ئەرسەلان مەحمود : جوگرافیایی بیركردنەوەو، ئەداكردنی سیاسەتكارە خۆرهەڵاتیەكان، هەرگیز لەكاری شمولكاری تێناپەڕێ، رێگەكانی دنیابینی ئەوان سنوردارەو، لەهونەری ژیانكردنێكی فرە ڕەهەندو بەمانا تێناگەن، خۆیان وەك شوانكارەی مێگەڵ دەبینن و لەو باوەڕەدان ئیتر ئەوە رونادات ببنەوە تاكێكی سادەو ئاسایی!
بێگومان جیاوازییەكی گەورە هەیە لەنێوان هونەری مێگەلبەمۆدەكردن و، هونەری ژیانكردنێكی سروشتی، مرۆڤی ئەمرۆ بوونەوەرێكی بەربەری یا جەنگەڵی نییە تا دڵخوازانە ڕەوانەی بیابان و چیاو چۆڵەوانی بكرێ، شوانكارانێكی وەها بەرخۆر، هەرچەن توانای كرین یا دەست بەسەرداگرتنی ئەسپ و مەڕو ماڵاتیشیان هەبێ، دواجار دەرهاویشتەی هێزی هونەری ئەو مێگەلە هەموو هی ئەوان نییە، چونكێ وەها شواكارانێك هەمیشە لەدژایەتی و دڵەڕاوكێی نێوان خەون و خولیاو ئەركەكانیاندا ململانێیەكی نەبڕاوە هەیە، هەرگیز مۆدێلی هونەری ژیانكردنێكی نوێ رۆناچێتە ناو زهن و، عەقڵیەتیانەوە!..
ئەمە تۆمەتباركردنێكی بێباكانە نیە، لەرۆحێكی دوژمنكارانەیشەوە سەرچاوەی پێنەگیراوە، كارو كردەوەو روداوەكانی دوێنێ، جەنگە دزێوەكان، رەوكردنە بەكۆمەڵەكان، ئەشكەنجەی ئاینی، پاوانخوازی سیاسی و كۆمەڵایەتی و ئابوری، قۆرخكردنی بازاڕ، گەندەڵكاری خوو ڕەوشت، بەعادەتكردنی باوگەرایی و…تاد، رەگوڕیشەی ئەو مەیلە شمولییەن، ئایا وەها هونەركارێكی كوێرانە دەتوانێ وێنەكێشێكی باش، مۆسیقارێكی داهێنەر، ئاوەزێكی نەمر، گۆرانیبێژێكی رەسەنت بداتێ؟!.. ئایا لەجێی دروستكردنی كۆمەڵگەی هونەری و هۆڵی شانۆ، دروستكردنی سەدەها هۆڵی پرسە، دەتوانێ تەشویقی ژیانكردنێكی ئەزمونكراوت بداتێ؟!.. ئایا هیچ نوێنەرایەتییەكی هونەری خەوتووی سەر باڵی ئەم بێمروەتییە دەكارێ بەرێگەی ڕێنومایكارە سیاسی و وەعزدەرانێكی وەهاوە، ڕێ لەم بانگەوازو تەبلیغاتە تەشریفاتییە بگرێ؟!.. بێگومان نەخێر، چونكێ ئەم پرسیارانەو دەیانی تر دەبێ وا سەیر بكرێن گەر هونەركار خاوەن دنیابینییەكی فرەبینی نەبوو، چۆن دەتوانی مەخلوقێكی گەورەتر لەدنیابینی خۆیمان بداتێ، ئەی ئەگەر كارەكتەری ئاراستەكراو خاوەن هزراندنێكی هونەری نەبوو، چۆن دەكارێ بنوێنێ، هونەرمەندی گوێڕایەڵ و دەستەمۆكراو تەنها بینەر دەرەنجێنێ، لێ ئیشی هونەر، هونەری نوێ، ئەوەیە جڤاتێكی ئاوا پەرت و بڵاو لەوەها دۆخێكدا كۆبكاتەوەو، بەرەو كرانەوەی كولتوری و دامەزراندنی جڤاتە كۆمەڵاتییەكان پەلیانبگرێ، لەبیرتان بێت ئەمە تەنێ ڕوانگە بینی من و تۆیەك نییە، لێ حەقیقەت لەم دەرئەنجامە بەدەر نییە، یا ئەوەتا سیاستكارانی ئەم مەملەكەت هیچ لەهونەری ژیانكردنێكی كراوە نازانن، یا نایانەوێ ئەو خەڵكە سەبارەت بەو دنیایە شتێكی زیاتر ببینن، ئەفڵاتون دەڵێ” كاتێ مۆسیقارەكان تۆنەكانیان دەگۆڕن، بارودۆخی دەوڵەتەكانیش دەگۆڕێ”..
