هونەرمەندانی تاراوگە بە تایبەتی لەوڵاتی سوید شۆرشێکی گەورەیان بەرپا کرد و توانیان قۆناغێکی تازە بهێننە نێو قۆناغی هونەری گۆرانی کوردی !!
سەرجەم ئەو بەرهەمانەی پێش کەشم کردووە، هەموویان لە سەر ئەرک و ماندوو بونی خۆم بووە، پارەکەشی تەنها بە ئارەقەی ناوچەوانی خۆم دابین کراوە !!
هونەرمەندی گۆرانیبێژ (ئەیاد حوسێن) لەوماوەیەی رابردوودا بەسەردانێک گەڕایەوە بۆ کوردستان، هونەرمەندە ماوەی زیاتر لە (14) ساڵە لە هەندەران ژیان بەسەر دەبات، (ئەیاد) خاوەنی دەنگێکی جوانی هونەرییە و توانیویەتی لە رێگەی بەرهەمەکانی دا، ئەو سەرنجێکی باشی جەماوەری هونەر دۆست بەلای خۆیی دا رابکێشێت، بەر لەگەڕانەوەی جارێکی دیکە بۆ تاراووگە لە میانەی دیداێکدا لەگەڵ هونەرمەند (ئەیاد حوسێن) بۆ خوێنەرانی هەفتە نامەی “هونەری هەولێر” چەند ساتێک روو بەرووی چەند پرسیارێکمان کردەوە، لەمیانەی ئەو پرسیارانەدا (ئەیاد حوسێن)ـی گۆرانیبێژ ئاماژە بۆ کارە هونەرییەکانی و پرۆژەی داهاتوویی خۆیی و رەوشی کاری هونەری لە تاراوگە، بەتایبەتی لە وڵاتی سوێد و چەند لایەنێکی دیکە ئاماژە بۆ کرد.
– ماوەی چەند رۆژێکە لە کوردستانی، هاتنەوەکەی ئەم جارەت بۆ ئەنجامدانی کارە هونەرییەکانت بوو، یاخوود تەنها بۆ سەردان بوو ؟
ئەیاد : “هاتنەوەکەم لەسەر داوەتنامەیەک بوو، بۆ مەبەستی بەشداریی کردن لە چەند پرۆگرامێکی هونەری تەلفزیۆنی، هەروەها بەشدارییم کرد لە ئاهەنگێک، کە تایبەت بوو بۆ هەڵمەتەکانی هەڵبژاردنی ئەم جارە پەرلەمانی عێراق، کە هیوادارم هەموو تاکێکی کورد لە رۆژی هەڵبژاردندا بەشداریی بکات، جگە لەوانەش لەگەڵ چەند لایەنێکی پەیوەندی دار باسی چەند کار و پرۆژەیەکی هونەرییم پێشنیار کردووە، کە هیوادارم ئەنجامی باشی هەبێت”.
– ماوەیەکە زۆر لە هونەرمەندان بڕیاری یەکجارییان داوە و هەندەرانیان بەجێ هێشتووە هاتوونەتەوە بۆ کوردستان، تۆش بەنیازی ئەوە نیت بێتەوە بەیەکجاری ؟
ئەیاد : “دەمێکە بیرم لەوە کردۆتەوە بەیەکجاری بگەڕێمەوە بۆ کوردستان، ئەگەر هاتوو کارێکم بۆم دابین بکریت و بۆ ئەوەی بتوانم لە کوردستان بژیم و درێژە بەکارە هونەرییەکانم بدەم دەگەڕێمەوە، بەڵام تائێستا بڕیاری هاتنەوەم نەداوە،چونکە ئەوەی من مەبەستمە جارێ نەهاتۆتە بوون، بەڵام پلانم بۆ ئەوە هەر لە مێشکم دایە کە بگەڕێمەوە بە یەکجاری”.
