بۆ پیره‌کچێکی دامێنی ده‌ریا

له‌که‌نارێکی ده‌ریادا

پیاسه‌م ئه‌کرد

نه‌مئه‌زانی له‌و که‌ناره‌

تۆ گوێ ئه‌گری

بۆ خڕه‌ی به‌رد و

ناڵه‌ی

عاج

نه‌مئه‌زانی

له‌و‌که‌ناره‌

تۆ ماچی ئه‌که‌ی

کتێبێکی پیر و

لاپه‌ڕه‌یه‌کی ساج

له‌و که‌ناره‌

من تۆم وه‌ک باڵوێزی ئه‌شق

و

وه‌ک

سه‌فیری گوڵه‌ ئه‌رخه‌وانیه‌کانی دڵم

ناساند

له‌و که‌ناره‌

تۆم وه‌ک سه‌رۆک کۆمارێکی

بێ وڵات

و

سه‌رکرده‌یه‌کی

بێ ئایدیا ئه‌چواند

من تۆم له‌و‌ که‌ناره‌ به‌ شاژنێکی

فیر عه‌ونی و

په‌ریه‌کی خه‌یاڵی ئه‌نه‌خشاند

له‌و که‌ناره‌

من تۆم

به‌ ئایه‌تێکی نه‌خوێندراوه‌و

پێغه‌مبه‌رێکی تازه‌ی مرۆڤایه‌تی

هه‌ڵئه‌سه‌نگاند

پیره‌کچه‌که‌ی من ئاشقتم

له‌و که‌ناره‌

که‌ ده‌ستم ئه‌گرتیت

ون ئه‌بووم

که‌ له‌باوه‌شم ئه‌گرتی

سه‌رخۆش ئه‌بووم

بۆیه‌ کاتێ

به‌ ئاگا ئه‌هاتمه‌وه‌

له‌ناو پاشماوه‌ی لیتاوی دڵتدا

خۆم ئه‌دۆزیه‌وه‌

که‌ به‌ ئاگا هاتمه‌وه‌

پێکێک شه‌ڕابم تۆ

بۆ سه‌رخۆشیت ئه‌تخواردمه‌وه

هاوڕێ ڕه‌ش

13.7.2011‌