CHRA.TV

Voorbeeld-HTML-pagina

ئامادەبووانى ئێستا 67 میوان

ئاگاداری و ڕاگه‌یاندن

ڕاپۆرته‌ هه‌واڵ له‌ هۆڵه‌نداوه‌: سەلەفیەتی ئیسلامی و پێوەندیەکانی لەگەڵ بزووتنەوە جیهادیەکاندا

له‌ کۆڕێکی ڕۆشنبیری و زانیاری به‌خشیندا ده‌رباره‌ی ئیسلامی سیاسی له‌ هۆڵه‌ندا 

رۆژی شەممە رێکەوتی ١٤-٦-٢٠١٤ رێکخراوی چاودێری کوردۆساید (چاک) له‌ هۆڵه‌ندا و کۆمه‌ڵه‌ی خوێندکاران و لاوانی کوردستان له‌ هۆڵه‌ندا، بەهاوکاری و پشتگیری ناوه‌ندی ده‌ره‌وه‌ی رێکخراوە دیموکراتیەکانی (ی.ن.ک) کاتژمێر حه‌وتی ئێواره‌ 19:00 له‌ هۆڵی بیرۆی

کۆمیته‌ی ڕێکخستنی هۆڵه‌ندا، کۆڕێکی ڕۆشنبیری و زانیاری به‌خشینی ده‌رباره‌ی ئیسلامی سیاسی بۆ بەڕێز (فەرید ئایەت لحەسەن)، بەناونیشانی (سەلەفیەتی ئیسلامی و پێوەندیەکانی لەگەڵ بزووتنەوە جیهادیەکان) ڕێکخست.

سه‌ره‌تا له‌ لایه‌ن هه‌ردوو سه‌رکه‌وت فه‌تاح له‌ ڕێکخراوی چاک و دانا قادر له‌ کۆمه‌ڵه‌ی خوێندکاران و لاوانی کوردستان له‌ هؤڵه‌ندا، مه‌به‌ستی به‌ستنی ئه‌م کۆڕه‌یان، به‌ هاوبه‌شی هه‌ردوو ڕێکخراوه‌که‌ له‌م بارودۆخه‌ی ئه‌مڕۆی عێراق و کوردستان و ناوچه‌که‌دا به‌ پێویست زانی، پاشان سه‌ید عه‌لی لێپرسراوی کۆمیته‌ی ڕێکخستنی هۆڵه‌ندای (ی.ن،ک)، دوا هه‌واڵ و بۆچوونی فه‌رمی یه‌کێتیی نیشتمانیی و ڕه‌وشی کوردستان و ناوچه‌ کێشه‌له‌سه‌ره‌کانی کوردستانی خسته‌ ڕوو و هه‌روه‌ها سه‌باره‌ت به‌م ڕه‌وشه‌ نه‌خوازراو و هه‌ستیاره‌ی له‌م چه‌ند ڕۆژه‌ی ڕابردوودا، که‌ له‌ ناوچه‌که‌دا هاتۆته‌ ئاراوه، هه‌ڵوێستی یه‌کگرتوویی سه‌رکردایه‌تی کورد‌ی به‌رز نرخاند.

پاشان هیوا عه‌لی ئاغا به‌ڕێوه‌به‌ری کۆڕه‌که‌، خاوه‌ن باسه‌که‌ی پێشکه‌شکرد و  به‌ڕێز(فەرید ئایەت لحەسەن) ی وه‌ک توێژه‌رێکی ئه‌کادیمی بواری ئیسلامی سیاسی و بەڕێوەبەری دامەزراوەی رایەڵەی هۆڵەندی بۆ دەوڵەتی یاساو هاوڵاتیبوون‌ له‌ وه‌زاره‌تی ناوخۆ ناساند.

