کاری هونەری و ئەنجامدانی لە هەموو دونیادا بۆتە باس و خواستێکی زۆرێک لەگەلان، هەر هەمووشیان پێش برکێی ئەوەیانە هەنگاوی باشتر و پلانی تۆکمەتری بۆ دابڕێژن، هونەری کوردیش بەتایبەتی لقی گۆرانی و گۆرانیبێژان، بەشێکی گرنگی بواری هونەرییان پێکهێناوە، هەرچەندە کەموکڕی دەبیندرێ و هەستی پێدەکرێت بەڵام دەکرێ هەبوونی هەندێک هونەرمەند موژدەی ئەوەمان پیچ بدەن، بڵێن ئۆخەی ئێمەش هەین.
لەو ماوەیەدا لە رێگەی رۆژنامەی (رووداو) بابەتێکی سەرنج راکێشم خوێندەوە، لە ژێر ناوی (ئەلبومەکەی زیاد ئەسعەد بە 000 100) سەدە هەزار دۆلارە، ئیتر کە چوومە نێو ناوەرۆکی بابەتەکە سەیرم کرد، ئەو بابەتە بۆتە موشتمڕی خاوەن کۆمپانیا و ناوەندە هونەرییەکان لەسەر کێ بڕکێ و کڕینەوەی بەرهەمی هونەرمەندی ناودار (زیاد ئەسعەد) بۆ ئەوەی ببنە خاوەنی بڵاو کردنەکەی!!
ئاخر ئەو نرخە تائێستا بۆ هیچ بەرهەمێکی هونەری هیچ گۆرانیبێژێکی کورد، نەگیشتۆتە ئەو ئاستە، چونکە من لە زۆربەی دیمانەی تەلفزیۆن و رادیۆکان و رۆژنامەکان دەیخوێنمەوە هەرچی هونەرمەندی کورد هەیە باس لە زەرەرو زیانی مادی گیرفانیان دەکەن، کە لەبەرهەم هێنانی ئەلبومەکەی دا خەرجی کردووە، بڕوابکەن زۆر جار لە هەندێ دیمانە بیستوومە هونەرمەندانی گۆرانیبێژ دەڵێن هیچ کۆمپانیایەکمان نیە بەرهەمەکانمان بۆ بڵاو بۆکاتەوە!!. سەیرە! ئەی بۆچی کۆمپانیاکان بەناو نیشانی خۆیانەوە لە رۆژنامەدا قسە دەکەن و هەریەکەیان نرخی کڕینەوەی مافداریەتی ئەلبومێکی گۆرانی هونەرمەند (زیاد ئەسعەد) دەخەنە بەرچاو بۆ ئەوەی ببنە خاوەنی ئەو ئەلبومە تازەیەی دەیەوێ بیخاتە بەرگوێی هاوادارنی!!
بەهەر حاڵ ئەوە نیشانەی ئەوەیە کە هونەرمەند خۆی دەتوانێ رێز و نرخ بۆ بەرهەمەکانی خۆی دیاری بکات و ببێتە خاوەنی قازانج و بەرهەمێکی چاک، هەروەها ئەوەشی سەلماند کە (زیاد)ی هونەرمەند خاوەنی زۆرتریین گوێگر و جەماوەرە لەسەرانسەری کوردستان و دەرەوەی وڵاتیش، ئەگەر کۆمپانیاکان ئەو پارە زۆرە چۆن بۆ ئەلبومێکی گۆرانی دادەنێنن، من دڵنیام هەریەک لەو کۆمپانیانەی گرەوی مافی ئەلبومەکەی هونەرمەند (زیاد ئەسعەد) دەباتەوە، بەشێوازێکی زۆر تۆکمەو چالاک و پڕ بایەخ بڵاوی دەکاتەوە، ئەزانن بۆ؟ چونکە پێش وەختە نرخ بۆ ئەو ئەلبومە دانراوە و خاوەنەکەی واتە (زیاد) وادەکات ئەلبومەکەی جێگای بایەخی کۆمپانیاکە بێت و بەشێوازێکی جوان بڵاوی بکاتەوە.
