وشیار ئەحمەد ئەسوەد : لەم چەند ڕۆژەی دواییدا لە ماڵپەڕی چرا دوو نووسینی ورووژێنەر بڵاو بوونەوە، یەكیان بەقەڵەمی “دەرباز یونس” هێرشێكی توندە بۆ سەر كەناڵی ئاسمانیی “كەناڵ 4” و شەخسی ئەڤین ئاسۆی پێشكەشكار، هەروەها پڕیشكی ئەو هێرشە لە نزیكەوە بەر ئارامۆیش دەكەوێت.. ئەوی تریشیان بەقەڵەمی “ئازیز ئازاد” هێرشێكی توندترە بۆ سەر هونەرمەند هەڵكەوت زاهیر و كارە هونەرییەكانی، هەروەها پڕیشكەكانی بەر دەشنێش كەوتوون و گوایە ویستوویەتی وەڵامی دەرباز بداتەوە.. كە دەڵێم نووسینەكان ورووژێنەرن، بەو واتایە نا كە نووسینی پوخت و شیاو و ڕەخنەئامێز بن بەواتای ڕەخنە، چونكە ئەو دوو قەڵەمە تەنیا مەبەستیان لە نووسینەكانیان جنێوبارانكردنی یەكدییە، نەك ڕەخنەیەكی سوودمەند بۆ ئەو دوو لایەنەی شەڕەكەیانی لەسەر دەكەن.. ئەمەیە وا دەكات هەڵوەستە بكەین و هەرچی بكرێ هەوڵی ڕێگرتن بەمجۆرە نووسینە بێسەروبەرانە بدەین، بەبۆچوونی من ئەمەیش پتر بەهەڵكەوت زاهیر و ئارامۆ دەكرێت، ئەگەر بەپەراوێزخراویش بهێڵرێنەوە، پێموایە هەردوو ئەو بەڕێزانە سەروەرییەكانی خۆیان دەخەنە بەر مەترسییەوە.
لە نووسینەكەی دەرباز كە زۆر ئاشكرا شەڕفرۆشتنی بەئەڤین پێوە دیارە و مەبەستیەتی نقورچ لەو خانمە بدات، هاوكات لە ڕێگەشیەوە بەنموونە هێنانەوە بەناوی دەشنێ ئیستفزازی بكات، باس لە ڕۆشنبیریی ڕاگەیاندن دەكات، بێ ئەوەی خۆی شارەزاییەكی لەو بوارەدا هەبێت، یان بەشارەزاییەكی فەریكەوە خۆی لە قەرەی كارێك دەدات كە ئەسڵەن پێی هەڵناسووڕێت، كاتێكیش دەرباز ئەگەر لەو نووسینەشدا نەبێت، لە هەواڵە هونەرییەكاندا خۆی بەبەڕێوەبەری ڕاگەیاندنی كارە هونەرییەكانی هەڵكەوت زاهیر دەناسێنێت، گومان نییە لەوەی پڕیشكی هەڵەكانی دەرباز بەر هەڵكەوتیش دەكەوێت، ئەمە لە كاتێكدا ڕەنگە هەڵكەوت دوور و نزیك لەو كردارە بێئاگا بێت، لێرەوە جۆرێك لە حەساسییەت لەنێوان هەڵكەوت و ئارامۆ و هاوكات ئەڤین و دەشنێش دروست دەبێت.. ڕاستیتان دەوێت من دەرباز دەناسم و پێم وایە ئەو لە گەنجە بزێوەكانە و كاردۆستیشە، بەڵام هەڵسوكەوتێكی هەرزەییانەی لەگەڵ نووسینە ئیستفزازییەكەیدا كردووە، بۆیە بەڕاست دەرباز هەقی وایە خەریكی شیعرەكانی بێت باشترە لە قسەوباس لەو ڕاگەیاندنەی زۆری ماوە تێیدا قاڵ بێتەوە.
بەرامبەر بەوەیش “ئازیز ئازاد” كە ئەویش بەنووسینێكی هەرزەییانە هەڵكەوت و دەشنێ جنێوباران دەكات، لەوێوە تێدەگەین كە ئەم گەنجە دوور و نزیك پێوەندی نە بەبواری ڕاگەیاندن و نە هونەریشەوە نییە، ئازیز جارێ نەیتوانیوە بۆ شەخسی خۆیشی ئازیز بێت، كەچی تانە لە هەڵكەوت زاهیر و كارە هونەرییەكانی دەدات و بەعەرەبی ناوزەدیان دەكات، من دڵنیام ئەو نە لە موزیك و نە ستایلی گۆرانیش ناگات، بۆیە تەنیا مەبەستی بووە بۆ ڕازیكردنی ئەڤین و ئارامۆ، وەڵامی دەرباز بداتەوە و ئەو بەڕێزانە جنێوباران بكات، بەمەش لە هەموو پرەنسیپەكانی نووسین لای داوە.. ڕەنگە ئەو ئازیزە ئازاد بێت لەوەی چۆن كار لە میدیا دەكات و تا چەندیش بەئەڤین و ئارامۆ سەرسامە، بەڵام هەرگیز ئازاد نییە بەسووكایەتیكردن بەكەسانێك نە هاوشانی ئەون، نە شارەزاییشی لە بوارەكەیاندا هەیە، بۆیە ئەو نە ئازیزە و نە ئازاد، تەنیا كەسێكی بەستەزمانە.
