فیستیڤاڵی (چاند و هونەری شارەدەری دیار بەكر) لەلایەن شارەوانی دیار بەكر سازكرابوو، چالاكییەكانی ئەو فیستیڤاڵە لە (1- 6 تاوەكو 6- 6- 2010) بەڕێوەچوو، لەو فیستیڤاڵەدا نزیكەی (40) چالاكی جۆراو جۆر، كە لە پێشنگای فۆتۆگرافی و كاریكاتێری و كۆڕی شیعری و لێكۆڵینەوە و نمایشی شانۆگەری، لەگەڵ نیشاندانی چەندیین كورتە فیلم و هەروەها نمایشكردنی ئیش كاری زیندانیان و چەندیین چالاكی دیكەی هونەری و رۆشنبیری لە خۆی گرتبوو.
شاعیر (سەركەوت رەسوڵ) یەكێك بوو لە بەشداربووانی ئەم فیستیڤاڵە، لەمیانەی لێدوانێكی دا راگەیاند : “بەداوەتنامەیەكی فەرمی كە لەلایەن شارەوانی بەدەستم گەیشت، لەسەرەتای مانگی حوزێراندا، وەك شاعیرێك لە باشووری كوردستان بەشدارییم كرد، لەچالاكییەكانی فیستیڤاڵی (چاند و هونەری شارەدەری دیار بەكر)، كە ساڵانە لە شاری دیار بەكر ساز دەكرێت، لەو فیستیڤاڵەدا چەندیین شاعیر و رووناكبیر و هونەرمەندانی كورد لە هەر چوار پارچەی كوردستان بانگهێشت كرابوو، هەروەها چەندیین هونەرمەندی بیانی لەوڵاتی (فەرنسا، تونس، میسر) ئامادەی ئەو فیستیڤاڵە بوون”.
(سەركەوت) لە بەشێكی دیكەی لێدوانەكەی دا دەربارەی ئەو فیستیڤاڵە گوتیشی : “ئامانجی ساز كردنی ئەو فیستیڤاڵە بۆ ئەوەبوو، پەرە بەزمانی كوردی بدرێت لەنووسین و بەرهەمە هونەرییەكاندا، هەروەها لێك نزیكبوونەوەی هونەرمەندان و رۆشنبیرانی كورد، لە هەرچوار پارچەی كوردستان”.
دەربارەی ئەو چالاكییەكانەی كە ئەنجامی داوە لەو فیستیڤاڵەدا شاعیر (سەركەوت رەسوڵ) ئاماژەی بۆ كرد و گوتی : “بە دوو بەرهەمی جیاواز بەشداریی چالاكییەكانی ئەو فیستیڤاڵەم كرد، كە یەكێكیان تایبەت بوو زمانی لێكۆڵینەوەی ئەدەبی لەسەر شاعیری ناوداری كورد (فەقێ تەیران)، هەروەها ووتارێكی مامۆستا (فەلەكەدین كاكەی)، كە نەی توانی لەوێ ئامادە بێت، من لە جیاتی ئەو خوێندمەوە، جگە لەوەش لە كۆڕێكی شیعری بەشدارییم كرد، كە بە نوێنەرایەتی كوردستانی باشوور تەنیا من شیعرم تێدا خوێندەوە، هەروەها (9) شاعیری دیكە هاوڕێ لەگەڵ من ئەوانیش كۆڕی شیعرییان هەبوو، كە پێكهاتبوون لە (ئەڤین شكاك، یاسین حوسێن، نەسرین ئەحمەد و هۆشەنگ ئۆسی لە كوردستانی باشووری بچووك – سوریا، بەهزات كوردستانی لە كوردستانی رۆژهەڵات – ئێران، نەوازد ڤاریلی، لال لالش، عیرفان ئەحمەد و حەمید گەیلانی كوردستانی باكوور- توركیا)”.
(سەركەوت) دەربارەی شێواز و رێكخستن و چۆنیەتی بەڕێوەچووی ئەو فیستیڤاڵە گوتی : “ئەو فیستیڤاڵە بە شێوازێكی جوان و بە ئیدرایەكی زۆر رێك بەڕێوە دەچوو، هەروەها چالاكییەكان هەر هەموویان بە شێوازێكی زۆر مۆدێرن بەڕێوەچوون، بەڕاستی من زۆر پێی سەرسام بووم. وای دەبینم بزاڤێكی گەورەی رۆشنبیری و هونەریی لە دیار بەكر بەڕێوەیە، كە پێم وایە لە داهاتوودا كاری زۆر باشی لێ ئەنجام دەدرێت، چونكە لەوێ ئەنسیتیتۆی زۆر باش و سەنتەری لێكۆڵینەوە دەربارەی زمان و ئەدەبی كوردی كراوەتەوە لەوێ، كە چاوەڕێی چالاكی گەورەتریان لێدەكرێت”.
(سەركەوت رەسوڵ) لە بەشێكی دیكەی لێدوانەكەی دا ئاماژەی بۆ دیار نەبوونی راگەیاندنی كوردیی كرد، بەتایبەتی راگەیاندنەكانی كوردستانی خۆمان و گوتی : “بەداخەوە راگەیاندنی كوردیی بەتایبەتی راگەیاندنی كوردستانی خۆمان زۆر بێ هەواڵ بوو لەو چالاكییانەی لە ماوەی ئەو چەند رۆژەدا بەڕێوەچوون، چونكە بەڕاستی ئەو رووداوە لە باكووری كوردستان و بە زمانی كوردی بە ئامادەبوونی ئەو هەموو هونەرمەند و رۆشنبیرەی كورد، جێگای سەرسوڕمانە راگەیاندن ئاگای لێنەبێت، ئیتر نازانم هۆكارەكەی چیە ئایا گرنگی پێ نادرێت ئەو جۆرە چالاكیانە، ئەوەی من زانیاری لەبارەیەوە هەبێت راگەیاندنەكانی ئێمەیان ئاگادار كردبۆوە، ئیتر نازانم كەم و كوریەكە لەكامیانە، بەهەر حاڵ رۆژنامەنووس (هونەر عومەر) كە ئەویش لە شاری هەولێرەوە هاتبوو لەوێ ئەو چالاكیانەی بەچاوی خۆی بینووە، ئەویش دەزانێ ئەو فیستیڤاڵە چەندە گرنگی هەبوو، ئیتر هیوادارم راگەیاندنەكانمان ئەگەر چالاكییەكی لەو جۆرە لە هەر پارچەیەكی كوردستان بەڕێوەچوو، گرنگی پێ بدەن”.
لە كۆتایی دا شاعیر (سەركەوت رەسوڵ) گوتی : “هیوادارم ئێمەش لە كوردستانی خۆمان، بەتایبەتی ئێمە لە وەزارەتی رۆشنبیری لەمەودوا بیرۆكەی لەو جۆرە گەڵاڵە بكەین، بۆ ئەوەی بتوانین فیستیڤاڵێكی سەرتاسەری ساز بكەین بۆ رۆشنبیران و هونەرمەندانی كورد، چونكە بەڕاستی بە تەنیا شارەوانیەكی بچووك لەوڵاتی توركیا هەڵبستێ بەساز كردنی ئەو جۆرە فیستیڤاڵانە، دەبێ بیر لەكارێك بكەینەوە كە شایستەی ئەوە بێت بڵێن ئێمەش دەتوانین فیستیڤاڵی لەو جۆرانە ساز بكەین”.
عەبدولغەفار عەبدوڵڵا