بەڕیزان من وەک نووسەرێک ناوە ناوە بابەتێک دەنوسم و بڵاوی دەکەمەوە، ئەوەی لێرەشدا نووسیومە تەنها هەستی خۆمەو دەمێکە دەنگی ئەو هونەرمەندە ئاست بەرزە سەرنجی راکێشاوم، تکایە کەس بە هیچ شتێک لێکی نەداتەوە، هونەرمەند (زیاد ئەسعەد) وەکو بەشێک لە هونەرمەندە راستەقینەو خاوەن بەهرەو توانای هونەریین، دەنگی ئەوم لەلا جوان و خۆشە، کە خاوەنی دەنگ و ستایلێکی زۆر تایبەتە، بەڵام من ئەو هونەرمەندە وادەبینم گۆرانکاری زۆر گەورە لە ناو هونەری گۆرانی کوردی دێنێتە کایەوە، دڵنیام بێدەنگ بوونی ئەو چەند ساڵەی هەوێنی چەپکێک گۆرانی تاسە شکێنی لە خۆی گرتووە، چونکە (زیاد ئەسعەد) دوای هەموو بێدەنگ بوونێکی داهێنانێکی گەورە دەهێنێتە کایەوە، لە یادمە دوای ئەوەی کوردستانی بەجێهێشت لە سەرەتای ساڵانی نەوەدەکان، لەشاری سلێمانی دیمانەیەکی لە گەڵ یەکێک لە رادیۆکان سازکرد، کە ئەو کات بەسەردان و بۆ ئەنجامدانی چەند کارێکی هونەری لەو شارە بوو گوتی من هێشتا هیچم نەکردووە بۆ هونەرەکەم، ئەوەی پێش کەشم کردووە بە مشتێکی دەزانم لەو خەرمانە بەهەرەیەی کە خوای گەورە پێی داوم، من پێویستم بە زانست و زانیارییەک هەیە لەسەر هونەرەکەم، کە ببێتە هەوێنێک بۆ کاری باشتر و جوانتر، بەداخەوە زۆرم هەوڵدا لێرە فێربم، بەڵام بەداخەوە هیچی لێ فێر نەبووم، بۆیە دەبێ بیر لەدەروەی وڵات بکەمەوە، سەیرە هونەرمەندێک لەو سەردەمەدا بیری لەلای ئەوەبوو زانست و زانیاریەکی باش فێر بێت و ببێت بە مامۆستایەکی بەتوانا لە بوارەکەی خۆی دا، ئەوەبوو دوای رۆیشتنی لە کوردستان و گیرسانەوەی لە تاراوگە لەدوای ئەوەی لە سەرەتای ساڵانی (1999 و 2000)ەوە دەرکەوتەوە، زۆربەمان لەیادمان ماوە دیمانەیەکی لەگەڵ کەناڵی ئاسمانی میت tv ئەنجامدا و چەند گۆرانییەکی پێش کەش بە هەوادارانی کرد، کە هەموو بازاڕ و دوکانی شارەکانی داپۆشی و جارێکی دیکە سەلماندی کە (زیاد) چ پەیامێکی هونەری تازەی پێیە، بەڵام دەرکەوتنەوەی لەدوای (2000)ەوە شەپۆلێک گۆرانی زۆر جوان و جیاواز لە هەموو گۆرانییەکانی ئەم سەردەمە، هەروەها دروست کردنی چەندیین هونەرمەند و چەندیین ئاواز و تێکستی نایاب.
