به‌پێی ئاژانسی کوردستان بۆ ده‌نگووباس ئه‌مرۆ پێنج شه‌م رایگه‌یاند که دوو سەنتەری چالاك لە بواری باری رۆژنامەوانی لە هەرێمی كوردستاندا لە راپۆرتێكدا چەند كەموكوڕییەك دەخەنە ڕوو، رەخنە لە چۆنیەتی دەستخستنی مەودای ئازادی رۆژنامەوانی دەگرن.
سەندیكای رۆژنامەنووسانی كوردستان لە راپۆرتی چوارەمی سەندیكای رۆژنامەنووسانی كوردستان لە ماوەی شەش مانگی ساڵی 2009 چەند زانیارییەكی بڵاوكردەوە لە بارەی باری رۆژنامەوانی و پێشێلكارییەكانی ئازادی رۆژنامەوانی لە هەرێمی كوردستان.
لەو راپۆرتەدا هاتووە ” رۆژى 2/8/2009 لەكاتى سازكردنى كۆنگرەیەكى رۆژنامەنووسى لەشارۆچكەى دوكان لەنێوان بەرێزان مام جەلال سەرۆك كۆمارى عێراقی فیدراڵ و نورى مالیكى سەرۆك وەزیرانى عێراقی فیدراڵ رێگە نادرێت تیمى كەناڵى KNN و رۆژنامەى رۆژنامە و تەلەفیزیۆنى پەیام بەشدارى بكەن، لەمبارەیەوە پاش پەیوەندیكردن بەسكرتێرى رۆژنامەوانى بەرێز مام جەلال وتى” ئەوە هۆكارێكى تەكنیكى بووە”.
سەنتەری میترۆ بۆ راوێژ و داكۆكی لە رۆژنامەنووسان نیگەرانی دەردەبڕێت بەرامبەر بەداخستنی سەرچاوەكانی هەواڵ و دانانی بەربەست لە لایەن بەرپرسان و داوودەزگەكانی حكوومەت بەڕووی رۆژنامەنووساندا.
رەحمان غەریب بەرپرسى پێوەندى و بەدواداچوون و داكۆكیكردن لە مافى رۆژنامەنووسان بۆ ئاژانسی كوردستان بۆ دەنگوباس (ئاكانیوز) گوتى ” چەند رۆژنامەنووسێك پێوەندییان بەسەنتەری میترۆوە كردووە و لە بارەی بەو بەربەستانەی بەرپرسانی داوودەزگەكانی حكوومەتی هەرێمی كوردستان لە بەردەم كاری رۆژنامەنووسی دایدەنێن بۆ دەستكەوتنی زانیاری. چەندان رۆژنامەنووس بەسەنتەری میترۆیان راگەیاندووە كە زۆر لە كارمەندان و بەرپرسانی دەزگە جیاوازەكان داوای پێدانی زانیاری و چاوپێكەوتن رەت دەكەنەوە بەپاساوی ئەوەی (لە سەرەوە فرمانیان پێ كراوە) یان (فرمانی وەزیرە)”.
هەروەها گوتی “سەنتەری میترۆ بۆ داكۆكیكردن لە رۆژنامەنووسان داوا دەكات لایەنە بەرپرسەكان رێز لە یاسای كاری رۆژنامەنووسی بگرن كە مافی دەستكەوتنی زانیاری داوەتە رۆژنامەنووسان، داخستنی سەرچاوەكانی زانیاری بەڕووی رۆژنامەنووساندا پێشێلكردنی مافی خەڵكە لە بەئاگابوون لە رووداوەكانی رۆژ و ئەو بابەتانەی كە پێوەندییان بەژیان و داهاتووەوە هەیە.”
هەروەها روونی كردەوە كە بەپێی بڕگەی دووەم لە ماددەی دوو لە یاسای كاری رۆژنامەنووسی ژمارە 35ی ساڵی 2007، “رۆژنامەنووس بە پێی یاسا بۆی هەیە لە سەرچاوە جیاوازەكانەوە هەر زانیارییەك كە بایەخی بۆ هاولاَتیان هەبێت و پێوەندییان بە بەرژەوەندی گشتییەوە هەبێت، بەدەست بێنیێ.”
لە بەرامبەریشدا تامان شاكر گوتیارى وەزارەتى رۆشەنبیرى حكوومەتى هەرێمى كوردستان گوتى “ئێمە وەك وەزارەتى رۆشەنبیرى حكوومەتى هەرێمى كوردستان خۆمان بەخەمخۆرى مافەكانى رۆژنامەنووسان دەزانین و پێمان باشە سەرجەم داوودەزگەكان لە بەرامبەر رۆژنامەنووسى چالاك كراوەبێت”.
