شێروان ئیبراهیم حیده‌ری : یەكێك لە گرفتەكانی ئێمە ئەوەیە كردارمان سست و لاوازە و قسەمان زۆر و زەبەندە، بە پێچەوانەی ئەهلی عیرفان و حیكمەتە، بۆ وێنە: لە “غاندی”يان پرسی: قسەمان بۆ بكە و وتارمان بۆ بدە، وتی: بە دوای كردارەكانم وەرن و سەیری كارەكانم بكەن كەچی دەكەم.
بەڕاستی ئەوە گرنگە كردارت چییە و چیت پێشكەشی خەڵكی كردووە؟ چ خێر و بێرێكت بۆ دەوروبەری خۆت هەبووە، ئەگەر نا هەر قسە بكە لەسەر زەمینەیەكی بەتاڵ چی دەدوورێتەوە؟ هیچ. هەر لەم رەوانگە و روانینە “موفتی زادە” ده‌ڵێ “هەندێجار قسە فایدەی نامێنێ و بێ ئەرزیش دەمێنێتەوە”، واتە قسەش كەی جێگای خۆی دەگرێت ساتێك شتێك ئەنجام درابێ و تەحقیق كرابێ لە واقیعدا و جێگای خۆی گرتبێ، ئەوسات زمانی خەڵك شایەتی ئەوه دەدەن، كورد دەڵێ: مانگ لە چواردە بێ حەوجە بە ئەنگوست نییە. زۆر مرۆڤ ئەگەر بەرهەمی چڕ و پڕ و دیار بێ پێوستی بە قسە و بەڵگە هێنانەوە نییە، چونكە لە هێزی وتنی گەورەتری پێیە ئەویش كە كرداوە لە رۆژگاری ئێستای واقعی كوردەواری ئێمەدا ئەوانەی قسەكەرن زۆرترن لەوانەی كار دەكەن و كار ئەنجام دەدەن، ئەمه راستییەكە، لە بواری هونەری و رۆشنبیری و سیاسیدا ئەگەر نمونە وەربگرین: هی وامان هەیە گۆرانییەكی وتووە كەچی دونیایەك چاوپێكەوتنی ئەنجامداوە و دونیایەك قسەی بۆ داهاتووی گۆرانی كوردی وتووە، هی وامان هەیە لە فیلمێك بەشداری كردووە كەچی دونیایەك دیمانەی سازداوە هەردەم لە شاشەكان دووبارە دەبێتەوە هەر دەڵێ و هیچیش لە ئارادا نییە… هەتا ئەگەر سەیری سەركردەكانی دونیا بكەی دەبینی لە چەند خولەكێك تێ پەڕ نابێ و قسەی خۆی بە چڕكراوی دەكات و پەیامی خۆی دەگەینێ كەچی سەركردەی پێشووی عێراق ساتێك دەهاتە سەر تەلەفزیۆن ئەوەندەی دەگوت بینەرانی ناچار دەكرد كە “Tv” یەكانیان بكوژێنەوە و بۆ خۆیان بنوون، زۆری دەگوت و خەڵكی بێزاری بێزارتر دەكرد..
هەتا ئەگەر قسە “بیرێكی” لە پاڵ نەبێت دەبێت بە “لغو” بەرەو بێ مانایی هەنگاوی دەنێ و بەهای خۆی لە دەست دەدا ئەمە راستی یەكە ئەوەی زۆر شانازی بە خۆی دەكات وادەزانی هەموو شتێك دەزانی ئەوە نەزانی گەورەیە.. ئەوە گەمژەیە كە سوقرات باسی دەكات كە نازانێ نەزانە، ئەوەیە بەدبەختی گەورە، چونكە مرۆڤ تا هەست بە كەلێنی گەورە لە ناو خودی هۆی بكات هەوڵدەدات و هەنگاوی گەورە دەنێ بۆ ئەوەی بەرەو تەواوكاری و كامڵ بوون بڕوات، بەڵام ساتێك واهەست دەكات مرۆڤێكە سوپەرمانە ئەوسا هەستی لە خۆی دەبڕێ و ناتوانێ خزمەتی خۆی بكات، هەندێك رایان وایە كە مرۆڤ هەرچۆنێك بێت دەبێت هەتا مردن بە سەر پەیژەكانی مەعریفە و زانین سەركەوێ، ئەو مرۆڤەی كە وادەزانێ هەموو شتێك دەزانێ ئەوە سوفستائییە تەنیا لەمپەرە لە بەرامبەر بیركردنەوەی خەڵكی بیركەرەوە، ئەو دەردە لە كۆمەڵگای عەرەبیش هەیە بۆ نمونە: ساتێك یەكێكیان خەڵاتێك وەردەگرێت ئەوا بە هەفتە و بە مانگ راگەیاندن باسی دەكات و دەیڵێتەوە، ئەمەش لە ئەنجامی ئەوەیە دیاردەكە لە لای ئەوان نامۆیە، بۆیە زۆری لەسەر دەگوترێت و ناوبانگی دەداتەوە، كەچی لە رۆژئاوا خەڵات وەردەگرێ و ئاهەنگیان بۆ دەگرن و پاش ئاهەنگ بیر لەوە دەكەنەوە چ كارێكی تر بكەن و چ داهێنانێكی تر ئەنجام بدەن، قسەی ئەوان وتاردان و بانگەشەنییە، بەڵكو كاری جددیەتە و فیلم و وەرگێڕان و داهێنان و خستنەڕووی بەرهەمە.
