١.خۆر گیرفانەکانی لەپاڵتۆی
ڕووناکی خاڵی دەبن
تارمایی ڕوانینەکان
لە برژانگەکانی ڕێگە دەشۆیتەوە،
وەکو پرسی دەرنگ کەوتووی بێگانەیەکیت
لە نێو نەڕڕەی ڕەشەبادا بۆ ھۆتێلێک
خۆت و جانتایەک نیگەرانی
لە نێو خەونەکانی سبەی دەنووی .
(بەسەر ترسی-ئیستا- بێ دەنگ کەوتووی،
چەندین پرسیاری ڕەنگاو ڕەنگ
لە دۆڵەکانی مێشکت گەشت و ڕەو دەکەن).
٢.ژیان
بەسەر خاچی ڕابردووەوە
باڵەکانی ڕاخستووە
لەنیو پەراسوی مێژووت
شانمداوە بەسوپایەکی بەفرین،
بە نەختێک گۆرانی غەمگینەوە
بە نەختێک تلاوەیی ناو ئاگر و دوکەڵەوە
بە نەختێک کۆخەی ڕاوەدووکاری
خەو و گەرمی ناونوێنەکەتەوە
لەوێدا داستانێک تاوان
بەو گوناھانەی من دەم چنین
دیکۆمێنت کراوە.
*بۆرژان :نێوان بێداری و خەو، بیرە خەو
______________________________________
بەنیازی بڵاوکردنەوە نێردراوە… لەگەڵ ڕێزدا.
ئومێد قەرەنی