دەتوانم بڵێم ئەو قوتابخانەیەی (زیاد ئەسعەد)ی گەورە هونەرمەند هێنایە کایەوە، ئێستاکە ئەوانەی لەسەر دەستی ئەو دروست بوون ناوی زۆر دروشاوەن لەوانە (ئەژدەر وەهبی، رۆژ کەریم، چۆپی فەتاح، هێڤی، ئەیاد حوسێن، بڵند عەبدوڵڵا، پەیوەند جاف، زەکەریا عەبدوڵڵا، تارا رەسول، لەیلا فەریقی، موحسین عەبدوڵڵا، کوردە….) چەندین هونەرمەندی گۆرانیبێژی دیکە لە رێگەی تێکست و ئاوازەکانی هونەرمەند (زیاد ئەسعەد) قۆناغێکی تازە هاتە نێو گۆرانی کوردییەوە، تەنانەت هەندێک فۆرم و دەقی شیعری ئاوای هێنایە ناو گۆرانی کوردی، کە شتگەلی زۆر تازە و جوان بوو، هەندێک ووشەی وەک (پێی بڵێن، بم بەخشە، تازە رۆی، نەمزانی، چۆن دڵت هات، دڵم بۆ گوڵێ هەڵوەری، حەیفە، هەبوو نەبوو، گوێم لێگرن) ئەمانەو چەندیین ووشەی دیکە وا لەسەر زار و هەست و دڵی کوڕان و کچانی ئەم وڵاتە، بۆیە من (زیاد ئەسعەد) بەتەنها وەک گۆرانیبێژێک و ئاوازدانەرێک و تێکست نووسێک نابینم، بەڵکو هەوڵ و ماندوو بونی ئەو وەک (شکسپیر و بتهۆڤن و مۆلێر و مۆزات) دەبینم، پێم وایە بوونی ئەو هونەرمەندە قۆناغی گۆرانی کوردی بەرەو ئاراستەی زۆر پێشکەوتوو تر دەبات، کە تاماوین دەبێ شانازی پێوە بکەین.
من ئومێد دەکەم کاکە (زیاد)ی دانسقە و کەم وێنەو هونەرزان، وەک سەرمایەک بیپارێزین و هەرچی زووە کار بۆ ئەوە بکەین، ئەو هونەرمەندە پاڵپشتی لێبکرێت و سوود لە ئەزموونی ئەو گەورە پیاوە وەربگیرێت تا زووە، ئەگەر نا مێژووش لێمان خۆش نابێت، ئەگەر خوانەخواستە لەدەستمان بچێت، کە داواکارم لە یەزدانی باڵادەست و توانا تەمەنی کاکە (زیاد ئەسعەد)مان بۆ درێژ بکات، چونکە نموونەی وەک ئەو هونەرمەندە دڵنیام لە مێژووی گۆرانی کوردیی دا بە (100) ساڵی دیکەش دروست نابێتەوە.
چونکە سەیر بکەن، چەندان کەسی بەناو هونەرمەند لەم وڵاتە خەریکن لە سەر حیسابی پارەو سامانی ئەو وڵاتە بەش مەینەتەو هونەر و هونەرمەندان، هونەری کوردی هەراج دەکەن و کەسانی دەنگ نەشاز و ئاوازی عەربی و میرسی بەسەرمان ساغ دەکەنەوەو کەسانی دەنگ نەشاز و نەشارەزای وەک (دەشنێ و لۆکە و هانی و میراو ئەلیسا و کریستال نلیسا) دەکەن بە رێبەری گۆرانی کوردی، بۆ ئەوەی کەلتور و رەسەنایەتیمان هەراج بکەن، لەسەر حیساب و گیرفانی حکومەتی هەرێم و پۆستە راوێژکاریەکەی، بەهەر حاڵ با ئەو بابەتە تێکەڵی ئەو بابەتە نەکەم.
من پێم وایە هونەرمەند (زیاد ئەسعەد) ئەم جارە بەنیازی موفاجەئەیەکی دیکەیە، ئەوەتا نرخێکی ئاوای بۆ ئەلبومەکەی داناوە، کەپێم وایە تا ئێستا هیچ ئەلبومێکی گۆرانی هونەرمەندانێکی کورد، لەگەڵ رێزم بۆ هەر هەموویان نەگیشتۆتە ئەو پارەیە، بۆیە (زیاد) دەیەوێ ئەم جارە کۆمپانیاکان فێری چۆنیەتی کڕین و رێزگرتن بن لەگەڵ بەرهەمی هونەری هونەرمەندان، دیارە (زیاد ئەسعەد) گوێ ی نەداوەتە ئەو بیانوانەی گوایە مافی بەرهەمی هونەرمەندان ناپارێزرێت، بەڵکو ئەو دەیەوێ ئەو مافە بکات بەکلتورێک و یاسایەک بۆ ئەوەی ببێتە نەریتێک بۆ هونەر و هونەرمەندان لە داهاتوودا
ئیتر ناوەرۆکی ئەلبومەکەشی خوا ئەیزانێ چەند موفاجەئەیەکی ئامادە کردووە بۆ جەماوەرە فراوانەکەی؟؟!!
سوندس قادر پێنجوێنی – سلێمانی