– پێت وانیە حکومەت پێویستە کارێک بکات، بۆ ئەوەی هونەرمەندانی کورد لە تاراوگە بهێنێتەوە بۆ کوردستان، بۆ ئەوەی سوود لە ئەزموون و توانای هونەریان و هەروەها بوونی ئەوان لەوڵاتی خۆیان بارودۆخی هونەریی بەرەو ئاستێکی باشتر دەبات ؟
ئەیاد : “بێگومان لەگەڵ قسەکانی تۆدام، پێم وایە ئەوە ئەگەر بکرێتە پێشنیارێک و بخرێتە بواری جێ بەجێکردنەوە کارێکی زۆر بەجێیە، چونکە من دەزانم چەند هونەرمەندی بەتوانامان هەیە لە تاراوگە، کە ئێستاکە لەماڵەکەی خۆیان دانیشتوون و خاوەنی سلیقەی زۆر جوانی هونەریین، لەماوەی ئەو چەند ساڵەی کە لە هەندەرانن ئەزموونی زۆر باش فێربوون و دەتوانن لەکوردستان رەوشی هونەری کوردی بەرەو ئاستێکی زۆرباش ببەن، نەک هەر چینی هونەرمەندان بەڵکو رەوەندی کورد لە تاراوگە زۆربەیان خاوەنی بروانامەی زۆر باشن لە زۆر بواردا دەکرێ بیان هێننەوە سوودیان لێوەر بگیرێت”.
– ماوەیەکی زۆر لە وڵاتی سوید گەرمو گوڕیەکی باش هەبوو بۆ کاری هونەری، بەڵام ماوەیەکە ساردبوونەوەیەک هەیە و وەک جاران ئەو جمو جۆڵە نابیندرێت بۆچی ؟
ئەیاد : “راستە ئەو ساردبوونەوە هەیە، هۆکارەکەشی تەنها بۆ ئەوە دەگەڕێتەوە، ئێمە چەند ساڵە هاوار دەکەین داوا دەکەین، لە حکومەتی هەرێمی کوردستان تکایە بڕیارێک دەر بکەن مافی هونەرمەندان بپارێزن، بۆ نموونە نەمانی کۆپی کردنی سیدیەکانی ئێمەی هونەرمەندان، کە بەهەزار دەردەسەری و ماندوو بوون ئەو بەرهەمانەمان دێتە بوون و پاشان نابین بە خاوەنی هیچ، هونەرمەندانی تاراوگە بە تایبەتی وڵاتی سوید شۆرشێکی گەورەیان بەرپا کرد بۆ قۆناغێکی تازەی هونەری گۆرانی کوردی، چەندیین هونەرمەندی بەتوانا و لێهاتوو کاری زۆر باش و جوانیان هێنایە بوون هەر لە گۆرانیبێژان موزیکژەنان ئاواز دانان کاری ستۆدیۆ، تەنانەت ئێمەی هونەرمەندان وامان لێهاتبوو خەمی کاری تەلفزیۆنەکانیشمان دەخوارد و پرۆگرامی زۆر باش و جوانی هونەرییمان بۆ رێکدەخستن، بەڵام بەداخەوە ئەو ماندوو بونانەی ئێمە هەمووی بە فیرۆ چوو، بۆیە هونەرمەندەکان تووشی ئەو ساردبوونەوەیە بوون، ناشکرێ هونەرمەند بە بێ هەبوونی هیچ هاندانێک بەردەوام بێت لەکاری بەرهەم هێنانی گۆرانی”.
– زۆر جار دەبیستین هونەرمەندانی گۆرانیبێژ لەلایەن حکومەتەوە یاخوود وەزارەتی رۆشنبیری هاوکاری کردوون بۆ بەرهەم هێنانی گۆرانییەکانیان تۆ تائێستا هاوکاری نەکراوی ؟
ئەیاد : “سەرجەم ئەو بەرهەمانەی پێش کەشم کردووە، هەموویان لە سەر ئەرک و ماندوو بونی خۆم بووە، پارەکەشی تەنها بە ئارەقەی ناوچەوانی خۆم دابین کراوە، تا ئێستا بۆ بەرهەم هێنانی یەک گۆرانی یەک کیلپ هاوکاریی نەکراوە، بۆیە من جگە لەکاری هونەری سەرقاڵی کار دیکەشم بۆ ئەوەی بتوانم بژێوی ژیانم دابین بکەم”.
