستت
ئاخ له‌و کۆسته‌ ناواده‌یه‌ت چه‌ند سته‌م بوو
ئه‌ی کۆسته‌که‌م
ئه‌ی شێخه‌که‌ی تاقانه‌که‌ی ناو هۆنراوه‌
تۆ خه‌رمانی ووشه‌ت هێنده‌ زۆر بوو
تۆ باخه‌که‌ی شیعرت هێنده‌ خۆش بوو
که‌س له‌ ووشه‌ت بێ به‌ش نه‌بوو
که‌س له‌ باخت بێ تام نه‌بوو
هه‌ر بۆ باخ و هه‌ر بۆ ووشه‌ت
هه‌ر بۆ کۆستت قه‌ڵه‌مم ناتوانێ بنوسێ
هه‌ربۆ تۆیه‌ کۆستی که‌وتوم
ئه‌ی باشه‌که‌ی باشی باشان
له‌ناو هه‌موو باشه‌کاندا
تاقانه‌بوویت
شیعری جوانی شێخه‌که‌ی من
له‌ناو دیوانی جوانیدا
له‌ناو هۆنراوه‌ی تۆڵه‌دا
له‌ناو په‌خشانی فرمێسکا بۆ نیشتیمان
بێ وێنه‌یه‌ بێ هاوتایه‌ تاقانه‌یه‌
کۆسته‌که‌ی من

ڕێباز عوسمان عزیز
ستۆکهۆڵم