با فریشتەکان بە قسە بێن

-١-

ژنێکم دی

بە باگردێن سەربانی

خۆری ئەگێڕا

-٢-

بە ژنێکم وت :

لەسەر نەخشەی دڵی خۆت

یان بمکە وڵات

یان بمسڕەوە

-٣-

من خەڵکی بەهەشت و دۆزەخ

نیم

خەڵکی  کیشوەرێکم

بەناوی ژن

-٤-

سینەی ژن

بەهەشتێکی

بێ حەفتاو حەوت

حۆریە

-٥-

ژن دڵی خوایە

لەسەر زەوی

-٦-

ئەمەوێ لەناو

دڵی ژنێکدا

خۆم بشارمەوە

لە ترسی باران

-٧-

لە پرچی

ژنێکەوە

بسکی خۆرم

ناسی

-٨-

هەموو ڕۆژێک

ژنێک فێرە

(دارا دوو داری دی)

ئەشقم ئەکا

-٩-

لاپەڕەیەک کەمە

بۆ نوسینی

ناوی ژنێک

-١٠-

کە ژنێک

ئەخەوێ

خوا ئەبێتە پاسەوانی

” هاوڕێ ڕەش ”