– قۆناغی هونەری کوردی فراوانیەکی زۆری بەخۆیەوە دیووە، پێت وانیە کاتی ئەوە هاتووە دەزگایەک هەبێت بۆ ئەوەی هونەرمەندان کۆبکاتەوە و لە ژێر یەک چەتردا مافی هونەرمەندان و بەرگری کردن لە هونەرەکەیان لە چوار چێوەی ئەو دەزگایەدا کاری بۆ بکرێت ؟
ئەیاد : “بێگومان زۆر گرنگە حکومەتی هەرێم کارێک بکات. بۆ ئەوەی هونەری کوردی و هونەرمەندانیشی لەو سەرگەردانییە رزگار بکات، ئێمەی هونەرمەندانی سوید، بەر لە شەش ساڵ بیرمان لەوە کردەوە لقێکی رێکخراوێکی هونەرمەندان لەوڵاتی سوید دروست بکەین، بۆ ئەو مەبەستە هاتمەوە بۆ کوردستان، پێویستمان بە پشتکگیری حکومەتی هەرێم هەبوو، بەڵام بەداخەوە پرسیار ئەوەیە نازانم بۆچی ئەو داواکاریانەی ئێمە هەمان بووە نازانم بۆچی ناچێتە بواری جێ بەجێکردنەوە ؟ من پێم وایە نەک هونەری گۆرانی کوردیی، بەڵکو شانۆ و سینەمای کوردیش بەرەو ئەو ئاستە چووە. کە خەریکە خەڵک بیری دەچێتەوە، بەداخەوە نەدەبوو بەو شێوەیە بوایە، بۆیە داوا دەکەم هیوادارم لەمەو دوا پلانێک یاخوود بیرکردنەوەیەکی تایبەت هەبێت بۆ هونەر و هونەرمەندان، چونکە بەداخەوە تائێستا نەمان بینیووە پلانێکی باش و تۆکمەی هەبێت بۆ هونەر بەگشتی، بەڵام هەر هونەرە دەتوانێ چەندیین سنوور و چەندیین وڵات ببڕێ ئەوەی بەجیهانی دەروەمان بناسێنێت”.
– ئەگەر بێمە سەر چەند لایەنێک لەکارە هونەرییەکانت، ماوەیەکە ئەوەمان بیستووە کە (ئەیاد حوسێن) لەمەودوا بیر لەوە ناکەیتەوە گۆرانی بە شێوەی ئەلبوم بەرهەم بهێنیت بۆچی ؟
ئەیاد : “بەڵی وایە من جارێ هەڵوستیەکم کردووە، لەسەر بەرهەم هێنانی گۆرانی و بەشێوەی سیدی بڵاوی بکەمەوە، چونکە لە ئەزموونی بڵاو کردنەوەی (2) ئەلبومی رابردووم بۆم دەرکەوت. کە کاری بەرهەم هێنانی ئەلبومێکی گۆرانی و بڵاو کردنەوەی تەنها ماندوو بونێکە بۆ ئێمەی هونەرمەند دەمێنێتەوە، جگە لەوانەش دەمەوێ زۆر بەراشکاوانە ئەوە بلێم تاوانی من تەنها ئەوەیە من خەڵکی شاری هەولێرم بۆیە کارم بۆ نەکراوە، لەوانەیە ئەگەر خەڵکی ئەو شارە نەبومایە کار بۆ منیش بکرابوایە وەکو زۆرێک لە هونەرمەندان، ئێستاکەش بۆ بەرهەم هێنانی ئەلبومێک توانای ئەو بڕ پارەیەم نیە تا ئەو کاتەی کەمن قیە بۆ ئێوە دەکەم ئەوە بریاری منە کە ناتوانم ئەلبومێکی گۆرانی بەرهەم بهێنم، بەڵام لەوانەیە لەمەودوا گۆرانییەکانم بە شێوەی تاک تاکە تۆمار دەکەم و کاری کلیپی بۆ ئەنجام دەدەم”.
– ئەو هەموو بێزاریەی کە دەری دەبڕی کە لەچوار چێوەی هونەردا بەسەرت هاتووە، نەگیشتویتە ئەو بڕیاڕەی رۆژێک لە رۆژان بڵێی واز لەکاری هونەری بهێنی ؟
ئەیاد : “نەخێر نەگیشتوومەتە ئەو بڕیارە. هەرچەندە بێزاربم هاوکاری نەکریش نەکرێم بۆ بەرهەمەکانم ناتوانم واز لەکاری هونەریی بهێنم، چونکە من لەگەڵ هونەر گەورە بووم و ژیاوم بەبێ هونەر من واهەست دەکەم ژیان ئەو تام و چێژە نابەخشێت بۆ من”.