خاوه‌ن باس له‌ میانی توێژینه‌وه‌که‌یدا به‌و دروشمه‌ ده‌ستی پێکرد و جه‌ختی  له‌ مافی چاره‌ی خۆنوسین بۆ گه‌لان کرده‌وه‌، وه‌ک چۆن ‌له ‌سه‌ر ئارمی یه‌کێتیی نیشتمانیی کوردستان نوسراوه‌، له‌ تابلۆکه‌ی پشتیانه‌وه،‌ ‌(ئاشتی، دیموکراسی، مافی مرۆڤ و مافی چاره‌ی خۆنوسین)، وتی وه‌ک ئه‌مازیغیییه‌ک، خۆم به‌ کوردی وڵاتی مه‌غریب ده‌زانم گه‌لی کورد، چۆن له‌ ڕۆژهه‌ڵاتی ناوه‌ڕاستدا، خاوه‌نی  خاکی ڕه‌سه‌نی خۆیانن و له‌گه‌ڵ ئه‌وه‌ی له‌ مێژوودا خاوه‌نی چه‌ندین شۆڕشی پڕقوربانی یه‌ک له‌دوای یه‌ک بوون، به‌ڵام  وڵاته‌که‌یان دابه‌ش کراوه‌، ئه‌مازیغیه‌کانیش له‌ باکوڕی ئه‌فه‌ریقا، خاوه‌نی ڕه‌سه‌نایه‌تی و خاکی خۆیانن و خاوه‌نی زۆربه‌ی شۆڕشه‌ ڕزگاریخوازه‌کانی باکوری ئه‌فه‌ریقا بوون، دژی ئیستعماری فه‌ره‌نسی، که‌چی یا ئه‌م چه‌ند ساڵه‌ی دوایش هه‌ر چه‌وساوه‌ و بێبه‌شکراون له‌ ساکارترین مافی مرۆڤایه‌تی خۆیان.

توێژه‌ر له‌ ناو باسه‌که‌یدا به‌درێژی باسێکی مێژوویی بزووتنه‌وه‌ جیهادی و سه‌له‌فیه‌کانی جیهانی عه‌ره‌بی کرد و له‌ ناو هۆڵه‌ندا به‌ تایبه‌تی و له‌ ئه‌وروپا و وڵاتانی دیکه‌ی جیهانی به‌ به‌ڵگه‌ نموونه‌ی زیندووی له‌م باره‌یه‌وه‌ هێنایه‌وه‌.

له‌ میانی باسه‌که‌یدا، ئاماژه‌ی به‌ 1750 دامه‌زراوه‌ی سه‌له‌فی دا‌، له‌ دنیادا  که‌ په‌یوه‌ستن به‌ هزر و بیری جیهادیه‌وه‌، به‌ ناوه‌کانی په‌روه‌رده‌ و خوێندن، وه‌رزش و (آغاثه‌ العالمیه‌) ه‌وه‌، هه‌روه‌ها به‌ زۆری نمونه‌کانی له‌ ناو هۆڵه‌نده‌دا بوون، بۆ نموونه‌ تا ئێستا 130 گه‌نج که‌ هه‌ڵگری ڕه‌گه‌زنامه‌ی هۆڵه‌ندین، له‌ ناو به‌ره‌ی نه‌صره‌ له‌ سوریا ده‌جه‌نگن و دوانیشیان له‌ دووکرده‌وه‌ی خۆکوژی تیرۆریستیدا له‌ ناوچه‌کانی عێراق خۆیان ته‌قاندۆته‌وه‌.

توێژه‌ر له‌ کۆڕه‌که‌دا وتی پرسیاری ڕووبه‌ڕووی داموده‌زگا حکومیه‌کانی هۆڵه‌ندی ئه‌وه‌یه‌، چۆن له‌ مه‌ودوا مامه‌ڵه‌ له‌گه‌ڵ ئه‌و کۆمه‌ڵه‌ و ڕێکخراوانه‌دا بکرێت...؟

له‌ ساڵی 2004 ه‌وه‌ ئه‌م ڕێکخراوه‌ جیهادی و سه‌له‌فیانه‌، به‌ شێوازێکی مۆدێرنانه، له‌ ڕێگه‌ی جیهانگیری(عولمه‌)‌ه‌وه‌، تێکه‌ڵاوی ڕێکخراوه‌ دینی و ڕۆشنبیری و وه‌رزشیه‌کان بوونه‌ته‌وه‌.

