Published On: Fri, Jun 22nd, 2012

میوانێ له‌ سلێمانی

له‌ناوته‌مێ له‌خۆڵدا ڕێ ده‌که‌م

چاوه‌کانم ده‌بریسکێنه‌وه‌ ده‌گه‌ڕێن بۆ

شوێنه‌واری جێ پێکان

گه‌ره‌کیانه‌ مناڵی خۆیان بدۆزنه‌وه‌

له‌ناو ئه‌م وێرانه‌یه‌دا

ئاره‌زومه‌ سه‌وزببمه‌وه‌

ئای خودێ ……….

ئه‌م گلێنانه‌م بۆ هێنده‌ بچوکن

جێگای حه‌شاردانی شه‌قام و

شاردنه‌وه‌ی چیاو

داڵده‌ی باڵنده‌کانی تێدا نابێته‌وه‌

کات ژمێر شه‌شی به‌یانیه‌

له‌جێگای دارهه‌ناره‌کان

چیمه‌نتۆ و کاشی ناشرینه‌

دارهه‌رمێکه‌ له‌ ته‌نهایدا

زه‌رد هه‌ڵگه‌ڕاوه‌

له‌ ناوه‌ڕاستی گه‌ڕه‌که‌که‌ماندا وه‌ستاوم

دیقه‌تی بزێوی هه‌رزه‌کاریم ئه‌ده‌م

سه‌یری سه‌ربانی هاوسێکانمان ده‌که‌م

شه‌وانی هاوین گوێمان له‌ نهێنیه‌کانی یه‌ک ده‌گرت‌

ئه‌وه‌ش   قوتابخانه‌که‌مه‌

ساڵانێک به‌ سه‌دریه‌ ڕه‌ش وقردێله‌ سپیه‌کانمه‌وه‌

له‌ باوه‌شی دا بووم

که‌چی وا نام ناسێته‌وه‌ و

مامۆستاکانیش ئه‌وانه‌ نین که‌

منیان خۆش ده‌ویست

حه‌وتی به‌یانیه

بۆنی به‌رچای دایکم مه‌ستی کردووم

ده‌مخاته‌ خه‌ڵوه‌تی

ده‌نگه‌ده‌نگ و هاوار هاواری هه‌موومان

دایه‌ …

 کوا گۆره‌ویه‌کانم

بێ خاڵ کوا قه‌ڵه‌مه‌که‌م

تۆ دوێنێ شه‌و ده‌فته‌ره‌که‌ت لێ سه‌ندم

پرسیاره‌ له‌سه‌ریه‌که‌کانی دایکم

چاکه‌تان خوارده‌وه‌

ئه‌م نیوه‌ڕۆیه‌ چیتان بۆ لێبنێم

ڕۆژانه‌که‌ی باوکم

که‌ له‌سه‌رمێزه‌که‌ بۆی داده‌ناین

که‌چی ئێستاکه‌ دایکم نه‌نه‌یه‌و

کپه‌ و بێ پرسیاره‌

ماڵه‌که‌مان چه‌ند پارچه‌یه‌که‌

باوکیشم ساڵانێکی زۆره‌ خه‌وتوه‌

به‌یانیان ڕۆژانه‌مان ناداتێ

جلی جه‌ژن و نوقڵی جه‌ژنمان

بۆ ناكڕێ…..

