ئەنفال
تابلۆیەك لەفرمێسك‌و خوێن
ئای لەئایەتی ئەنفال‌و…
لەتەفسیری جەلادانەی دیكتاتۆرو
لەتاوانی بێ نمونەی جەلادەكان!
ئای لەدڵی ڕەشی مرۆڤ…
لە سەری سەختی قوربانی‌و..
لەو ساتانەی ئاشنان بەتیرۆرو تاوان!
ئای لەسەر زەمینی شەڕو…
لەسەر سم‌و تەپ‌و تلی ئەسپەكان‌و..
لەخامۆشی دوای گریانی چاوی ئاسمان!
ئای لەجەلادو قوربانی…
لەخەڕەندی دۆش داماوی كارمامزو,
لەپێ دەشتی گومان‌و سەرابی ژیان!
ئای لەدۆزەخی چاوەڕێ‌و…
لەپوش پەڕی گڕەی زوڵم‌و..
لەقەڵای بێ سەرو بەری نوگرە سەلمان!
لەهۆرەی لەخاچ دراوی كوڕە جاف‌و…
لەسێوی تاڵانكراوی گەورە كچ‌و..,
لەو مەرگەی هەموو ساتێكە بۆ پیاوەكان!
ئای لەسەگی داوەتی خوانی عروبەو…
لەو گۆڕانەی ناو نیشانیان لەدەفتەری
ڕەشە بادا, جەلادەكان بەخشیویانە بەبیابان!
ئای لەو شەوە دۆزەخیانەی…
با، لەپۆستەخانەی دۆزەخ نامە بەر بوو,
نامەی چارەنوسی ڕەشی دەبرد بۆ تاریكی ئاسمان!
سپێدەی خەم…
زەردە پەڕی بەدەم كەلی ئازارەوە..,
بەرەو خاكی هەڵوەرینی ڕۆح دەكێشا!
بەیانی زوو…
گمەگمی كۆترەكانی سەر كانی..,
لەگفتوگۆی دوو ئاشقی تووڕە دەچوون!
سۆزی دەنگی بلوێرەكان…
لەشیوەنی نەوڕەسێكی ئاشق كوژراوی
كەناری ئۆقیانووس و دەریا دەچوون!
تەپ و تۆزی…
شوێن پێی وردی كارمامزە تۆقیوەكان,
لە زریان‌و گەردە لولی توونەكانی بابا دەچوون!
چێشتەنگاو هیلاك‌و ماندوو…
دەستەكانی ناوەتە پشتی كەمەری‌و
كۆڵی خەمی قەدەرێكی بێ چارەنووس,
بەشوێن خۆیدا بەرەو ئەنفال ڕادەكێشێَ!
هەتاوی تووڕەی سەرە ڕۆ…
دەرزی ئاژنی ڕومەتی كێڵگە دەكات!
هاوارێكی بێ كۆتایی…
بەناو توناو تونی مەرگا گوێ كون دەكات!
پێش نیوەڕۆ ناڕەسەنە…
چاو دەپۆشێ لەزارۆكی بەرماڵان‌و..
لەو تاعونەی تاوێكی تر دێتە گوندو..،
ئاڵای مەرگ لەقەرسیلی گوڵە گەنمدا هەڵدەكات!
نیوەڕۆمان تلیاك كێشە…
سەری خزاندۆتە نێوان دوو ئەژنۆیی‌و
گوێ بەكەڕەنای بێزاری ئەنفال نادات!
هەتاو ئەڵێی نیشانە گری زەوییەو…
نە دەجوڵێ‌و نە دەرفەتی بانگ كردنی
شەومان دەدات!
پاسەوانێكی تووڕەیە…
لەچاویدا تۆماری هەموو ڕوداوێك هەڵدەگرێت‌و
لەگەڵ ئاوابوونی خۆیدا نهێنی چارەنووس دەبات!
كە بەیانیان هەڵدەێتەوە…
بێ باك لەوانەی كەدوێنێ ڕوویانداوە..,
كامێرای مێژوو بۆ ونبوون لەجەنگەڵدا
جێگیر دەكات!
پاش نیوەڕۆ كەمەر شلە…
بەكۆڵی قورسی ڕووداوی ئەو ڕۆژەوە..,
بەنیوە گیان ڕێشمەی خۆر بەرەو ئاوا بوون
ڕادەكێشێ!
مێژوو لەخوێندا سوور دەبێ‌و…
پاش نیوەڕۆ بێ باكانە نە ئاوڕێك دەداتەوە..,
نە پاساری نیگایەكی لەسەر چڵی دارە مەیتێ
هەڵدەنیشێ!
خۆر باوێشك دایدەگرێت‌و، چاو لەتاوانی
عروبە دەپۆشێت‌و، لەترسی ئەنفالی خۆشی
هەناسەی سارد هەڵدەكێشێ!
هەتاو خۆشی لارە ملە…
نە (پەرەجوو) تەنها جارێك تۆمار دەكاو..,
نە جارێكیش لەدادگادا گەواهی تاوانێك دەدات!
شەو كە دڵی نهێنی یە…
شەو كەقەڵای مێردانە خۆی..,
لەكۆستی ڕەشی ئەنفال دا ڕووناكی بۆ خۆی
بانگ دەكرد!
لە شەوی مەرگی گەرمیاندا…
دەرگای هەموو قەڵاكانی بەڕوماندا دادەخست‌و
بێ دەربەست بوو لەویژدان‌و چاو پۆشی..
لەتاوان دەكرد!
لەچركە ساتی داماویی‌و دۆش داماندا…
شەو هەر بۆ خۆی لێمان دەبوو بەمردوو شۆر,
دەهات‌و كفنی ئەنفالی لەبەری ژیانمان دەكرد!
شەو ناپاك بوو…
لەوە بەدوا شەو بوو بەسیخوڕی ئەنفال,
ناو نیشانی هەنگاومانی بۆ سەرانی..
ئەنفال دەبرد.
ئێستا…
ویژدانی ئازادی خوازی شەرمەزارە..،
دەیەوێت تف‌و نەفرەتی سەر تەوێڵی بسڕێتەوە!
خۆر, چاو بەرەو ژێری ئێمەی قوربانیە…
دەیەوێت پەلی ناپاكی لەقەدی خۆی ببڕێتەوە!
نیوەڕۆ هەناسە ساردە…
بەڵێن ئەدات سێرەی ناپاكی لەمرۆڤ نەگرێتەوە!
مێژوو بۆ خۆی شەرمەزارە…
ئەو هەموو زوڵم‌و تاوانە چۆن لەودا دەنووسرێتەوە؟!
شەو ڕووی نایە سەر هەڵبڕێ…
بەچی بڕوای قەڵا بوونی خۆی لەشەودا بكڕێتەوە؟!
ئەوا ئێستا جەلادەكان گۆڕ بەگۆڕن..،
ڕۆژی سەد جار شەرمەزاری..,
بەسەر تەوێڵی ڕەشیاندا دەڕشێتەوە!
محمد پاکژ
