له نێوان خه‌یالَه‌که‌نی دایکم و
ئه‌م نیشتمانی نغرۆبونی ته‌مه‌دا بێدارم
له‌وێ دوا چرکه‌کانی سه‌فه‌ر دایکم فرمێسکی ده‌ڕشت
لێره‌ش ئاسمان دڵ ره‌قانه ڕێژنه بارانیه‌تی
له‌وێ پرچی خۆر هه‌موو جه‌سته‌می سوتاند
لێره‌ش ته‌م چاوه‌کانی کوێر کردم
دایه گیان…………….
هێنده نیگای ئه‌ستێره‌م کرد تا عاشقی تاریکی بووم
هێنده‌ی چاوه‌روانی مانگم کرد فێری بێده‌نگی بووم
دایه گیان. ………………
ئه‌م زریانه له شه‌پۆلی فرمێسکه‌کانی تۆوه سه‌رچاوه‌ی گرتوه
هه‌موو ڕوناکیه‌کانی ئێره به چرکه‌یه‌کی تاریک ناگۆرمه‌وه
هه‌موو خه‌نده‌کانی ئێره درۆیه درۆ
ئه‌وةتا په‌روانه‌کان لێره رقیان لێمه
دایه گیان ئیدی نزای فیرده‌وس بۆ من مه‌که من تامه‌زرۆی دۆزه‌خم
لێره ماڵێکم له ته‌نیای
ڕۆحێکم له گومان
جه‌سته‌یه‌کم له وون بوون
لێره ره‌زه‌کان به‌ر له‌وه‌ی ببن به ترێ راده‌که‌ن
چێشکه‌کان به‌رله‌وی گه‌وره‌بن نه‌فره‌ت له ئاسمان ده‌که‌ن
ئێره مه‌مله‌که‌تی وون بوونه
درۆیه ئه‌م عه‌شقه درۆیه
لێره تامه‌زرۆی ئامێزی تۆم
له‌م وه‌رزی بارینی خۆره‌دا سه‌رمامه سه‌رما وا ره‌ق بوومه‌وه
دایه گیان کڕنوش بۆ ڕۆحت ده‌به‌م و بۆنی هه‌ناسه‌کانت ده‌که‌م
خودایه هه‌موو به‌یانیه‌کانی ئێره بکه به ئێواره
هه‌موو ڕۆژه‌کانی ئێره بکه به شه‌وو
هه‌موو په‌روانه‌کانی ئێره بسوتێنه
له‌نێو وه‌رزه‌کانی ئێره‌دا وه‌رزی گوڵ بسره‌وه
دارستانه‌کانی ئێره بگۆڕه به بیابان
زه‌ریاکانی ئێره ووشک بکه
ته‌مه‌نی شه‌معه‌کانی ئێره کورتتر بکه
ڕێگه‌مه‌ده ئاسمانه‌کانی ئێره هاوڕێیه‌تی هه‌وره‌کان بکات
خودایه لێره ڕق بارانمانم بکه زیاتر ئاشنای تاریکیم بکه
فێرم بکه چۆن تامه‌زرۆی سێو بم تا ئاشنا بم به دۆزه‌خ
خودایه ئاشنام که‌ره‌وه به ئامێزی دایکم
دایه گیان پێویستیم به لای لایه‌که‌ته و پێم بڵێ
لای لا یه کۆرپه‌ی شیرینم بۆ خه‌وت نایه
