ئه‌تله‌سی له‌شت

1

له‌ئه‌تله‌سی له‌شتا

له‌ته‌وقی سه‌ر تا ژێری پێت

شوێنێ بڵێ نه‌گه‌ڕا بم

گه‌ر وانییه‌و درۆیه‌

به‌هه‌مووان بڵێ و

با ئاشكرا بم

2

له‌نێو گوڵستانی په‌چه‌م و جه‌نگه‌ڵی پرچتا

چه‌ندین جار ڕێگه‌ی چوونه‌ده‌رم وون كردووه‌و

له‌نێویدا بزر بووم

چه‌ندین جار گوڵ و گه‌ڵا و لق و قه‌دی

ئه‌م جه‌نگه‌ڵه‌شۆڕ بۆته‌وه‌

بۆ سه‌ر سه‌ر و شان و سنگم

بووه‌به‌سێبه‌رێك بۆ سه‌رچاوم له‌ژێریدا نووستووم

3

له‌تووند مژنی ده‌م و لێوتا

ئێستاش كه‌سوور ده‌چێته‌وه‌

به‌ده‌ردی سه‌رخۆشێ زیاتر چووم

چونكه‌تام و بۆی ئه‌م شه‌رابه‌ نایاب و تایبه‌ته‌ت

تا دوویاره‌دیدار هه‌ر ده‌مێنێته‌وه‌

4

له‌زۆر بینینی منا

بیلبیله‌ی چاوت ناوی خۆشت

به‌یه‌كه‌مین پیتی ناوی من ده‌نووسێته‌وه‌

بۆیه‌دڵنیام گه‌ر ده‌ریای ڕه‌شی چاوت بریاریدا

به‌نداوی ئه‌شك تێك بشكێنێ و هه‌ر هه‌مووی هه‌ڵڕژێ

دڵی نایه‌منیشی به‌گه‌لیدا

منی هه‌ر تێدا ده‌هێڵێته‌وه‌

5

له‌پێده‌شتی هه‌رێمی سنگتا

له‌ناوچه‌شاخاوییه‌كانتا

كه‌ڕۆژگارێك جێگه‌و ڕێگه‌ی پێشمه‌رگه‌ی دڵم بووه‌

كه‌ڕۆژگارێك به‌رده‌وام ماڵم بووه‌

لێم خواردووه‌….

لێی یاریم كردووه‌…

لێی نووستوومه‌….

هونه‌رم ڵێی بردووه‌….

6

له‌ڕاگری ئه‌م ئه‌تله‌سه‌و كانی بوونیش

ئاسووده‌ییم هه‌م به‌تۆ هه‌م به‌خۆم چه‌شتووه‌

به‌ڵام بۆ پته‌وی و مانه‌وه‌ی نێوانمان وه‌كو جاران

گوڵه‌بێ چرۆكه‌ی ئه‌م كاره‌مان له‌زه‌وی دا ناشتووه‌

7

له‌بیابانه‌ به‌هارییه‌كی پشتیشت

گه‌رچی كه‌م گه‌ڕام

به‌ڵام سه‌رتاپای

ملیم به‌ملیم شاره‌زام

8

بۆیه‌گیانه‌كه‌م ئاگام له‌هه‌موو شتێكی نادیاری تۆیه‌

له‌خه‌یاڵ كردنت… له‌خه‌ون بینینت

له‌ده‌ربڕینی هه‌ر پیت و وشه‌یه‌كت

له‌خێر و شه‌ر.. له‌باش و خراپ

له‌پێدا هه‌ڵگووتن و له‌جوێنت

بۆیه‌ئازیزه‌كه‌م بۆ هه‌موو شوێنێكت چووم

بۆ دڵ …. مێشك ….

بۆ سیه‌كان … جگه‌ر …… هتد

ئه‌مه‌ش به‌هۆی بوونم له‌هه‌ناسه‌و خوێنت

ئارام 2012