ئەرسەلان مەحمود : ئەوەی ئەمرۆ لەم وڵاتەی ئێمەدا رو ئەدا، هەڵایساوێكی خۆرسكی گەلی نییە لەپێناو هێنانە ئاراوەی ژیانێكی باشتر بۆ خەڵك، ئاخر خۆ ئەم سروشتیبوونە كاتێ ڕو ئەدا، كۆمەڵگە وەك جەستەی مرۆڤێكی كەنەفت و پەتا گرتوو، ناڵەیبێ لەبێدەواو، دەرمانی.
نەخۆشیە هەمەكیەكانی كورد بەگشتی و، لەم هەرێمەدا بەتایبەتی، هێشتا لەباری ژینگەیی، یا مرۆیی و، جێگرییەوە، زۆرێك لەخوار داناوەی ئەو گەرمییەوەن و، ئارەقەی شەقامەكانی سلێمانی و، هاڵاوی هەولێر، لەبنەمادا كاردانەوەی ئەنفلۆنزای جەنگێكی شاراوەن لەسەر دەسەڵات.
ئەو پەتایەی نەوەرزو سات و سەردەم و بەرزی و نزمییەك بۆ بڵاوبوونەوە دەزانێ و، لانیكەم، دەیان ساڵە بووە بەدرمی ناو هزرو بیركردنەوەی سەری بەشێك لەسەركردەكانی ئەم میللەتەی ئێمەو، هەر دەساڵجارێ، لەپێناو خود پێشخستنی خۆیان لەسەر حسابی خود بەلاڕێدا بردنی كۆدا، هەڵدەداتەوەو، دەمانكەنەوە بەگژ یەكترداو، نامۆ بوون بەكتری لەناخماندا دەچێنن.
ئەگەرچی وەك ئەوەی فرێدریك باستیا، دەڵێ” خود بەلاڕێدابردنو خود پێشخستن، دو ئاوەزی ناو ناخی هەر مرۆڤێكن” لێ، نەگبەتیەكە بۆ مرۆڤی كورد لەوەدایە، سەركردەكانی، هەر كاتێك باهۆزی ئەم گژە بایە لەسەریاندا هەڵیكردبێ، هاتوون لەسەر حیسابی ئەوانیدی، تەسفییەی حساباتی سیاسیی خۆیانكردوەو، لەخود بەلارێدا بردنی تاكی كوردا، سڵییان لەهەر درۆینە تەبلیغاتێك نەكردوەتەوە.
تۆمارەكانی مێژوی ئێمە، شایەتی وەها راستینەیەكی نكۆڵیهەڵنەگرن” دو كەرت و، چەن كەرت بوونەكان، جەنگە خۆبەخوو ناوخۆییەكان، ڕەوكاریە جیاكان، ئەشكەنجەو، هەڵبجەو، قەڵادزێ، قۆرخكاریە بێشومارەكان” بەڵگەی رەگو ڕیشەیی ئەم ئاوەزە نەرێنەیەن و، لەرۆژگاری ئەمرۆدا وەك دەبینین، كاریگەرییەكانی بەجۆرێكن، یان ئەوەتا وایكردوە تاك بەژێر ئەو هەژموونەوە، هەستی ڕەوشتییانەی خۆی لەدەستبدات و، بێپەروا هەموو شتێ نادیبگرێ و، بوغز ببەشێتەوە، یاخود رێزی بۆ یاسا نەمێنێت و، سڵ لەسوكایەتیكردن بەجوانیەكان نەكاتەوە، هەركاتێكیش زەمینەی روخاندن و، تاڵانچێتی لەكارو بونیادنان ئاسانتر بوو، بێگومان بێمروەتانە مرۆڤەكان هانا دەبەنە بەر تێكشكاندن و، تاڵانو بڕۆ.
بەڵێ، دژوای ئەم ڤایرۆسە لەوەدا حەتمییەو، ئەنتی نەشتەرگەرییشە، ئەوەتا دوای ئەو هەموو خوێنە ڕژاوە، دوای ئەم هەموو كاتە خوراوە، دوای كرانەوە، دەوای لەدەرمانخانەكانی دیموكراسیەتیش دا، چنگ نەكەوت، هێشتاش ئەم ڤایرۆسە مەترسیەكانی لەوەدایە، توانای خۆ گونجاندنی هەیە لەگەڵ عاتیفەو، سروشتی خەڵكانێكی خاكی، مەیلی قۆرخكاری هەیەو، ڕەگیشی لەسەركێشیدایە، واوەیلا بۆ ئەو میللەتانەی وەها هەڵامەتێك، زهنیەتی سەركردەكانی، گیرۆدەی نەخۆشییەكی ئاوا كوشندەو، بۆماوەیی بووبێ.
