پێش ئەوەی بچمە ناوەڕۆکی نووسینەکەمەوە دەمەوێت ئەوە بڵێم من (خالید ڕەشید)م خۆشدەوێت. بەتەنها خۆشویستنێکی ئاسایی نا وەک هونەرمەندێک، بەڵکو وەک شانازییەکیش کە کوڕی گەڕەکی خۆمانە و کەسوکاری لە نزیکەوە دەناسم. هەروەها ئەو هەموو هەڵوێست و سەنگینییەی کە لە سی ساڵی ڕابردوودا بەرامبەر چەتەکانی کوردایەتی نواندوویەتی و هەرگیز ڕێگای نەداوە لە گەندەڵییەکەوە بگلێت و دەستی پیس ببێت لەو سەروەتو سامانەدا، کە دەسەڵات زۆرینەی هونەرمەندانی تری پێ لغاو کردووە..پێشتریش لە وەسفی ئەودا ئەم چیرۆکەم گێڕاوەتەوە( بیرمە دوای ڕاپەڕین کاتێک ئێمە منداڵ بووین، خالید ڕەشید وەک گەنجێکی کوردی دڵ پڕ لە هیوا لە هەندەران گەڕابۆوە ، بەتەمابوو بە یەکجاری بمێنێتە وە و هەندێ پڕۆژەی هونەریشی دەستپێکردبوو. ئەوەی هەرگیز لە بیرم ناچێت ئەو وێنەیە بوو کە ئەو سەردەمە گەنجانی گەڕەک هەموو بە کڵاشینکۆف و دەمانچەوە دەسوڕانەوە، بەڵام ئەم فلووتێک لە جانتایەکی باریکی ڕەشدای دەکردە شانی و بە تەنها بەیانیان دەچوو میوزیکی دەژەنی و ئێواران دەهاتەوە) لەو وێنەیەدا بۆ هەمیشە جیاوای مرۆڤی ڕۆشنبیر و ناڕۆشنبیر چووە سەرمەوە) تێگەیشتم چەکدارەکان لەگەڵ فلووتدارەکان سەر بە یەک دنیای ڕۆشنگەریی و پەروەردە نین.
دەمەوێ بڵێم خالید ڕەشیدم خۆشدەوێت، زیاتر لەوەی هونەرمەندیکی دڵخوازی ترم خۆشدەوێت. بەڵام ئەمە نابێت بەرەو گەندەڵی و خۆگێلکردنم ببات و ئەم خۆشەویستیە نابێت کوێرم بکات لەئاستی دیاردەیەک کە خالید ڕەشید بەرەو جەهلێکی کوشندە دەبات.
ماوەیەکە ئەم پیاوە توشی جۆرێک لە خڵەفان بووە. خڵەفانێک کە سەرچاوەکەی کوردایەتی و ناسیۆنالیزم و کەفوکوڵی خۆبەکەمزانیی و گرگنیی کوردییەتەکەیەتی. ماوەیەکە وامان نیشان دەدات کە ئەم جیهانە لەسەر ڕق لێبوونەوە لە ئینسانی داماوی کورد بونیاد نراوە. وادەزانێت خەلەلی گەورەی ئەم گەردوونە ئەوەیە کە کورد دەوڵەتێکی کوردی پەتی نیە .
بەڕای من هۆکاری ئەم پەلهاویشتنەی بۆ ئەم دنیا ناشرینە بەتەنها یەک ڕەهەندی نیە، بەڵکو کاریگەریی کۆمەڵێک بارودۆخ و ڕووداو و گۆڕانکاریین کە دەشێت دەستنیشانیان بکەین .
١/ پۆپۆلیزم : ئەم هونەرمەندە بەهۆی ئەو هەموو دژایەتییەی گەندەڵکاران و تێکەڵ نەبوونی بە دزی وفزیەکانی دەسەڵات وەک کاراکتەرێکی خاوەن هەڵوێست دەرکەوت و ژمارەیەکی گەورەی فان و هەواداری لە سۆشیالمیدیادا لێ کۆبوونەوە. لێرەدا دەبێت بڵێین بەداخەوە نەیتوانی ئیدارەی ئەو هەموو خۆشەویستییەی خەڵک بدات، لەبری ئەوە ئێستا ئەم کەوتۆتە دوای ئەو قەرەباڵغییە و ڕێک بەتەنیشت مێگەلەوە بەرەو تاریکی هەنگاو دەنێت و لایلایە بۆ هەوادارەکانی دەکات. لەوانەیە ئەمە وەک خۆی نەبینێت بۆیە وەک دەبینرێت خۆی لێبووە بە گۆدۆ و پێغەمبەر.
٢/ ڕۆشنبیر و هونەرمەند و خەڵکانی خوێندەواری ناو دەسگا موخابەراتیەکانی هەردوو حیزبی دەسەڵات بە بەرنامە و بە ووریایی دەفعی دەکەن و بە شان و باڵیا هەڵەدەن و دەیانەوێت بەردەوام بێت لەسەر ئەم گەمژاندنەی خەڵک. دڵنیام بۆخۆی بێئاگایە لەم جۆرە یارییانە.