هه‌موو شتێ شێواوه

کاتژمێر نۆی به‌یانیه‌

له‌گوڵدانی مناڵیمدا

چڵێ ڕیحانه‌ ده‌ردێنم

ئارامگای دایه‌ گه‌وره‌ی

پێداده‌پۆشم و

بۆنی مێخه‌کی باخه‌ڵی

ده‌که‌م …

له‌وێوه‌ گله‌یم له‌ مامه‌م کرد بۆ نه‌هات

جارێک باسی یادگاریه‌کانی

براکانیمان بۆ بکات

بۆ نه‌ی هێشت ئامۆزاکانم بناسم ‌

چووم بۆماڵی دایه‌خان

 باوکم و هه‌ردوو مامه‌که‌می لابوو

ئاڵابوون له‌ دڕکه‌وه‌

له‌بری کتێبه‌کانی و ڕۆژمێره‌که‌ی

کۆمه‌ڵێک مقه‌با بچوک ،بچوک

له‌سه‌رسنگی

که‌ڵه‌که‌ کرابوون

هه‌ڵم گرت

وام زانی بیره‌وه‌ریه‌کانی

به‌هه‌شته‌‌

بۆمانی نوسیوه‌ته‌وه‌

ووتیان….. ئه‌وه

ڕۆژمێری مه‌لایه‌که

که‌ له‌ هه‌ینی دا لێره‌وه‌

 تێپه‌ڕ ده‌بێت

به‌ڵام باوکم گوێ ڕادێری

شه‌ماڵ سائیب و قادر دیلان

زه‌کی موران بوو

به‌ده‌م باده‌ نۆشین و ئه‌ندێشه‌کانیه‌وه‌

ده‌نگی ئه‌وان  ئه‌یان لاوان

بڕوا ناکه‌م ئێستاکه‌ش بێ ئه‌ندێشه‌ بێت

گوڵم پێ نه‌بوو

که‌ سه‌ردانی چێوارم کرد

ته‌نها هه‌ستێکی گه‌رم کۆمه‌ڵێک وه‌فاو

باوه‌شێک له‌ فرمێسک نه‌بێت

چێوار کراس و پانتۆڵی له‌به‌ر نه‌بوو

نایلۆنێکی ڕه‌شی پۆشیبوو

باڵاکه‌ی زۆر به‌رز بوو

به‌گووڵی زه‌ردو

ئه‌سرین

 داپۆشرابوو

هه‌رساڵێ دێمه‌وه

سه‌یوان‌

 خۆشه‌ویستێکم لێ

ده‌ستێنی

منێ ناتوانم ببمه‌ ئه‌رخه‌وانێ

له‌پاڵتانا بڕوێم و جێتان نه‌هێڵم

شار گۆڕستانێکی خنجیلانه‌‌

و

گۆڕستانیش شارێکی

گه‌وره‌ یه.

کاتژمێر11 ی به‌یانیه‌

وا له‌ ناو بازاڕدام چه‌توون و لاسار

ده‌ستکاری هه‌موو که‌لووپه‌لێک ده‌که‌م

به‌ دوکانه‌کاندا تێپه‌ڕده‌بم

 زۆرم په‌له‌یه‌

ئه‌مه‌وێت هه‌مووشتێ ببینم

ژنه‌ عه‌با به‌سه‌ره‌کان

پیاوه‌ چاو بازه‌کان

قوماشه‌ شۆڕه‌وه‌بووه‌کان

‌  هاواری

فرۆشیاره‌کان

بۆنی که‌باب خانه‌کان

متومووروی سه‌رعه‌ره‌بانه‌کان

کتێبخانه‌ی سه‌ر شۆسته‌کان

وی له‌وجا‌نجاڵیه‌ی

موچوڕکه‌ی خۆشیم بۆ دێنێ

ئه‌وه‌ منم یا شاژنی خه‌ونه‌کان

کاتژمێر کاتی بانگی نیوه‌ڕۆیه‌

بانگ ئه‌ده‌م به‌گوێی شاردا

خۆشم ئه‌وێیت به‌ وێرانه‌یته‌وه‌

به‌ جه‌نجاڵیته‌وه‌

به‌ په‌شۆکاویته‌وه

به‌ قژه‌ لوول و شێواوه‌که‌م

به‌رمزگه‌وتی گه‌وره‌

ئه‌ماڵم

ده‌زانم ده‌مێکه‌

بێ نازه‌و

که‌سێک نیه‌

خاوێنی کاته‌وه

کات سێی نیوه‌ڕۆیه‌

له‌گه‌ڵ خۆشه‌ویستێکی به‌سه‌ر چوو

ڕێ ده‌که‌م

بیست و یه‌ک ساڵه‌ بۆنی هه‌مان

عه‌تری

لێدێ

هێشتا په‌شۆکاوه‌

له‌ده‌ریای بیرکردنه‌وه‌دا

نوقمه‌

که‌نارێ نیه‌  بیگرێته‌خۆ

جودای له‌ژێر پێمانه‌وه‌

هه‌ڵده‌قوڵا

ووشه‌کانی پچڕ پچڕ بوون

بێهوده‌ی پرسیاری ده‌کرد

ماڵئاوای بۆ هه‌تا هه‌تایه‌

وه‌ڵامێک بوو

 ده‌مه‌و ئێواره‌یه‌

باڵنده‌کان پێشم که‌وتوون

ده‌م به‌ن بۆ باخی گشتی

بۆنی دارسنه‌وبه‌ره‌کان ده‌که‌م

خۆم به‌ شه‌ونمی چناره‌کان

 ده‌شۆمه‌وه

‌گوڵاوی داودیه‌کان

له‌گه‌ردنم ئه‌ده‌م

به‌کانێسکانا تێپه‌ڕ ده‌بم…

مه‌ی خانه‌کان

به‌سه‌رده‌که‌مه‌وه

مانگه‌شه‌وێک

له‌ڕه‌نگی بیره‌وه‌ری

ده‌که‌مه‌ له‌پی ده‌ستمه‌وه

شه‌و داهات

ژووره‌که‌م نه‌ماوه‌

تا له‌ که‌ناری په‌نجه‌ره‌که‌یدا

ده‌قێ بخوێنمه‌وه‌ و

گوێ له‌ فه‌یروز بگرم

سه‌مایه‌ک بۆ دیواره‌کانی بکه‌م

جله‌کانی به‌یانم ئاماده‌ که‌م

ناز به‌سه‌ر ئاوێنه‌که‌مدا بکه‌م

له‌سه‌ر جێگاکه‌م

له‌گه‌ڵ خه‌ونێک

په‌مه‌یی ببمه‌وه‌

ئێستا

بریتیم له‌ جانتایه‌ک

له‌ قوژبنێکا فڕێ دراوم

بێگانه‌م و نامۆم

ئه‌ی سلێمانی

تۆ ته‌مو مژێ

له‌خۆڵ و

 ئازاری

منیش

ته‌پوتۆزی‌

 یادگاریه‌ به‌ جێماوه‌کانتم

فرمێسک مسته‌فا

ئه‌ڵمانیا

10/12/2008

Comments

comments

Powered by Facebook Comments

About the Author

Copyright © 2012 www.chra.tv