له‌ هۆڵه‌ندا زۆر به‌ وردی چاودێری ئه‌م گروپانه‌ ده‌کرێن له‌ ڕێگه‌یدامەزراوەی رایەڵەی هۆڵەندی بۆ دەوڵەتی یاساو هاوڵاتیبوون له‌ وه‌زاره‌تی ناوخۆ، به‌ڵام ئازادی بیروڕا و تاک، به‌ گوێره‌ی یاسا له‌ کۆمه‌ڵگه‌ی هۆڵه‌ندیدا ڕێگره، له‌به‌رده‌م چوونه‌ ناو تایبه‌تمه‌ندی که‌سه‌کانه‌وه‌، تا ئه‌و کاته‌ی نه‌که‌ونه‌ ناو داوی تاوانێکه‌وه‌‌.

له‌ به‌شێکی دیکه‌ی باسه‌که‌یدا، هاته‌ سه‌ر ڕێکخراوی تیرۆریستی داعش له‌ وڵاتی شام و عێراقدا و ڕۆڵ و شێوازی کارکردن و هه‌ڵسوکه‌وتیانی خسته‌ به‌رباس و توێژینه‌وه‌، ئه‌وه‌ی خسته‌ ڕوو چۆن ئه‌م ڕێکخراوه‌ به‌ گوێره‌ی کات ستراتیژی خۆی ده‌گۆڕی و جۆن توانیوێتی ته‌کنه‌لۆجیا و جیهانگیری جیهادی له‌ خزمه‌تی هزری به‌رگریدا به‌کار بهێنێت، له‌ عێراقیشدا باری کێشه‌ی سیاسه‌تی هه‌ڵه‌ و چه‌ک و سوپا... که‌شه‌که‌ بۆ ئه‌م ڕێکخراوه‌ خۆشکرد، به‌ زوویی گه‌شه‌ بکه‌ن.

یه‌کێک له‌ پرسیاره‌ گرنگه‌کانی توێژه‌ر ئه‌وه‌ بوو... ده‌بێت بزانین چۆن هه‌ڵسوکه‌وت له‌گه‌ڵ گه‌نجه‌کانماندا بکه‌ین...؟! چونکه‌ ئاشکرایه‌ زۆربه‌ی سه‌رکرده‌کانی پێشووی سوپا و حیزبی به‌عسی هه‌ڵوه‌شاو، له‌ سه‌رکرده‌کانی ئێستای داعشدان و ئێسته‌ داعش ڕێکخراوێکی تایبه‌ته‌ به‌ عێراقیه‌کان.. پرسیارێکی لۆجیکی لێره‌دا خۆی ده‌سه‌پێنێ..؟ کورده‌کان له‌م کاته‌دا چی بکه‌ن باشه‌..؟ ڕۆڵ(دور)ه‌ چاوه‌ڕوانکراوه‌کان چین بۆ سیاسیه‌کانی کورد بیبینێ... بۆ ئه‌وه‌ی سایکس پیکۆیه‌کی تازه‌ی دیکه‌ دووباره‌ نه‌بێته‌وه‌..؟ چونکه گه‌لێک له‌ ده‌وڵه‌تانی ناوچه‌که‌ وه‌ک سعودیه‌  و.... چه‌ندین وڵاتی دیکه‌ی جیهانی‌ یاریکه‌ری سه‌ره‌کین له‌م یاریه‌دا..؟ ئه‌م مه‌سه‌له‌یه‌ وه‌ک له‌ راپۆرته‌کانی دامەزراوەی رایەڵەی هۆڵەندی و وه‌زاره‌تی ناوخۆدا ئاماژه‌ی پێدراوه‌، ڕه‌نگه‌ سه‌رئه‌نجامه‌کانی تا 20 ساڵی دیکه‌ بخایه‌نێ، ده‌وڵه‌تی سعودیه‌.. به‌رژه‌وه‌ندی له‌وه‌دا نیه‌، بۆ بونیاتنانه‌وه‌ی ده‌وڵه‌تی عێراقی پته‌و، به‌ڵام شه‌رعیه‌تی مێژوویی بۆ هه‌موو گه‌لانی عێراق، به‌ تایبه‌تی کورد، که‌ ده‌کرێت ڕۆڵی سه‌ره‌کی تێدا بگێڕێت. ئه‌ویش ئایندی نزیک ده‌ری ده‌خات.