– ئەگەر بێمە سەر پرسیارێکی زۆر تایبەت، ماوەیەکە چوویتە نێو ژیانی هاوسەرگیریەوە، دەمەوێ ئەوە بپرسم چوونە نێو ژیانی هاوسەریی و ئەو خانمەی بووەتە هاوسەری ژیانت تاچەند پاڵپشتیت دەکات لەکارە هونەرییەکانت ؟
ئەیاد : “گومان لەوەدانیە چوونە نێو ژیانی هاوسەری قۆناغێکی تازەیە لەبەردەم هەموو مرۆڤێکدا، ئەوەی گرنگە کە لە دوایی دا دەگاتە ئەو ئاستەی کە بەیەکەوە دەست بە ژیان دەکەن، ئەو کاتە بۆت دەردەکەوێ کە هاوسەرەکەت هاوکاریی و پاڵپشتیت دەکات لەو بوارەی کە هەر پیاوێک ئارەزووی لێدەکات، منیش کە هونەرمەندم و کاری هونەری ئەنجام دەدەم، بە خۆشحاڵیەوە هاوسەرەکەم زۆر هانم دەدات کە پەرە بە هونەرەکەم بدەم و بەردەوام بم لەکاری هونەری، بەردەوام حەز لەوە دەکات ئەلبومی تازە و کلیپی تازەم هەبێت، دیارە منیش لەبەرامبەر ئەو هەستە جوانەی ئەو سوپاس گوزاری خۆمی ئاڕاستە دەکەم”.
– هاوسەرەکەت لە هیچ لە بوارەکانی هونەر نزیکە ؟
ئەیاد : “ئەو زیاتر حەز بەکاری میدیا دەکات، ئارەزووی ئەوەیە لەکاری راگەیاندن نزیک ببێتەوە، وەک هونەریش گوێچکەیەکی زۆر مۆسیقی هەیە و گوێگرێکی زۆرباشی مۆسیقایە”.
– زۆر جار دەبیستین لە ئاهەنگ و بۆنەکان (ئەیاد حوسێن) جگە لە زمانی کوردی بە زمانی دیکەش گۆرانی دەڵێت، لەبەرنامەت دانیە لەکارەکانی داهاتوودا گۆرانی بە زمانی دیکەش تۆمار بکەیت ؟
ئەیاد : “زۆر جار ئەو داوایەم لێکراوە کە جگە لەزمانی کوردیی بەزمانی دیکەش گۆرانی بڵێم، بەڵام لە ئەنجامەکەی دەترسم و زۆر دوور دەڕوانم لە بەرامبەر ئەو بابەتە، ئەوەیش ترسەکەم تەنها بۆ ئەوەیە نەوەک خەڵکانێک بە زمانی نیشتمان پەروەری رەخنەی جۆراو جۆرم ئاڕاستە بکەن،بەڵام زۆر لە روانگەیەکی دیکەوە بۆ چوونم وایە، دەڵێم ئەگەر ئەلبومێک بە زمانی تورکی یاخوود عەرەبی تۆمار بکەم لەوانە رێزم زیاتر بگرن، چونکە بینویمانە چەندە رێزی هونەرمەندانی بێگانە گیراوە لە وڵاتی خۆمان و لە سەر حیسابی هونەرمەندانی ئەم وڵاتە و کە تا ئێستاکەش ئەو خزمەتە بۆ گۆرانیبێژانی بێگانە هەر بەردەوامە، بۆیە دەیان هونەرمەندی بەتوانای کورد نیگەرانە لە بەرامبەر ئەو بارودۆخە، کە پێم وایە ئاستی ئەو هونەرمەندانەی خۆمان هیچی کەمتر نیە بەڵکو زیاتریشە لەبەرامبەر ئاستی ئەو گۆرانیبێژە بێگانانەی لە کوردستان خزمەتیان دەکرێت، کە هیچ منەتێکیان پێ نیە، هیوادارم چاوێک بەو بارو دۆخە دابخشێننەوە چیتر هونەرمەندانی درواسێ بەسەرمان فەرز نەکەن”.
عەبدولغەفار عەبدوڵڵا