٢/ وونبوون لەناو خەیاڵاتی کوردایەتی و ناسیۆنالیزم. ئەم ئایدۆلۆژیایە مرۆڤی ئێمەی کردۆتە قەشمەری هەندێک خەیاڵپڵاو، کە لە ئەساسدا سیاسیەکان پارەی پێ پەیدادەکەن. مەفهوومەکانی دەوڵەتی کوردی و دوژمنی نەتەوەیی و کوردستانی گەورە و داگیرکەرانی کوردستان… دەیان دەربڕینی تر کە لە ئەرزی واقیعدا هیچ واتا و ماهیەتێکیان نەماوە بۆ ئەو خەڵکەی ئەم نەتەوەی کوردە پێک دەهێنن.
٤/ دابڕان لە هەردوو دنیاکە: یەکێک لەو کێشە گەورانەی ڕووبەڕووی مرۆڤی هەندەرانیی دەبێتەوە، دابڕانە لە ڕەوتی گەشەسەندن و پەرەسەندن و پێشکەوتن لە ڕووی کۆمەڵایەتی و کلتوری و فکرییەوە.
ئێمە کە نیشتیمانمان بەجێهێشت دابڕاین لەو پەرەسەندن و گەشەسەندنە سرووشتییەی ئینسانێک لەناو کۆمەلگای خۆیدا لە تێپەڕینی کاتدا تەجروبەی دەکات. لێرەیش (شۆکی کلتوریی) مرۆڤ زۆر دوادەخات لەوەرگرتن و هەزمکردنی کلتورە نامۆکانی هەندەران، بە تایبەت ئەگەر لە سەروو هەژدە ساڵەوە بیت. ساڵانێکی زۆری دەوێت تا مرۆڤ چاوی دەکرێتەوە و فێرە زمان دەبێت و شتێک لە کلتوری کۆمەڵگاکان حاڵی دەبێت. ئەمەیش دواکەوتن و وون بوون لەپێشوەچوونی لێدەکەوێتەوە. ئەم
حاڵەتە وادەکات زۆربەی جار مرۆڤی ئێمە زۆر بە تووندی دەست دەگرێت بە کلتوور و زمان و ڕەسەنایەتی خۆیەوە، بە بۆنە و بێ بۆنە دەیەوێت ئەوە بسەلمێنێک کە ئەم نەمردووە و هەیە و گەل و وڵات و کۆمەڵگا و داروبەردی ئەو جێگایەی جێیهێشتووە پیرۆزترە لە هەموو شتێکی ژیانی .
دەمەوێت بڵێم خالید ڕەشید نە توانی ببێتە هاوڵاتیەکی سویدی و ئەوروپایی، نە توانیشی لەگەڵ کۆمەڵگاکەی خۆیدا بە شێوەیەکی سروشتی گەشە بکات و پەرە بە فکری بدات هەتا بتوانێت خوێندنەوەی واقیعی بۆ شتەکان بکات. جا بەو حوکمەی ئەم بەڕێزە هونەرمەندە و هەواداری زۆری هەن، ناتوانێت وەک مرۆڤێکی ئاسایی لێی دانیشێت هیچ نەڵێت. بۆیە دواجار کاتێک وەک فیگەرێکی کۆمەڵایەتی دەیەوێت شتێک بە کۆمەڵگاکەی بڵێت، دەکەوێتە ئەم گێژاوە بێ سەر و بنەوە و هەڵەی گەورە دەکات. هەڵەی گەورەی وەها کە سەری لە جەهلدا گیریخواردووە.
لەئێستادا خەڵکی کورستان پێویستی بەم هەموو خورافات و ناڕۆشنیی و بەم هەموو دەربڕین و گوتارە نالۆژیکی و ناجێگیرە نیە. ئەو خەڵکەی لە کوردستان دەژین ( جگە لەوانەی بەرژەوەندییان لە کوردایەتیدایە) ئیمانیان بە کوردایەتی نەماوە. خەڵک تێگەیشت کە پێکەوە ژیان جوانترە لە دوژمنداریی، خۆشگوزەرانی لە ئاشتی نێوان گەلاندایە نەک هەوڵدان بۆ بوون بە گەلێکی باڵادەست ( وەک ناسیۆنالیزم بانگەشەی بۆ دەکات) .
ئەوەی جێگای داخە، هێشتا ئەوانەی لە هەندەرانەوە خەریکی کوردایەتین نەگەیشتوونە بەو لۆژیکەی کە خەڵکە ڕەسەنەکەی ئەو ناوچانە ئومێدی لەسەر هەڵدەچنن.
کاک خالید ئەگەر بێدەنگ نەبێت و نەگەڕێتەوە بۆ لۆژیک و عەقڵێکی تەندروست، خۆشەویستی وئیهتیمامی خەڵک لەدەست دەدات.
Discussion about this post