هەروەها گوتی “هەرچەندە یاسای كارى رۆژنامەنووسى لە هەرێمى كوردستان بەتەواوەتى پیادەنە كراوە، بەڵام لەو باوەرەشدا نیم كە بەرپرسانى حكوومەت دەرگەى زانیارى لە بەردەم رۆژنامەنووسان دابخەن، پێویستە سەنتەرى میترۆ بۆ داكۆكیكردن لە مافى رۆژنامەنووسان ئەو لایەنە دیارى بكات كەدەرگەى زانیارى لەسەر رۆژنامەنووسان دادەخەن، بۆ ئەوەى حكوومەت لێكۆڵینەوەى لەسەر بكات”.
لە هەمان كاتدا هۆگر غەریب دەستەى دامەزرینەرى سەنتەرى پرێس بۆ داكۆكیكردن لە مافى رۆژنامەنووسان لە شارى هەولێر بە (ئاكانیوز)ی راگەیاند “بەداخەوە وەك تێبینی دەكەین لە لایەن چەند داوودەزگەیەكى حكوومەت دەرگەى زانیارى بەسەر رۆژنامەنووسان دادەخرێت، یاخوود بانگێشتى چالاكی و كۆنفرانس و كۆنگرە رۆژنامەوانییەكان ناكرێن.ئەمەش نیگەرانى لە لایەن رۆژنامەنووسانی دەزگەكانى راگەیاندن دروست كردەوە”.
هەروەها گوتی ” ئێمە وەك سەنتەری پرێس بۆ داكۆكیكردن لە رۆژنامەنووسان دووپاتی دەكەینەوە كە ئەم كارە پێچەوانەی یاسای كاری رۆژنامەگەرییە و گومان دەخاتە سەر بێلایەنیی ئەم جۆرە دەزگەیانە”.
لە لایەكى ترەوە عەلى كەریم نووسەر و رۆژنامەنووس بەرپرسى پرۆگرامى میدیاى ئازاد بە(ئاكانیوز) گوت “لە ماوەى 3 ساڵى رابردوودا زۆر كەم كار بەیاساى رۆژنامەگەرى كراوە نەك تەنیا لە لایەن دەزگە ئەمنییەكانەوە بگرە لە لایەن دادوەرانیشەوە، ئەویش بەبیانووى ئاگادار نەبوون لە یاساكە، لە راپۆرتەكانى پرۆگرامى میدیاى ئازاد سەر بە (KIHR) لە ربارەى رەوشى رۆژنامەنووسى چەندان حاڵەتی كار نەكردن بەیاساكە لە دادگایەكاندا تۆمار كراوە و چەندان رۆژنامەنووس بەماوەى جیاجیا بەندكراون. واتە بەیاساى سزادانى عێراقى مامەلەیان لەگەڵدا كراوە، ئەمەش پاشەكشەى دیموكراسى و دەربرینى ئازادە”.
لە بارەى قۆرخ كردن و داخستنى سەرچاوەى زانیارى لە رۆژنامەنووسان ناوبراو گوتى “داخستنى سەرچاوەى زانیارى لە رۆژنامەنووسان نەك هەر لەگەڵ ئەو بڕگە یاساییە ناگونجێ بگرە لەگەڵ دیموكراسى و مافى مرۆڤیش تاسەر ئێسقان ناكۆكە، دژە بەبانگەشە و گوتارى راگەیەنراوى دەسەڵات، ناكۆكە لەگەڵ بەرنامەى بەیانكراوى كارى حكوومەت”.
هەروەها گوتی “حكوومەت ئێستە لە دووڕیانێكدایە یان ئەوەتا دەبێ بەردەوام بیت لەسەر ناشەفافیەت و داخراوى، كە بەمەش بێ متمانەیی خەڵك لە دەست دەدا و لەگەڵ هاوڵاتیاندا لێكدابڕاوى دروست دەكا و بەمەش بەردەوام دەبێت لە گەندەڵى، یان ئەوەتا دەبێت كرانەوەى راستەقینەوەی هەبێت بۆ دەستەبەركردنى مافى زانیارى لەسەر پرس و بابەتە پێوەستەكان بەژیانى خەڵكەوە، كە بەمەش دیموكراسیەت و هاوڵاتى بوون دێتە كایەوە ئەم حاڵە رێگە راستەكەیە و ماف و خواستى گەلى كوردستانە”.
س : ئاكانیوز
