ئه‌مشه‌و هاتووم
تا رقی عه‌شق به فرمێسکه
به‌رائه‌تیه‌کانی چاوانت بشۆمه‌وه
هاتووم
پێت بلێم له ترسی موسافیره‌کانی ئاسمان
مانگ ده‌رنه‌که‌وتووه
هاتووم
تا ئه‌وینه دۆڕاوه‌کانی ژێر په‌رده سپییه‌کان زینده به‌چاڵ بکه‌م و
کۆڕی زیکر بگه‌م به گۆرانی و
به ناختا بچێته خواره‌وه
هاتووم
تا ئاو له ژێر پێلووی جاوه‌کانم ببارێنم
تا تریفه‌ی مانگ
له‌سه‌ر ده‌سته‌کانت بدره‌وشێته‌وه
ره‌نگی گریان بکه‌م به ته‌مه‌نێکی خه‌وتوو
ئه‌ی وشه پڕ هیواکان ماوه‌که بێ تۆ بۆنی
خه‌ونه قیناوییه‌کان ئه‌که‌م
ماوه‌ییه‌که بۆنی گوڵی ژاکاو ئه‌که‌م
( با ) بۆنی گه‌ڵا وشکه‌کان ئه‌کا به دیارییم
تا جریوه‌ی ئه‌ستێره‌کان
به‌ده‌م گریانه‌وه بکه‌ونه سه‌ر ئه‌ژنۆ و
سه‌وسه‌نه ره‌نگ په‌رییه‌کان له نێو قژتا نقوم بکه‌ن
2006/2/27 شه‌قلاوه
سیروان واحد