لێرەوە دەهێنێ بەكورتی ئاماژە بەهەڵكەوت و ئارامۆ و ئەڤین و دەشنێ و كارەكانیان بدەم.. سەیرە كەسانێك بۆ دژایەتیكردنی ئارامۆ هەوڵ دەدەن هێڵی ڕاست و چەپی بەسەردا بهێنن و تەواوی داهێنانەكانی ئەو گەنجە لە میدیای هاوچەرخدا داپۆشن، ئەدی خۆ ئەگەر ئارامۆ هیچی بۆ میدیای كوردی نەكردبێت، لانیكەم یەكەمین كەس بووە كەناڵێكی تایبەتی ڕۆشنبیریی تەرفیهیی خزاندووەتە ناو میدیای كوردییەوە، بۆ ئەمەشیان دەهێنێ هەوڵەكانی بەرز ڕابگرین، ئەو گەنجە جیا لەوەی میدیاكارە، هاوكات هونەرمەندیشە، بۆیە بەئەقڵێكی هونەرمەندانەوە كار لە میدیای هاوچەرخدا دەكات و لە گەشەسەندنەكانی میدیای دنیایش بێئاگا نییە، كەواتە بەرگرتن بەهەوڵەكانی ئارامۆ، بەرگرتنە بەو داهێنانەی لە میدیای كوردیدا یەك لە پێویستییەكانە.
بۆ كەسانێكیش پێیان وا بێت هەڵكەوت زاهیر كارەكانی عەرەبین یان هیچی نەكردووە، ئەوە جیا لە نووستن لە گوێی گا، شتێكی تر لە هونەری مۆدێرن و هاوسەردەم نازانن، بۆیە تانەی كەسیی لێدەدەن، ئەدی هەڵكەوتیش لە هەرە دیارترین ئەو گەنجانەیە فێرگەیەكی گەورەی لانیكەم بۆ دەنگی گۆرانیی ئافرەتاكان دروست كردووە و پێیان دەگەیەنێت، ئەوەی هەڵكەوت لەم چەند ساڵەی دواییدا بۆ هونەری كوردی بەشێوەیەكی مۆدێرن كردوویەتی، بەتەواوی هونەرمەندانی قۆناغەكە نەكراوە.. كەواتە هەڵكەوت هەڵكەوتە و ئارامۆیش ئارامۆ، بۆیە بەلامانەوە جێگەی نیگەرانییە ئەگەر ئەم دوو بەڕێزە لەم جۆرە نووسینە هەرزەییانە ئاگاداربن و ختووكەیان پێ بێت.
ئەڤین ئاسۆ یەك لە پێشكەشكارە بەتواناكانی كوردستانە، دەشنێش بەهەمان شێوە لەم بوارەدا خاوەنی دنیایەك جوانییە، كەواتە هەردووكیان كۆمەڵێك جوانییان لە بوارەكەی خۆیاندا دروست كردووە، ئیدی كەی ڕەوایە ئەوە بەحەساسیەت وەربگیرێت كە كامیان لاسایی ئەویتریان دەكەنەوە، ڕاستیتان دەوێ ڕاگەیاندنی هاوچەرخی كوردی بوار و بابەتێكی زۆر نوێیە لە میدیای كوردیدا و هەموو ئەوانەی كاری تێدا دەكەن، لاسایی خەڵكانی تر دەكەنەوە، بەتایبەتیش كەناڵە ڕۆژئاواییەكان.. بۆیە كاتێك دەرباز دەڵێت ئەڤین لاسایی دەشنێ دەكاتەوە، دەكرێ بپرسین ئەی دەشنێ لاسایی كێ دەكاتەوە؟
من دەڵێم بەدەر لە نووسینە هەرزەییەكان، هەڵكەوت زاهیر و ئارامۆ هەریەكەیان خاوەنی دنیایەك جوانین، بۆیە پێویستە ئەو دوو بەڕێزە دیوە ناشیرینەكان پەراوێز بخەن و قسە لە جوانییەكان بكەن.. هاوكات ئەڤین و دەشنێیش هەمان ئەو جوانییانەیان بەردەكەوێت، ئەوان هەریەكەیان لە فۆڕم و بزاوێكدا جوانن، بۆیە جوانتر دەبن ئەگەر لە دەرەوەی مەكرە ژنانییەكاندا جوانییەكانی یەكدی ببینن، چونكە دواجار دەبێ هەموویان یەكتر قبووڵ بكەن.. ئەگەر نا، ناگونجێت هیچ یەكێك لەو بەڕێزانە باس لە داهێنان و جوانییەكانی هونەر و میدیای كوردی بكەن.
