بەرى چەند رۆژەکان کتێبەکا نڤیسەرێ گەنج کۆڤان خانکى کو کتێبا وى یا شەشێ یە دەربارەیى رەخنەیا ئەدەبى یا کوردى ب ناڤێ “کاغەزێن رەخنەیى، خوەندنێن پێکهاتەیى – سیمانتیکینە ژ بۆ چەند تەکستەکێن ئەدەبى” ل دهۆک هاتە وەشاندن کو ژ”175″ بەرپەران و شەش ڤەکۆلینان پێکهاتییە، ب ڤى رەنگى:
– خوەندنەکا پێکهاتەیى – تەکنیکى بۆ “قەولێ بەحرا” یێ قەولڤان “دەروێش قاتانى”.
– شعرا “شیعرێکى زۆر درێژ بۆ دایکم” یا “د. فەرهاد پیرباڵ”دخوەندنەکا شرۆڤەکارى- رەخنەیى دا.
– تەکستێ”شەرابى سپى” یێ “باریکان ئیسماعیلى” د لێکۆلینەکا فۆرمالیستى – سیمانتیکى دا.
– وێنەیێ ڕەگەزێ نێر دشعرا شاعیرێن مێ دا، ب پراکتیزەکرنا نموونەیێن “23” شاعیرێن کورد.
– سەرەدەرییا پرۆفیسۆر”بەدرخان سندى” ب خالبەندیێ رە ب پراکتیزەکرنا نموونەیێن شعرى ژ دیوانا وى “هۆزانڤانێ گوندێ پەریخانێ”.
– ڕەنگڤەدانا قەهرەمانێن ئێزدییان دشعرا کوردى دا.
مامۆستا “عەبدولخالق سولتان” د پێشگۆتنا ڤێ کتێبێ دا د بێژت: دەمێ من پەرتۆکا “کاغەزێن رەخنەیى” خواندى، بۆ من چەند خال دیاربون مینا:
– ڤەژاندنا کلتورێ ئێزدیاتیێ ب شێوەکێ رەخنەیى یێ جوان و ب زمانەکێ سەردەمانە کو پرانیا خواندەڤانان مفایى ژێ وەربگرن ب تایبەتى دەمێ ب هوورى قەولێ بەحرا یێ دەروێشێ قاتانى شروڤەدکەت و هەمى ئیدیەم و تێگەهێن وى ب شێوەکێ سادە ددەتە خویاکرن.
– گرنگیدان ب رێبازا بونیاتگەرى بۆ شروڤەکرنا بابەتێن خو و مفا وەرگرتن ژ وان رێبازێن دى یێن ئەدەبى هەر ئێک ب چەندیەکێ و ب رێژەیەکێ.
دیسان د ڤێ کتێبێ دا سولتان دبێژت: د ڤێ پرتوکێدا “کۆڤان” شیایە ب شێوەکێ سەرکەفتیانە ئەو رامانێن ل پشت پەیڤ و رستان ب دەتە ئاشکەراکرن، زێدەبارى دیارکرنا گەلەک بۆچۆنێن کەسوکى کو نڤیسەر ب شیانێن خو یێن هزرى و ئالاڤێن ئەدەبى و ئەکادیمى گەهشتیێ و ب دیتنا من ئەڤە کارەکێ زۆر جوانە و پێدڤى ماندیبونەکا هزرى یا کوورە و گروڤەیە کو “کۆڤان” خودان مێشکەکێ کارایە و پرانیا ئالیێن هەلبەستێ دخوینیت هەر ژ ئالیێ شێوازى و فۆرمى و تا دگەهیتە ناڤەرۆکێ.
هەر وەسا نڤیسەرى ب وێرەکى خو ل هەلبەستا ژنێ کریە خودان و شیایە خو د ناڤ جیهانا وان دا بەردەت و بۆ خواندەڤانى نهێنیێن ڕەگەزێ مێ ب دەتە خویاکرن ب تایبەتى دەمێ ل سەر هەلبەستا تریفە دوسکى د راوەستیت.
دیسا ب دیتنا مامۆستا عەبدولخالق سولتان چەلەنگیا خودانێ پرتوکا “کاغەزێن رەخنەیى” د گۆتارا ل سەر هەلبەستا د. فەرهاد پیربال نڤیسى دا دیار دبیت ژ بەر کو هەلبەستا وى ب تنێ ژ دوو پەیڤان پێکهاتیە، لێ نڤیسەر شیایە ڤەکۆلینەکا تێر و تەسەل ل سەر بنڤێسیت.
بۆ زانین بەرى ڤى بەرهەمى نڤیسکارى ئەڤ کتێبێن ل خوارێ وەشاندنە:
1. گۆتنێن مەزنان دهۆزانا جەگەرخوین دە. خواندنەکە ژ بۆ تەڤ دیوانێن وى. (ڤەکۆلین/2008).
2. دڕێیا ئەدەب و رەخنە یا ئەدەبى یا کوردى دا. (گۆتار و ڤەکۆلینایە/2009).
3. کارتێکرنا ئێزدیاتیێ ل سەر هەلبەستا جەگەرخوین. لێکۆلینەکە ژ بۆ تەڤ دیوانێن وى. (ڤەکۆلین/ 2009).
4. باندۆرا ئێزدیاتیێ ل سەر رۆمانا هاوارا دیجلە یا محەمەد ئۆزۆن. (ڤەکۆلین/20009).
5. ئانالیزا قەولێن ئێزدیان (ڤەکۆلین ب لاتینى – ستەمبۆل/2009 د گەل د. خانا ئۆمەرخالى).
