بۆ ساڵیادی کۆچی مامۆستا عه‌لی له‌تیف

به‌ندی عه‌لی .. 2011

مرۆڤێک ، فڵچه‌ بێ روحه‌کانی

فێری سه‌ما ئه‌کرد

له‌سه‌ر شانۆی قوماشه‌ سپیه‌کانی ژیان و

ڕه‌نگه‌ جۆراو جۆره‌کانی فێر ئه‌کرد

هه‌موو به‌یه‌ک زمان بدوێن

زمانی خه‌مه‌ ساده‌کانی کۆچه‌رێکی

هه‌میشه‌ ئالووده‌ به‌نیشتیمان

مرۆڤێک ، ئێوارانی پاییز

له‌ژێر نه‌رمه‌ بارانی ناوه‌خته‌یا

شنه‌ی خه‌یاڵ ئه‌یبرده‌وه‌ بۆ سلێمانی و

پیاسه‌یه‌کی به‌شه‌قامی مه‌وله‌ویدا ئه‌کرد

ئه‌وجا چایه‌کی خه‌ستی له‌چایخانه‌ی شه‌عب ئه‌نۆشی و

به‌رله‌وه‌ی خۆر ماڵئاوایی بکات

به‌ژێر ده‌روازه‌که‌ی په‌لکه‌زێڕینه‌دا

به‌خه‌مباری دونیای خه‌یاڵی جێ ئه‌هێشت و

ئه‌گه‌ڕایه‌وه‌ بۆ حه‌قیقه‌ته‌ تاڵه‌که‌ی ئه‌م غوربه‌ته‌

مرۆڤێک ، دڵی له‌کریستاڵی ناسک دروست کرابوو

بۆیه‌ به‌سوکترین زیخی ناحه‌قیی ده‌شکاو

به‌گچه‌کترین ئازاری ئازیزانیشی

ووردو خاش ده‌بوو

مرۆڤێک ، له‌ڕه‌نگی گوڵه‌کانه‌وه‌

فێری ده‌رسی عیشق ببوو

بۆیه‌ وه‌ک ئه‌وانیش جوانیی لێ ئه‌باری و

میهرو به‌خشنده‌یی ئه‌پرژاند به‌سه‌ر ژیانا

هه‌ر بۆنی گوڵیشی لێ ئه‌هات

ئه‌وه‌نده‌ی گوڵیش

نه‌رم و نیان و میهره‌بان بوو

پیاوێک ، له‌به‌رزی نه‌فسا ئه‌ستێره‌ بوو

هه‌ر بۆیه‌ ده‌ستی ئه‌و بازرگانانه‌ی نه‌ئه‌گه‌یشتێ

که‌به‌نیازی کڕینی زیمه‌ت و هه‌ست و نه‌ستی

مرۆڤه‌ ڕه‌نگینه‌کان بوون

پیاوێک ، سه‌روه‌ت و سامان له‌لای ئه‌و

ته‌نیا فریشته‌ ڕه‌نگاوڕه‌نگه‌کانی هونه‌ر بوو

بۆیه‌ کاتێ که‌جێی هێشتین

هه‌ساره‌یه‌کی له‌جوانی و

ئۆقیانووسێکی پڕ جۆش و خرۆش له‌هه‌ست و

کیشوه‌رێکی له‌جوامێری لێ به‌جێما

به‌ڵێ ، ئه‌و پیاوێک بوو له‌ڕه‌نگ

ئه‌و پیاوێک بوو له‌بۆنی گوڵ

ئه‌و پیاوێک بوو له‌گوڵدانی کریستالیی هه‌ستی

ئه‌و .. مامۆستا عه‌لی له‌تیف بوو