ئێواره‌ی پایز!
ئێواره‌یه‌كی پایزی قژ زێڕین
كزه بایه‌كی ته‌زیو
هێمن هێمن په‌رچه‌می داره‌كانی ده‌ڕنیه‌وه‌و
گه‌ڵا وه‌ریوه‌كانی سه‌ر شه‌قام
له ژێر پێی رێبواره بێ ره‌حمه‌كان وردو خاش ده‌بوون و نۆته‌یه‌كی پڕ له نائومێدیان
بۆ مه‌رگی ناوه‌خته‌ی ژیان ده‌ژه‌نیی..
ده‌یانگوت: ئاخ چه‌ند كورته ته‌مه‌نی جوانی !!!
پیاسه
له‌گه‌ڵ تارمایی روحی ئه‌وا
له ژێر دار سنۆبه‌رێكی باڵا شه‌نگ و زڕاڤا
چاوت بۆ هه‌ناسه‌ی گه‌رمی ئه‌و دوو كۆتره
ته‌مه‌ن نه‌ونه‌ماییه هه‌ڵخستبوو،
ناوه ناوه له باوه‌شی ئاوێته بوونا پیاسه‌یان
به ناخی سۆتماكی یه‌كترا ده‌كردو
گڕیان له لێوی یه‌كتر به‌رده‌دا…
عوبێد خدر