جێی ئاماژە پێکردنە، ئاماده‌بووانی کۆڕه‌که‌ به‌سداریه‌کی جدییان تێدا کرد به‌ پرسیار و سه‌رنج و بۆچوونی جیاواز و چه‌پکێک بیروبۆچوونی بەهادار و بەنرخ و پڕبایەخ، پڕاوپڕ لە زانیاری لۆژیکی سەبارەت بە سەرهەڵدانی سەلەفیەت له‌ ناوچه‌ی میزۆپۆتامیا تا هۆڵەندا، لە دەستپێکەوە تا ئەمڕۆ خرانه‌ ڕوو، هەروەها تیشک خرایه‌ سه‌ر شێوازەکانی کاریگەری نەرێنی لەسەر لاوان لێره‌ و له‌ وڵات.. هەر لەم کۆڕەدا به‌دوورودرێژی گفتوگۆ لەسەر گۆڕانکاریەکانی وڵاتانی عەرەبی و سوریا و عێراق و کوردستان کرا و ئاماژه‌ به‌و کردە تیرۆریستیانە درا، کە رۆژانە بەرۆکی گەلانی ئه‌و ناوچانه‌ دەگرێتەوە، کە چۆن رێکخراوە تیرۆریست و تووندڕه‌وه‌کانی وەک داعش و بەرەی نوسرەو جوندی ئیسلام و سوپای محەمەد و دەیانی ڕێکخراوی توندڕه‌وی دیکە رۆژانە بێباکانە مرۆڤەکان و شوێنە گشتیەکان دەکەنە ئامانج و خاپوریان دەکەن، بەوهۆیەشەوە خوێنی ژن و منداڵ و مرۆڤی سڤیل دەڕێژن، له‌ کۆڕه‌که‌دا هۆشیاری درایه‌ ئاماده‌بووان چۆن ڕێ و شوێنی پێویست بگرنه‌ به‌ر له‌ کاتی هه‌ر به‌ره‌و ڕووبوونه‌وه‌ و ئه‌گه‌رێکدا و چۆن‌ لاوانی خۆمان هۆشیاربکه‌ینه‌وه‌ به‌ کردنه‌وه‌ی ده‌رگای دیالۆگی کراوه‌.

له‌ کۆتایی کۆڕه‌که‌دا چه‌پکه‌ گوڵی ده‌ستخۆشی و ڕێزلێنان له‌ لایه‌ن لیپرسراوی ناوه‌ندی چاک و کۆمه‌ڵه‌ی خوێندکاران و لاوان پێشکه‌ش کرا بەڕێزان به‌ خاوه‌ن باس (فەرید ئایەت لحەسەن) و به‌ڕێوه‌به‌ری کۆڕ (هیوا عه‌لی ئاغا)، هه‌روه‌ها سه‌ردار فه‌تاح ئه‌مین، لێپرسراوی ڕێکخراوه‌کانی هۆڵه‌ندا و کارگێڕی ناوه‌ند، چه‌پکه‌ گوڵی ئازاد خالیدی به‌رزپرسی ڕێکخراوه‌ دیموکراتیه‌کانی پێشکه‌ش به‌ سه‌ید عه‌لی لێپرسراوی کۆمیته‌ی ڕێکخستنی هۆڵه‌ندا کرد، که‌ ئه‌م هه‌له‌ی بۆ ڕێکخراوی چاک و کۆمه‌ڵه‌ی خوێندکاران و لاوان ڕه‌خساند بۆ پێشکه‌شی کردنی ئه‌م کۆڕه‌.