له‌جامی خه‌یاڵدا
هه‌موو شتێ شه‌ڵاڵی
وێران بونه
له‌ودیو ده‌رگاکانه‌وه
مشتێ ڕه‌نگی ئاڵ
ملوانکه‌یه له‌ده‌نکه مرواری جێ ماو
به‌ده‌م ته‌زوی خه‌یاڵه‌وه
هه‌ڵواسراون
بێده‌نگی ته‌نیویه
ڕامان
له‌زێدی من
خه‌یاڵ باڵا به‌رز به‌رز
به‌سه‌رماندا نیسێ ده‌کا
وه‌لێ
ژیان خاڵیه له‌مانا
له‌م وڵاته نه‌زۆکه
پایز شه‌رمی لێ ده‌تکێ
سه‌وزنابینه‌وه ئێمه
له‌به‌رده‌م
هیچ خه‌ونێکی تردا
به‌رده‌وام پڕده‌بین
له‌مه‌نفا
پرده‌بین له بۆنی
ئێواره کوژراوه‌کانی
کیژه ڕه‌نگ په‌مه‌یه‌کانی وڵات
کیژه قه‌یره‌کان
له‌ودیوی په‌رده‌کانه‌وه
به‌رده‌وام ، له‌زه‌تی روحیان
به‌شه‌رمه‌وه
چاوده‌گێڕێ
ژنه به‌ساڵ داچوه‌کان
چاوه‌روانی وه‌خته
پاکیان بکاته‌وه
له‌ته‌زوی ژیان
لێره با هه‌ڵکردنی بیرچۆته‌وه
عه‌شق
به‌دزیه‌وه شه‌وانه
به‌سه‌ر گه‌ڵاکانی ته‌مه‌ندا
خۆی تێرده‌کا
خۆشه‌ویستی
وه‌ک ته‌زویه‌کی فێنک
هیچ دره‌ختی سیله‌ی چاوی
تێ نابڕێ
لێره له‌زه‌ت
له‌مانا پاک بۆته‌وه
به‌خۆی و
جوتێ پێڵاوی شڕه‌وه
رێگه‌ی وێرانه ده‌گرێ
من بۆ دۆزینه‌وه ی
((له‌ره‌ی ده‌نگی باو))
شوێن پێکانی تۆ
ده‌گه‌ڕێم
تا
فینک فینکت که‌مه‌وه
له‌ماناو
تێر تێرت که‌م له‌ڕه‌نگ
کوێستان عومه‌رزاده
